އަމިއްލަ ފަރާތްތަކުން މަގު ކޮންނައިރު، ކަރަންޓު ކޭބަލަކަށް ގެއްލުމެއް ލިބިއްޖެ ނަމަ އެ މަސައްކަތް ކުރި ފަރާތުގެ އަތުން ހަރަދުތައް ނަގަން ސްޓެލްކޯއިން ނިންމައިފި އެވެ.
އިމާރާތްތައް ކުރުމުގެ ބޭނުމުގައި މަގު ކޮންނަ ފަރާތްތަކުގެ ސަބަބުން ކަރަންޓު ކޭބަލްތަކަށް ގެއްލުންވެ، ކަރަންޓު ކެނޑޭ މައްސަލަ ބޮޑުވުމާ ގުޅިގެން ސްޓެލްކޯއިން މިއަދު ކުރި ޕޯސްޓެއްގައި ބުނީ. ކަރަންޓު ކެނޑުމުން އާއްމުންނަށް އެތައް ތަކުލީފަކާއި ދަތިތައް ކުރިމަތިވާ ކަމަށެވެ.
އެފަދަ ހާދިސާތައް ވެސް ދުވަހުން ދުވަހަށް ދުވަހަށް އިތުރުވަމުން ދާތީ ސްޓެލްކޯއިން ވަނީ، މަގު ކޮންނަ މީހުންގެ އިހުމާލުން އެފަދަ ކަމެއް ދިމާވެއްޖެ ނަމަ ކަރަންޓު ދިނުމަށް ހިނގާ ހަރަދު އެ ފަރާތުން ނަގަން ނިންމައިފަ އެވެ.
އެ ބަދަލު ގެންނަން ނިންމީ، ސްޓެލްކޯއިން ބުނިގޮތުގައި ކަރަންޓު މެދުކެނޑުމުން އާންމުންނަށް ދިމާވާ ދަތިތަކުން ސަލާމަތްކޮށް، ދެމެހެއްޓެނިވި ގޮތެއްގައި ހިދުމަތް ފޯރުކޮށްދިނުމަށެވެ.
"މަގު ކޮނުމުގެ އެންމެހާ މަސައްކަތްތައް ކުރިއަށް ގެންދަވާ ހުރިހާ ފަރާތްތަކުން ވެސް މި ކުންފުނީގެ ކަރަންޓު ވިއުގައަށް ގެއްލުން ނުވާނެހެން ޒިންމާދާރުކަމާ އެކު މަސައްކަތްތައް ރާވައި ކުރިއަށް ގެންދިއުމަށް އިލްތިމާސްކުރަން،" ސޯޝަލް މީޑިއާ ޕޯސްޓުގައިވެ އެވެ.
މިދިޔަ އެއް ހަފުތާގެ ތެރޭގައި ހުޅުމާލެ 1 ގައި ކަރަންޓު ކޭބަލް ބުރިވެގެން ދެ ދުވަހު ކަރަންޓު ކެނޑުނެވެ.
ސްޓެލްކޯގެ މީޑިއާ އޮފިޝަލަކު "މިހާރު" އަށް ވިދާޅުވީ ކަރަންޓު ކޭބަލެއް ބުރިވުމުން ސްޓެލްކޯގެ ސިސްޓަމުން ދައްކާނީ އާތު ފޯލްޓެއް އުޅެނީ ކަމަށެވެ. އެހެންވެ، އެ ސިސްޓަމް ޑިޒައިންކޮށްފައި ވަނީ އާއްމުންގެ ރައްކާތެރިކަމަށް އޮޓޮމެޓިކުން ކަރަންޓު ކެނޑޭ ގޮތަށެވެ.
"އެ ވަގުތުން ފެށިގެން ހޯދަން ފަށާނެ ކިހާ ހިސާބެއްގައި ކޮން މައްސަލައެއް އުޅެނީތޯ. އެކަން އައިޑެންޓިފައިކޮށް، ކަރަންޓު ދިނުމާ ދޭތެރޭގައި ވަގުތު ނަގާ. އެހެން ސްޓޭޝަނަކުން ކަރަންޓު ދިނުމަށް ވެސް މަސައްކަތް ކުރާނެ އެކަމަކު އެކަން ނުވާ ހާލަތްތަކުގައި މި ވަގުތު ނަގަނީ،" އޮފިޝަލް ވިދާޅުވި އެވެ.