ކަރަންޓު ކެނޑުމުގެ ދިގު ތާރީހެއް އޮތް އައްޑޫގެ ކަރަންޓުގެ ހިދުމަތާ ސްޓެލްކޯ އިން ދެވަނަ ފަހަރަށް މިއަދު ރަސްމީކޮށް ހަވާލުވެއްޖެ އެވެ.
މާލެ ފިޔަވައި އެންމެ ބޮޑު އާބާދީއެއް އޮތް ސިޓީގެ ކަރަންޓުގެ ހިދުމަތާ ސްޓެލްކޯ އިން ހަވާލުވުމާ ހަމައަށް އެ ސިޓީ އަށް އެ ހިދުމަތް ދެމުން އައީ ފެނަކަ ކުންފުނިންނެވެ. އަދި މިއީ އައްޑު އަށް ކަރަންޓުގެ ހިދުމަތް ފޯރުކޮށްދިނުމާ ސްޓެލްކޯ އިން ހަވާލުވި ދެވަނަ ފަހަރު ވެސް މެ އެވެ.
އައްޑޫގެ ކަރަންޓުގެ ހިދުމަތާ ހަވާލުވުމުގެ ގޮތުން ސްޓެލްކޯގެ މެނޭޖިން ޑިރެކްޓަރު އަލީ އަޒުވަރު އެ ސިޓީއަށް ކުރައްވަމުން ގެންދަވާ ޒިޔާރާތުގައި މިއަދު ވަނީ އައްޑޫގެ މައި އިންޖީނުގެ އަށް ވަޑައިގެން އެ އިމާރާތުގައި ސްޓެލްކޯގެ ދިދަ ނަންގަވައި ދެއްވައިފަ އެވެ. އަދި މަރަދޫފޭދޫ އޮފީހަށް ވަޑައިގެން، އެ ތަނުގައި ވެސް ސްޓެލްކޯގެ ދިދަ ނަންގަވައިދެއްވި އެވެ.
މި ޒިޔާރަތުގައި މަރަދޫފޭދޫ އޮފީހުގެ މުވައްޒަފުންނާ މުހާތަބުކުރައްވައި ވާހަކަ ދައްކަވަމުން އަޒުވަރު ވިދާޅުވީ، ސްޓެލްކޯއިން އައްޑޫގެ ކަރަންޓުގެ ހިދުމަތާ ދެވަނަ ފަހަރަށް ހަވާލުވުމަކީ އެ ސިޓީގެ ރައްޔިތުންނަށް އާ އުއްމީދުތަކެއް ގެނުވި ކަމެއް ކަމަށެވެ.
އަދި ޒަމާނީ ވަސީލަތްތަކާއެކު ދެމެހެއްޓެނިވި، ފެންވަރު ރަނގަޅު ހިދުމަތެއް ރައްޔިތުންނަށް ފޯރުކޮށްދޭނެ ކަމަށް އޭނާ ވިދާޅުވި އެވެ.
އައްޑުއަށް ފެނާއި ނަރުދަމާގެ ހިދުމަތް ވެސް ދެމުން އައީ ފެނަކައިން ކަމަށް ވިޔަސް މާދަމާއިން ފެށިގެން އެ މަސައްކަތް އެމްޑަބްލިއުއެސްސީގެ ބެލުމުގެ ދަށަށް ގެންދަން ވަނީ ނިންމައިފަ އެވެ.
ރާއްޖޭގެ ރަށްރަށަށް ފެނާއި ނަރުދަމާގެ ހިދުމަތް ދެމުން އަންނަ ކުންފުނި، ފެނަކަ ކޯޕަރޭޝަން އުވާލައި ސްޓެލްކޯގެ ބެލުމުގެ ދަށަށް ރާއްޖޭގެ ހުރިހާ ރަށެއްގެ ކަރަންޓުގެ ހިދުމަތް ދިނުން ބަދަލުކުރަން ނިންމާފައިވާކަން ރައީސް ޑރ. މުހައްމަދު މުއިއްޒު އިއުލާން ކުރެއްވީ މި މަހުގެ ހަތްވަނަ ދުވަހު އެވެ.
ފަންނީ ބޭފުޅުންނާ ހަވާލާދީ ރައީސް ވިދާޅުވީ ފެނަކައަކީ ދެމެހެއްޓެނިވި ގޮތެއްގައި ރަނގަޅަށް ހިންގިދާނެ ކުންފުންޏެއް ނޫން ކަމަށާއި އެހެންވެ ސަރުކާރުން ނިންމާފައި ވަނީ އެ ކުންފުނި އުވާލުމަށް ކަމަށެވެ.