މިދިޔަ އަހަރުގެ ފައިދާ އިން ހިއްސާއަކަށް 3.53ރ. ބަހަން އުރީދޫގެ އަހަރީ އާންމު ޖަލްސާގައި ފާސްކޮށްފި އެވެ.
މިދިޔަ ބުދަ ދުވަހުގެ ރޭ އުރީދޫ ހެޑް އޮފީހުގައި ބޭއްވި އަހަރީ އާއްމު ޖަލްސާގައި އެ ކުންފުނީގެ 353 ހިއްސާދާރުން ބައިވެރިވި އެވެ. އޭގެ ތެރޭގައި ޖަލްސާއަށް ގޮސް ބައިވެރިވި 144 ހިއްސާދާރުންނާއި 209 ހިއްސާދާރުން ތަމްސީލުކުރި 27 ޕްރޮކްސީން ހިމެނެ އެވެ. އެއީ އެ ކުންފުނީގެ ޖުމުލަ ހިއްސާގެ 98 ޕަސެންޓެވެ.
މި އަހަރުގެ އުރީދޫގެ އަހަރީ އާންމު ޖަލްސާ ބޭއްވީ އެ ކުންފުނީގެ އޮފީހަށް ހާޒިރުވެގެންނާއި މޯލްޑިވްސް ސެކިއުރިޓީޒް ޑިޕޮސިޓަރީގެ ފަހިވޯޓް މެދުވެރިކޮށް އޮންލައިންކޮށެވެ.
އެ ޖަލްސާގައި ހިއްސާއަކަށް ބަހަން ކަނޑައެޅި އަދަދުގެ އިތުރުން، މިދިޔަ އަހަރުގެ މާޗު ނުވަވަނަ ދުވަހު ބޭއްވި އަހަރީ އާންމު ޖަލްސާގެ ޔައުމިއްޔާ އާއި މިދިޔަ އަހަރުގެ އޮޑިޓް ކޮށްފައިވާ މާލީ ބަޔާންތަކާއި ޑިރެކްޓަރުންގެ ރިޕޯޓާއި މި އަހަރުގެ އޮޑިޓަރުންގެ ގޮތުގައި ކޭޕީއެމްޖީ އައްޔަންކުރުމަށް ފާސްކުރި އެވެ.
އަދި މި އަހަރުގެ ޖަލްސާގައި ވަނީ އުރީދޫ މޯލްޑިވްސްގެ ބޯޑަށް ޑިރެކްޓަރުންގެ ގޮތުގައި ކުންފުނީގެ މެޖޯރިޓީ ހިއްސާދާރު، ވަތަނިއްޔާ އިންޓަނޭޝަނަލް ތަމްސީލުކުރުމަށް ފާތިމަތު ސުލްތޯން އަލް-ކުވާރީ އަލުން އައްޔަންކޮށް، އާންމު ހިއްސާދާރުންގެ ފަރާތުން ބޯޑުގައި އިންނަވާނެ ޑިރެކްޓަރަކަށް އަބްދުﷲ އަލީ އައްޔަންކޮށްފަ އެވެ.
އުރީދޫ، ޕަބްލިކް ކުންފުންޏަކަށް ބަދަލުކޮށް، އާއްމުންނަށް ހިއްސާ ވިއްކަން ފެށީ 2016 ވަނަ އަހަރު އެވެ. އެ ކުންފުނިން އަންނަނީ އަހަރުން އަހަރަށް ކުންފުނީގެ އާމްދަނީ އިތުރުކޮށް، ފައިދާ ބޮޑުކުރަމުންނެވެ. އަދި އެއީ ކުރު މުއްދަތެއްގެ ތެރޭގައި ހިއްސާދާރުންނަށް ބޮޑު ފައިދާއެއް ވެސް ދެމުން އަންނަ ކުންފުންޏެކެވެ.