ބޭންކް އޮފް މޯލްޑިވްސް (ބީއެމްއެލް) ގެ އޭޓީއެމް މެދުވެރިކޮށް މިއަދުން ފެށިގެން ކޮންމެ މަހަކު ވެސް ނަގުދު ފައިސާގެ ގޮތުގައި ގިނަވެގެން ދެން ނެގޭނީ 3،500 ޑޮލަރާ ހަމައަށް ކަމަށް އެ ބޭންކުން ކަނަޑައަޅައިފި އެވެ.
މިއީ ބީއެމްއެލްގެ އޭޓީއެމުން ކޮންމެ މަހަކު ޑޮލަރު ނެގޭ އަދަދު ލިމިޓްކުރި ފުރަަތަމަ ފަހަރެވެ.
ބީއެމްއެލް އިން މީޑިއާއާ ހިއްސާކުރި މައުލޫމާތުތަކުގައިވާ ގޮތުން، އެ ބަދަލު ގެނައި ނަމަވެސް އޭޓީއެމް ކާޑަކުން ކޮންމެ ދުވަހަކު މީގެ ކުރިއެކޭ ވެސް އެއްގޮތަށް 1،600 ޑޮލަރު ނެގޭނެ އެވެ.
ބީއެމްއެެލް އިން ބުނި ގޮތުގައި އެ ބަދަލު ގެނައީ ރާއްޖޭގައި ޒަމާނީ 'ޑިޖިޓަލް-ފަސްޓް' ބޭންކިން ހިދުމަތް ފުޅާކުރުމަށް ކުރުމަށް ކުރާ މަސައްކަތުގެ ދަށުންނެވެ.
"މި ނިންމުމަކީ ނަގުދު ފައިސާއަށް ބަރޯސާވާ މިންވަރު ކުޑަކޮށް، އަވަސް، ރައްކާތެރި އަދި ލުއިފަސޭހަ ޑިޖިޓަލް މާލީނިޒާމެއް ކުރިއެރުވުމަށް ބީއެމްއެލް އިން ގެންގުޅޭ ދުރުރާސްތާގެ ސިޔާސަތުގެ ދަށުން ނިންމާފައިވާ ނިންމުމެކެވެ،" ބީއެމްއެލް އިން ލިޔުމުން މީޑިއާއާ ހިއްސާކުރި ލިޔުމުގައި ވެ އެވެ.
ބީއެމްއެލް އިން ބުނީ ނަގުދު ފައިސާ ބޭނުންކުރަން ނުޖެހި، ދުވަހުން ދުވަހަށް ބޭނުންވާ ބޭންކިންގެ ހިދުމަތްތައް ފަސޭހައިން ހޯދޭނެ ޑިޖިޓަލް ވަސީލަތްތައް ގާއިމް ކުރުމަށްޓަކައި ބޮޑެތި އިންވެސްޓްމަންޓުތަކެއް އެ ބޭންކުން ކޮށްފައިވާ ކަމަށެވެ. އޭގެ ތެރޭގައި މޮބައިލް ބޭންކިން އާއި އިންޓަނެޓް ބޭންކިން މެދުވެރިކޮށް ބިލްތަކަށް ކޮންމެ ތަނެއްގައި ހުރެފައި ވެސް ވަގުތުން ފައިސާ ޓްރާންސްފާ ކުރުމާއި އެކައުންޓުގެ މުއާމަލާތްތައް ފަސޭހައިން ކުރެވޭކަން ބީއެމްއެލް އިން ފާހަގަކުރި އެވެ.
"މީގެ އިތުރުން، ރާއްޖެ އާއި ރާއްޖެއިން ބޭރުގެ ވިޔަފާރިތަކަށް ކާޑު މެދުވެރިކޮށް އަދި ކޮންޓެކްޓްލެސްކޮށް ފައިސާ ދެއްކުމާއި އެކައުންޓްތަކަށް ވަގުތުން ވަގުތަށް ފައިސާ ފޮނުވުމުގެ ހިދުމަތް ވެސް ކަސްޓަމަރުންނަށް ފަސޭހަކަމާއެކު ލިބެ އެވެ،" ބީއެމްއެލް އިން ބުންޏެވެ.