ޓޫރިޒަމް ދާއިރާއަށް މިދިޔަ 54 އަހަރު ގެނައި އެސެޓާއި އީގަލް ހިލްސް އިން ރަސްމާލޭގައި ހިންގާ ޕްރޮޖެކްޓާ އެއްވަރުވާނެ ކަމަށާއި އެ ޕްރޮޖެކްޓާ އެކު ރާއްޖެ 2040 ވަނަ ތަރައްގީވެފައިވާ ގައުމަކަށް ހެދޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
މިރޭ ބޭއްވި "އަހާ" ފޯރަމްގައި ވާހަކަ ދައްކަވަމުން ސައީދު ވިދާޅުވީ، ރާއްޖޭގެ އިގްތިސާދު ޑައިވާސިފައި ކުރެވޭނީ، ރާއްޖޭގެ ސިފަތަކާ ރައްޓެހި ގޮތަކަށް ކަމަށާއި އީގަލް ހިލްސް އިން ހިންގާ އެ ބިޔަ ޕްރޮޖެކްޓް ވެސް ކުރިއަށްދާނީ އެ އުސޫލުން ކަމަށެވެ.
"އީގަލް ހިލްސް ޕްރޮޖެކްޓުން އެކަނި އެއް މިލިއަން ޓޫރިސްޓުން އެބަ އިތުރުވޭ. އެއާޕޯޓު ތަރައްގީ ކުރީ 4 ނުވަތަ 5 މިލިއަން އެރައިވަލް ނިއަ ޓާމްގައި އެޗީވްކުރުމަށްޓަކައި،" އޭނާ ވިދާޅުވި އެވެ.
މިހާރު ޓޫރިޒަމް ތަރައްގީ ކުރާ އުސޫލުން އެކަން ކޮށްގެން 2040 ވަނަ އަހަރު ރާއްޖެ ތަރައްގީވެފައި އޮތް ގައުމަކަށް ނުހެދޭނެ ކަމަށާއި ހަރަދުތައް ދެކޮޅު ޖައްސާ އާމްދަނީ އިތުރުކޮށް ގައުމު ތަރައްގީ ކުރުމަށް ބިޔަ ޕްރޮޖެކްޓްތައް ރާއްޖެއަށް އަންނަން ޖެހޭ ކަމަށް އޭނާ ވިދާޅުވި އެވެ.
ރާއްޖޭގައި ރިއަލް އެސްޓޭޓް ގިނަ ޕްރޮޖެކްޓްތަކެއް މިހާރު ވެސް ހިންގަމުން އަންނަ އިރު ގައުމެއް ތަރައްގީ ކުރުމަށް އެއް އިންޑަސްޓްރީއަށް ބަރޯސާވުމަކީ ވަރަށް ބޮޑު ނުރައްކަލެއް ކަމަށެވެ. އޭނާ ވިދާޅުވީ، ރާއްޖޭގެ ޓޫރިޒަމް ދާއިރާއަށް 54 އަހަރުވެގެން ދިޔަ އިރު، ރާއްޖޭގައި 170 ރިސޯޓު ހުރި އިރު އެ ދާއިރާއިން ރާއްޖޭގެ އިގްތިސާދަށް ސީދާ ގޮތުން ވަންނަނީ 1.7 ބިލިއަން ޑޮލަރު ކަމަށެވެ. އަދި މުޅި އިގްތިސާދު ގާތްގަނޑަކަށް އެނބުރެނީ ޓޫރިޒަމް ދާއިރާގެ ތެރެއިން ކަމަށް އޭނާ ވިދާޅުވި އެވެ.
"އެހެން އެއްވެސް ކަމެއް ރާއްޖޭގެ އިގްތިސާދަށް ހައި އިމްޕެކްޓެއް އަންނާނެ ކަމެއް މިހާހިސާބަކަށް ކުރެވިފައެއް ނެތް. މިދެންނެވި ޓޫރިޒަމް އެސެޓް ވެލިއު އެއީ މާ ހައި ބޮޑު އިންވެސްޓްމެންޓެއް ނޫން. އެހެން ގައުމުތަކަށް ބަލާ އިރު. އެހެން ނަމަވެސް އަޅުގަނޑުމެންގެ ސައިޒަށް ބަލާ އިރު ވަރަށް ބޮޑެތި އިންވެސްޓްމެންޓްތައް އެއީ،" އޭނާ ވިދާޅުވި އެވެ.
