މިއަދު ފާހަގަކުރަމުން އަންނަ ދިރާގުގެ 38 ވަނަ އަހަރީ ދުވަހުގެ މުނާސަބަތުގައި ކަސްޓަމަރުންނަށް ހާއްސަ އޮފާތަކެއް ތައާރަފްކޮށްފި އެވެ.
މި އޮފާތައް އިއުލާނު ކުރީ ދިރާގު ހެޑް އޮފީހުގައި ބޭއްވި ހާއްސަ ނޫސްވެރިންގެ ބައްދަލުވުމެއްގަ އެވެ. އެ ބައްދަލުވުމުގައި އޮފާތައް އިއުލާނުކުރައްވަމުން ދިރާގުގެ ޑިރެކްޓާ، ބްރޭންޑް އެންޑް މާކެޓިން ކޮމިއުނިކޭޝަންސް މުހައްމަދު މިރްޝާން ހަސަން ވިދާޅުވީ މިއަދު އޮފާތައް އޮފާތައް ތައާރަފްކުރީ އަހަރީ ދުވަހު އެ ކުންފުނީގެ ކަސްޓަމަރުންގެ އަގު ވަޒަންކުރަން ކަމަށެވެ.
އެ ކުންފުނީގެ ކާމިޔާބީގެ ފަހަތުގައި، މުވައްޒަފުންނާއި ޕާޓްނަރުންނާ އެކު ތިބީ ކުންފުނީގެ ކަސްޓަމަރުން ކަމަށް ވިދާޅުވި އެވެ.
މިރްޝާން ވިދާޅުވީ ދިރާގުން ދިވެހި ރާއްޖެ ގުޅުވައިދިނުމުގެ ދަތުރުގައި މުހިންމު ކާމިޔާބީތައް ހޯދާފައިވާ ކަމަށެވެ. އެގޮތުން ރާއްޖޭގެ މީހުން ދިރިއުޅޭ ހުރިހާ ރަށަކަށް ފައިބާ ބްރޯޑްބޭންޑުގެ ހިދުމަތް ފޯރުކޮށްދިނުމާއި މުޅި ރާއްޖެއަށް ފޯރުކޮށްދޭ މޮބައިލް ކަވަރޭޖާއި 5ޖީ ހިދުމަތުގެ އިތުރުން ކްލައުޑް ސޮލިއުޝަންތަކާއި 'ޓިއާ 4 ސެޓިފައިޑް' ޑޭޓާ ސެންޓަރާއި އެކު އެކުންފުނިން ފޯރުކޮށްދޭ ހިދުމަތްތައް ފުޅާކުރަމުން ދާކަން ފާހަގަކުރެއްވި އެވެ.
"އަޅުގަނޑުމެން މިހާރު މި މަސައްކަތް ކުރަނީ ކަނެކްޓިވިޓީގެ އިތުރުން ޑިޖިޓަލް ސޮލިއުޝަންތަކެއް ފޯރުކޮށްދޭން. އޭއައިއާ އެކު ދުނިޔެ ބަދަލުވަމުން ދާއިރު، އެ ޓެކްނޮލަޖީއާ އެކު ދިވެހިންނާ ހަމައަށް އިތުރު ހިދުމަތްތަކާއި ސޮލިއިޝަންތައް ފޯރުކޮށްދިނުމުގެ މަސައްކަތްތައް މިހާރު ވެސް ދަނީ ކުރިއަށް،" މިރްޝާން ވިދާޅުވި އެވެ.
އެ ބައްދަލުވުމުގައި ދިރާގުގެ ސީއީއޯ ވަލްޑެމާ ފެރަޑާޒް ވިދާޅުވީ ދިރާގަކީ ރާއްޖެ މުވާސަލަތީ ގޮތުން ގުޅައިދިނުމުގައި މުހިންމު މަސައްކަތްތަކެއްކޮށް، ގިނަ ކާމިޔާބީތަކެއް ހޯދާފައިވާ ކުންފުންޏެއް ކަމަށެވެ.
އޭނާ ވިދާޅުވި ގޮތުގައި އެ ކުންފުނި ދެމިއޮންނާނީ ރާއްޖޭގެ ޑިޖިޓަލް އިކޮނޮމީ ބިނާކުރުމުގެ މުހިންމު ބައިވެރިއެއްގެ ގޮތުގަ އެވެ. އަދި ދުނިޔެ ޑިޖިޓަލްވަމުން ދާއިރު، ދިރާގުން މަސައްކަތް ކުރާނީ އޭއައި ފަދަ އީޖާދީ އާ ވަސީލަތްތަކާ އެކު މަސައްކަތްކޮށް، އާ ސޮލިއުޝަންތައް ދިވެހިންނަށް ފޯރުކޮށްދިނުމަށް ކަމަށް ވިދާޅުވި އެވެ.
މިއަދު އޮތް ނޫސްވެރިންގެ ބައްދަލުވުމުގައި، އަހަރީ ދުވަހާ ގުޅުވައި ގިނަ އޮފާތަކެއް ވަނީ ތައާރަފްކޮށްފަ އެވެ. އެގޮތުން އެކުންފުނީގެ ޕްރިޕެއިޑް އަދި ޕޯސްޓް ޕެއިޑް ކަސްޓަމަރުންނަށް މިއަދު 38 ޖީބީގެ ހިލޭ ޑޭޓާ ލިބޭ އޮފާއެއް ވަނީ ތައާރަފްކޮށްފަ އެވެ. އަދި ހަ ގައުމަކަށް ހިލޭ ގުޅޭނެ 38 އައިޑީޑީ މިނެޓު ލިބޭ އޮފާއެއް ވެސް ވަނީ ތައާރަފްކޮށްފަ އެވެ. އެ ދެ އޮފާ ވެސް މިއަދު 6 ޖަހަންދެން ދިރާގު އެޕުން އެކްޓިވޭޓްކުރެވޭނެ އެވެ.
