ހުޅުމާލެ އިން މިދިޔަ ބުރާސްފަތި ދުވަހާއި ރޭ ވެސް ކަރަންޓް ކެނޑި އާއްމުންނަށް ދަތިތަކާ ކުރިމަތިލާން ޖެހުނީ އިމާރާތްކުރަން މަގު ކޮނުނު ބައެއްގެ އަތުން ކަރަންޓް ކޭބަލްތަކަށް ގެއްލުން ލިބިގެން ކަމަށް ސްޓެލްކޯ އިން ރޭ ބުނެފި އެވެ.
ބިމު އަޑީގައި ވަޅުލާފައިވާ ހައި ވޯލްޓޭޖް ކޭބަލެއް ބުރިވެގެން ހުޅުމާލެ އެކަކުން ރޭ ކަރަންޓް ކެނޑުނެވެ. މިދިޔަ ބުރާސްފަތި ދުވަހު ވެސް ހުޅުމާލެ އިން ވަނީ ދެ ގަޑިއެއްހާ އިރަށް ކަރަންޓް ކެނޑިފަ އެވެ.
ސްޓެލްކޯ އިން އިން ބުނީ ހުޅުމާލެ އިން ރޭ ކަރަންޓު ދިޔައީ އަމިއްލަ ފަރާތަކުން ހަދާ އިމާރާތެއްގެ މަސައްކަތަށް ކުރެދިމާ ހިނގުމުގެ މަގު ކޮނުމުގެ ތެރޭގައި ހައިވޯލްޓޭޖް ކޭބަލަކަށް ގެއްލުންވެގެން ކަމަށެވެ.
އެ ފަދަ ހާދިސާއެއްގައި މިދިޔަ ބުރާސްފަތި ދުވަހު ވެސް ހުޅުމާލެ 1 ގެ ބައެއް ހިސާބުތަކުން ކަރަންޓު ކެނޑުނެވެ. އެ ދުވަހު އެ ހާދިސާ ހިނގީ އިމާރާތްކުރުމުގެ މަސައްކަތެއްގައި ބަނަފްސާ ހިނގުން ސަރަހައްދުގައި ވަޅު ކޮންނަނިކޮށް ހައިވޯލްޓޭޖް ކޭބަލަށް ގެއްލުންވެގެންނެވެ.
ކޭބަލްތައް ބުރިވެގެން ކަރަންޓް ކެނޑޭތީ މީގެ ކުރިން ވެސް ސްޓެލްކޯ އިން ވަނީ މަގު ކޮންނައިރު ކޭބަލް ބުރިނުވާނެ ގޮތަކަށް މަސައްކަތް ކުރަން ތަކުރާރުކޮށް ނަސޭހަތްތެރިވެފަ އެވެ.
އެ ކުންފުނިން ރޭ ވެސް އެދުނީ މިހާރަށް ވުރެ ބޮޑަށް ޒިންމާދާރުވެ، ވަޅުލާފައިވާ ކަރަންޓު ވިއުގައަށް އެއްވެސް ގެއްލުމެއް ނުވާނެ ގޮތަށް މަސައްކަތްތައް ރާވައިގެން ކުރިއަށް ގެންދިއުމަށެވެ.
"ކައިރިކައިރީގައި މިފަދަ ހާދިސާތައް ތަކުރާރުވެ، ކަރަންޓުގެ ވިއުގައަށް ގެއްލުންވެ ހިދުމަތް މެދުކެނޑުމަކީ އާންމު ރައްޔިތުންނަށް އިންތިހާއަށް ދަތިތަކާ ކުރިމަތިލާންޖެހޭ ވަރަށް ބޮޑު ކަންބޮޑުވުމެއް،" ސްޓެލްކޯ އިން ބުންޏެވެ.
ސްޓެލްކޯ އިން ކުރިން ބުނެފައިވާ ގޮތުގައި ފަހަކަށް އައިސް ކަރަންޓް ކެނޑުމުގެ ގިނަ ހާދިސާތައް ގުޅިފައި ވަނީ ކޭބަލްތައް ބުރިވުމާ އެވެ.
ކަރަންޓު ކޭބަލްތައް ވަޅުލާފައި ހުންނަނީ ބައިނަލްއަގްވާމީ މިންގަނޑުތަކާ އެއްގޮތަށް، ކޭބަލް އޮތް ސަރަހައްދު އަންގައިދޭ ޓޭޕާއި ރައްކާތެރިކަމުގެ ޝީޓުތަކާ އެކުގަ އެވެ. އެހެންވިޔަސް މަގު ކޮންނަ މީހުން އެ ކަމަކަށް ނުބަލައި ކޭބަލަށް ގެއްލުން ވުމުން އެކަން ސިއްރު ކުރަން ކޭބަލްގައި އަމިއްލަ އަށް ޓޭޕްއަޅާކަން ވެސް ފާހަގަކުރެވިފައިވާ ކަމަށް ސްޓެލްކޯ އިން ބުންޏެވެ.