އޭނާ ވިދާޅުވީ، 99 އަހަރަށް ތަންތަން ރާއްޖޭގައި ކުއްޔަށް ދޭން ފަށާފައިވަނީ 2013 އިން ފެށިގެން 2018 އަށް ކަމަށާއި މިހާރު ވެސް ރާއްޖޭގެ 54 ވަރަކަށް ރިސޯޓު 99 އަހަރަށް ކުއްޔަށް ދީފައި އެބައޮތް ކަމަށާއި މިއީ އަލަށް ކުރާ ކަމެއް ނޫން ކަމަށެވެ.
"އޭރުގެ ސަރުކާރުގެ [ރައީސް ޔާމީން] އެއް ބިލިއަން ޑޮލަރުގެ އިންވެސްޓްމެންޓެއް ކޮށް ތަނެއް ހިއްކައިފިއްޔާ އޭގެ 30 ޕަސެންޓަކީ ތާއަބަދަށް ފްރީހޯލްޑަށް [ވަކި މުއްދަތެއް ނެތް ގޮތަށް ހިލޭ] ދޫކޮށްލާ ގޮތަށް ވެސް ނިންމުނު. އޭރުގެ ރައީސް އެކަން ޖަސްޓިފައިކުރަން ވަރަށް ގިނަ ވާހަކަފުޅުތައް ދެއްކެވި،" އޭނާ ވިދާޅުވި އެވެ.
އޭނާ ވިދާޅުވީ، ދެން އައި ސަރުކާރުން އެ ގާނޫނަށް ބަދަލު ގެނައީ، 99 އަހަރަށް ރާއްޖޭގެ ރަށްތައް ކުއްޔަށް ހިފޭގޮތަށް ކަމަށެވެ. އޭނާ ވިދާޅުވީ، ރާއްޖޭގެ އިގްތިސާދުގެ ސިފައަކީ، ވަކި ވަކިން ރަށްތައް ނުވަތަ ރިސޯޓުތައް ތަރައްގީކޮށް އާމްދަނީ ހޯދުން ކަމަށާއި ރާއްޖެއަށް ވަންނަ އާމްދަނީ އާއި ކުރާ ހަރަދަށް ބަލާ އިރު އާދަޔާ ހިލާފު ބާރު ސްޕީޑެއް ނުގެނެސް، ކައިރި އެހެން ގައުމުތަކާ ވާދައެއް ނުކުރެވޭނެ ކަމަށެވެ. އަދި ރާއްޖޭގެ ހަރަދުތައް ވެސް ހަމަޖެއްސުމަށް އީގަލް ހިލްސް ފަދަ ޕްރޮޖެކްޓެއް ބޭނުންވާ ކަމަށް އޭނާ ވިދާޅުވި އެވެ.
"މޯލްޑިވްސް ވޯޓާފްރޮންޓް އެންޑް މެރީނާ" ގެ ނަމުގައި ރަސްމާލޭގައި ބޮޑު މަޝްރޫއެއް ހިންގަން އީގަލް ހިލްސްއާ އެކު ސަރުކާރުން ކޮމާޝަލް ޓާމްސް އެއްބަސްވުމެއްގައި ސޮއިކޮށްފައިވަނީ މިދިޔަ މަހުގެ ފަހުކޮޅު އެވެ. އެ މަޝްރޫއު ހިންގަން ރަސްމާލޭގެ 500 ހެކްޓަރު އެ ކުންފުންޏަށް ދޫކުރަން ސަރުކާރުން ނިންމާފައި ވާއިރު އެ އެއްބަސްވުމާ މެދު ރާއްޖޭގެ ސިޔާސީ ބައެއް ލީޑަރުން ގެންދަވަނީ ކަންބޮޑުވުން ފާޅުކުރައްވަމުންނެވެ.
(ޔޫއޭއީ) ގެ އެންމެ މަޝްހޫރު އެއް ކުންފުނި ކަމަށްވާ އީގަލް ހިލްސްއިން ފަށާ އެ ޕްރޮޖެކްޓުގެ އަގު 20 ބިލިއަން ޑޮލަރަށް އަރަ އެވެ.
ސައީދު ވިދާޅުވީ، އީގަލް ހިލްސްގެ ޕްރޮޖެކްޓާ ގުޅޭ ގޮތުން އިދިކޮޅު ފަރާތްތަކުން ދައްކާ ވާހަކަތަކަކީ ބިރުވެރިކަން އުފައްދާ ސިޔާސީ ގޮތުން ދައްކާ ވާހަކަ ކަމަށާއި މި ޕްރޮޖެކްޓް ކާމިޔާބު ވެއްޖެ ނަމަ، އިދިކޮޅު ފަރާތްތަކުގެ ސިޔާސީ ހަޔާތައް ހިޔަނި އެޅޭނެ ކަމަށެވެ.