އޭގެ އިތުރުން ދިރާގުން ވަނީ ހޯމް ފައިބާ ބްރޯޑްބޭންޑް ކަސްޓަމަރުންނަށް ހިލޭ ރައުޓަރު އަޕްގްރޭޑު ކުރެވޭނެ އޮފާއެއް ވެސް އިއުލާނުކޮށްފަ އެވެ.
މިއީ 2021 ވަނަ އަހަރުގެ ކުރިން ނަގާފައިވާ ރައުޓަރުތަކަށް ހުޅުވާލާފައިވާ ފުރުސަތެކެވެ. މި މަހުގެ ނިޔަލަށް މި އޮފާގެ ދަށުން ރައުޓަރު އަޕްގްރޭޑު ކުރުމުގެ ފުރުސަތު ހުޅުވާލާފައި ވާއިރު، ދިރާގު އެޕް މެދުވެރިކޮށް މި އޮފާއަށް އެލިޖަބަލްތޯ ބެލޭނެ އެވެ.
ދިރާގު އަހަރީ ދުވަހާ ގުޅުވައި ދިރާގުގެ ލޯޔަލްޓީ ޕްރޮގްރާމް 'އެލީޓް ކްލަބް'ގެ މެމްބަރުންނަށް 38 ދުވަހުގެ މުއްދަތަށް ދިރާގު އެޕް މެދުވެރިކޮށް ކޮންމެ ދުވަހަކު ވެސް އެލީޓް ކްލަބް ޕަޓްނަރުންގެ ޑިސްކައުންޓު ވައުޗަރު ލިބޭނެ އެވެ. އޭގެ ތެރޭގައި ޑައިނިން، ޝޮޕިން އަދި ގްރޮސަރީސް ގަތުމަށް ބޭނުން ކުރެވޭނެ ވައުޗަރުތައް ހިމެނެ އެވެ. މި ވައުޗަރުތައް ދިރާގު އެޕް މެދުވެރިކޮށް ރިޑީމް ކުރެވޭނެ އެވެ.
އޭގެ އިތުރުން ދިރާގު ޕޭ ކަސްޓަމަރުންނަށް ހާއްސަކޮށް ހޮނިިހިރު ދުވަހު މެންދުރު ފަހު 3އިން ފެށިގެން ގޯސްޓް ކިޗަން އާއި މޫ ކިޗަން އިން ހޮވާލެވިފައިވާ ޕްރޮޑަކްޓުތަކުން 80 ޕަސެންޓު ޑިސްކައުންޓު ލިބޭނެ އެވެ. މި ޑިސްކައުންޓް ލިބޭނީ ފުޑީޒް އެޕް މެދުވެރިކޮށް އޯޑަރުކޮށް ދިރާގު ޕޭއިން ފައިސާ ދައްކާ ކަސްޓަމަރުންނަށެވެ.
މިއަދު އޮތް ނޫސްވެރިންގެ ބައްދަލުވުމުގައި ދިރާގުން ވަނީ އެ ކުންފުނީގެ އާ ޕްރޮޑަކްޓު، އޭއައި އެހީތެރިޔާ 'އައިވް' ތައާރަފްކޮށްފަ އެވެ. އައިވް އަކީ ކަސްޓަމަރުންގެ ކޯލްތައް މެނޭޖުކޮށްދޭ އޭއައި އެސިސްޓަންޓެކެވެ. މިއީ ކަސްޓަމަރުންނަށް ފޯނު ނުނެގޭ ވަގުތުތަކުގައި އަންނަ ކޯލުތަކަށް ޖަވާބު ދީ، ގުޅާ ފަރާތްތަކުން ދޭ މެސެޖުތައް ރައްދުކޮށްދީ، އެ ފަރާތްތަކުގެ ރިކުއެސްޓާއި އެއްގޮތަށް މީޓިންތައް ވެސް ސެޓުކޮށް، ފޯނުގެ ކަލަންޑަރަށް ޝެޑިއުލްކޮށްދިނުމުގެ ގާބިލުކަން ލިބިފައިވާ އެސިސްޓަންޓެކެވެ. 'އައިވް'ގެ ހިދުމަތް ލިބޭނެ ސަބްސްކްރައިބް ކޮށްގެނެވެ.
ދިރާގު ކަސްޓަމަރުން މި ހިދުމަތް ތަޖުރިބާކުރުމުގެ ފުރުސަތު ދިނުމުގެ ގޮތުން މި ހިދުމަތް އެއް މަސް ދުވަހަށް ހިލޭ ބޭނުން ކުރުމުގެ ފުރުސަތު ވަނީ ހުޅުވާލައިފަ އެވެ. މި ހިދުމަތަށް ދިރާގު އެޕް މެދުވެރިކޮށް މިހާރު ރަޖިސްޓްރީ ކުރެވޭނެ އެވެ.