ދުނިޔޭގެ އެންމެ ބޮޑު ޓޫރިޒަމް މައުރަޒު "އައިޓީބީ ބާލިން 2027" ގެ ރަސްމީ ހޯސްޓް ކަންޓްރީގެ ގޮތުގައި ރާއްޖެ ހަމަޖައްސައިފި އެވެ.
ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން ރޭ ބުނީ މި ފުރުސަތާ އެކު، ދިވެހިންގެ ހާއްސަ މެހެމާންދާރީ އަދި ޓޫރިޒަމް ސިނާއަތުގެ މުއްސަނދިކަން، މި މައުރަޒުގެ ރަސްމީ ބްރޭންޑިންގެ ތެރެއިން މުޅި ދުނިޔެ އަށް ދައްކާލުމުގެ ފުރުސަތު ރާއްޖެ އަށް ލިބޭނެ ކަމަށެވެ.
ޖަރުމަނުގައި މިހާރު ކުރިއަށް ގެންދާ އައިޓީބީ ބާލިން 2026 ގައި ގާއިމްކޮށްފައިވާ ރާއްޖޭގެ ސްޓޭންޑުގައި ބޭއްވި ހާއްސަ ރަސްމިއްޔާތެއްގައި މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ވީއެމްސީ ސީއީއޯ އަދި އެމްޑީ އިބްރާހިމް ޝިއުރީ އެެވެ. މެސޭ ބާލިންގެ ފަރާތުން ސޮއިކުރެއްވީ އެ ކުންފުނީގެ ސީއީއޯ ޑރ. މާރިއޯ ޓޯބިއަސް އެވެ.
މި ރަސްމިއްޔާތުގައި ޑރ. ޓޯބިއަސް ވިދާޅުވީ ރާއްޖޭގެ ހިތްގައިމު ރީތިކަމާއި ކުރިއަރަމުން އަންނަ ޓޫރިޒަމް ބައިނަލްއަގުވާމީ މައިދާނުގައި އިޝްތިހާރު ކުރުމަށް އައިޓީބީ ބާލިންއަކީ އެންމެ އެކަށީގެންވާ ތަން ކަމަށެވެ.
މިއީ މުޅި ދުނިޔޭގެ ޓޫރިޒަމްގެ ދާއިރާގެ ހިއްސާދާރުންނާއި މާހިރުން އަދި ގިނަ ވިޔަފާރިތަކަކުން އެއްތަނަކުން ބައްދަލުވާ ތަނަކަށް ވުމުން ރާއްޖެ އަށް ލިބޭ ވަރަށް މުހިންމު ފުރުސަތެއްކަން އޭނާ ފާހަގަކުރެއްވި އެވެ.
އަންނަ އަހަރުގެ ހޯސްޓް ކަންޓްރީގެ ހައިސިއްޔަތުން، ރާއްޖޭގެ ޓޫރިޒަމް ހުރިހާ ދާއިރާއެއް އިޝްތިހާރު ކުރާނެ ކަމަށް ވީއެމްސީން ބުންޏެވެ. އޭގެ ތެރޭގައި ރިސޯޓުތަކާއި ބުޓީކް ހޮޓާތަކާއި ޑައިވިން އާއި މޫދު ކުޅިވަރުތަކާއި ވެލްނަސް އަދި ސަގާފީ ޓޫރިޒަމްގެ އިތުރުން ތިމާވެށި ހިމާޔަތްކުރުމާއި ދެމެހެއްޓެނިވި ޓޫރިޒަމަށް ރާއްޖެ އިން ކުރާ މަސައްކަތްތައް ވެސް މި މައުރަޒުގައި ދައްކާލާނެކަމަށް އެ ކޯޕަރޭޝަނުން ބުންޏެވެ.
"އެއް އަހަރު ދުވަހުގެ ޕްރޮމޯޝަނަލް ކެމްޕެއިނެއް ކުރިއަށް ގެންދެވޭ. އޭގެ ތެރޭގައި އަޅުގަނޑުމެން އެކި ކަންތައްތައް ކުރަން ރާވާފައި މިވަނީ،" ވީއެމްސީގެ އެމްޑީ ޝިއުރީ ވިދާޅުވި އެވެ.
އޭނާ ފާހަގަކުރެއްވި ގޮތުގައި 2027 ގެ ހޮސްޓިން ކަންޓްރީގެ ޝަރަފު ރާއްޖެ އަށް ލިބުނީ އެހެން ގައުމުތަކާ ވާދަކޮށްގެންނެވެ. އެއީ ރާއްޖެ އިން ޕްރޮޕޯޒަލް ހުށަހަޅައިގެން، ވީއެމްސީގެ ވަރަށް ބުރަ މަސައްކަތުން ލިބުނު ކާމިޔާބީއެއް ކަމަށް ޝިއުރީ ވިދާޅުވި އެވެ.
ޝިއުރީ ވިދާޅުވި ގޮތުގައި، މި ފުރުސަތަކީ ރާއްޖޭގެ ރަށްތަކުން ލިބޭ ތަފާތު ތަޖުރިބާތައް ދުނިޔެއަށް ހާމަކޮށްދިނުމަށް ލިބޭ ރަނުގެ ފުރުސަތެކެވެ.
ހޯސްޓް ކަންޓްރީގެ ހައިސިއްޔަތުން، މާޗު 15، 2027 ގައި ބާއްވާ ރަސްމީ އިފުތިތާހީ ގާލާ އިވެންޓް ބާއްވާނީ ރާއްޖޭންނެވެ. އަދި އެ މަހުގެ 16 އިން 18 އަށް ކުރިއަށް ގެންދާ މައުރަޒުގެ ތެރޭގައި ތަފާތު ހަރަކާތްތަކާއި ސަގާފީ ހުށަހެޅުންތަކާއި ނެޓްވޯކިން އިވެންޓުތައް ރާއްޖެއިން ކުރިއަށް ގެންދާނެ އެވެ.
އެންމެ ފަހުން ރާއްޖެއަށް އައިޓީބީ ބާލިންގެ ހޯސްޓް ކަންޓްރީގެ މަގާމު ލިބިފައި ވަނީ މީގެ 10 އަހަރު ކުރިން 2016 ވަނަ އަހަރު އެވެ.