ދިރާގު ގޭމާސް ގިލްޑް (ޑީޖީޖީ)އިން ކުރިއަށްގެންދާ "ރޯދަ ކުއެސްޓް" މިރޭ ދިރާގު ހެޑް އޮފީހުގައި ފެށުމަށް ހަމަޖައްސައިފި އެވެ.
މިރޭ ފަށާ އެ ހަރަކާތް އަންނަ އާދިއްތަ ދުވަހުގެ ނިޔަލަށް، ފަސް ދުވަހުގެ މުއްދަތައް ކުރިއަށް ދާނެ އެވެ. ރާއްޖޭގެ ގޭމިން ކޮމިއުނިޓީއަށް ހާއްސަކޮށްގެން ބާއްވާ އެ ފޯރިގަދަ ހަރަކާތުގައި މަގުބޫލު އެކި ގޭމުތައް ވަނީ ހިމަނައިފަ އެވެ. މިއީ ހުރިހާ ފެންވަރެއްގެ ގޭމް ކުޅޭ ފަރާތްތަކަށް ވެސް ބައިވެރިވެވޭ ގޮތަށް ފަރުމާކޮށްފައިވާ ހަރަކާތެކެވެ.
"ރޯދަ ކުއެސްޓް" ކުރިއަށް ދާނީ ކޮންމެ ރެއަކު ވެސް ރޭގަނޑު 9 އިން މެންދަމު 1 ޖަހަންދެނެވެ.
"ރޯދަ ކުއެސްޓް"ގައި ބައިވެރިވުމަށް ފީއެއް ނުނަގަ އެވެ. އެ ހަރަކާތުގެ އެމްއެލްބީބީ އާއި ޕަބްޖީ މޮބައިލާއި އެފްސީ26 އަދި ޓެކެން 8ގެ ރަޖިސްޓްރޭޝަން މިހާރު ވަނީ ނިމިފަ އެވެ. އެ ހަރަކާތުގައި ހޮނިހިރު ދުވަހުން ފެށިގެން ކުރިއަށް ގެންދަން ހަމަޖެހިފައިވާ ޖީޓީ7 ރޭސިންގް ސިމިއުލޭޓަރު އަދި ބީޓް ސޭބާ ސެޝަންތަކުގައި އިތުރު ރަޖިސްޓްރޭޝަނަކާ ނުލައި ޒިޔާރަތްކުރާ ހުރިހާ ފަރާތްތަކަށް ވެސް ބައިވެރިވެވޭނެ އެވެ.
ރާއްޖޭގެ އެންމެ ބޮޑު ގޭމިން ޕްލެޓްފޯމް ކަމުގައިވާ ޑީޖީޖީއިން ދަނީ ރާއްޖޭގެ އެކި ކަންކޮޅުތަކުގައި އީ-ސްޕޯޓްސް ކުރިއެރުވުމަށް ގިނަ މަސައްކަތްތަކެއްކޮށް، އަންނަން އޮތް ޖީލުތަކުގެ ގޭމިން ހުނަރުތައް އިތުރުކުރުމަށް މުހިންމު މަސައްކަތްތަކެއް ކުރަމުންނެވެ.
ޑީޖީޖީއިން ކުރިއަށް ގެންދާ ހަރަކާތްތަކުގެ އެންމެފަހުގެ މައުލޫމާތުތައް އެ ޕްލެޓްފޯމުގެ ވެބްސައިޓުން ލިބޭނެ އެވެ.