ރަސްމާލޭގައި ޔޫއޭއީގެ އީގަލް ހިލްސްއިން ހިނގަން ނިންމާފައިވާ މަޝްރޫއު އައްޑޫއަށް ބަދަލުކުރުމާ މެދު މަޝްވަރާ ކުރަން އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދު އެ ޕާޓީގެ ކޮންގްރެސްގައި އެދިވަޑައިގެންފި އެވެ.
ޓޫރިޒަމާއި ރިއަލްއެސްޓޭޓް ވިޔަފާރި ހިމެނޭހެން 500 ހެކްޓަރުގެ ބިމެއްގައި ބޮޑު މަޝްރޫއެއް ހިންގަން އީގަލް ހިލްސްއާއެކު ސަރުކާރުން ވަނީ ކޮމާޝަލް ޓާމްސް އެގްރިމެންޓެއްގައި ސޮއިކޮށްފަ އެވެ.
އެ މަޝްރޫއަކީ އުސޫލެއްގެ ގޮތުން ގޯސް މަޝްރޫއުއެއް ނޫން ކަމަށް ވިދާޅުވެފައިވާ ނަޝީދު ވަނީ އެމްޑީޕީން ރެއިން ފެށިގެން މާދަމާ ރޭގެ ނިޔަލަށް ކުރިއަށް ގެންދާ އިންވެސްޓްމެންޓް ފޯރަމްގައި އައްޑޫގެ މޭޔަރު އަލީ ނިޒާރުއާ މަޝްރޫއުއާ ގުޅޭ ގޮތުން މިއަދު ސުވާލު ކުރައްވައިފަ އެވެ.
މޭޔަރު ނިޒާރުގެ އަރިހުން ނަޝީދު އެއްސެވީ އީގަލް ހިލްސްއިން އައްޑޫއަށް މަޝްރޫއު ގެންދަން އެއްބަސްވެއްޖެ ނަމަ ސިޓީ ކައުންސިލާއި ރައްޔިތުން ދެކޭނީ ކިހިނެއްތޯ އެވެ.
އެ ސުވާލަށް ޖަވާބު ދެއްވަމުން ނިޒާރު ވިދާޅުވީ މިހާރު އެ މަޝްރޫއު އޮތް ގޮތަށް އައްޑޫއަށް ގެންދަން ބޭނުން ނުވާ ކަމަށާއި ނަމަވެސް ދެފުށް ފެންނަ ގޮތަށް ރައްޔިތުންނަށް ވާނުވާ އެނގިގެން އަންނަ ކަމަށްވާ ނަމަ މަރުހަބާ ކިޔާނެ ކަމަށެވެ.
ދެން ނަޝީދު އެއްސެވީ އެކަމަށް އެމްޑީޕީން "ލޮބީކުރާނެތޯ" އެވެ. ނިޒާރު ވިދާޅުވީ ކައުންސިލުން އެކަމަށް ހުރަހެއް ނާޅާނެ ކަމަށެވެ.
އެއާ އެކު ނަޝީދު ވިދާޅުވީ "އިރާދަކުރެއްވިއްޔާ އެ މީހުން އަންނާނެ" ކަމަށެވެ.
އިދިކޮޅު ސިޔާސީ ބައެއް ލީޑަރުން އެ މަޝްރޫއާ ދެކޮޅު ހައްދަވައި އެކިއެކި ތުހުމަތުތައް ކުރައްވަމުން ގެންދަވަނިކޮށް އެކްސްގައި ކުރެއްވި ޕޯސްޓެއްގައި ނަޝީދު ވަނީ އިގްތިސާދީ އެ މަޝްރޫއުން ރާއްޖެ ހުޅުވާލުން މައްސަލައެއް ނެތް ކަމަށް ވިދާޅުވެފަ އެވެ.
ބޭރު މީހުންނަށް ރާއްޖޭގައި ދިރިއުޅެވޭ ގޮތަށް "ރެސިޑެންސީ ޕްރޮގްރާމަކަށް" ހުޅުވާލުމަކީ އުސޫލެއްގެ ގޮތުން ރަނގަޅު ކަމެއް ކަމަށް ނަޝީދު ކުރިން ވިދާޅުވެފައިވެ އެވެ. އެކަމުގައި އޮތް ހަަމައެކަނި މައްސަލައަކީ މާލެ ސަރަހައްދުގައި އެ މަޝްރޫއު ހިންގުން ކަމަށް ވެސް ވިދާޅުވި އެވެ.
"އީގަލް ހިލްސް ކޮންޓްރެކްޓެއް އަދި ނުފެނޭ، ހާމައެއް ނުކުރޭ. މިހާތަނަށް އިވުނު ވާހަކަތަކުން އަަޅުގަނޑަށް އޮތީ ދެ މައްސަލައެއް. 1- އެޑްވާންސް ފައިސާ ނުލިބުން. 2-މާލެ ސަރަހައްދުގައި އެތަން ހަދާކަން،" ނަޝީދު ވިދާޅުވި އެވެ.
ރަސްމާލެ މަޝްރޫއު އައްޑޫއަށް ގެންދަން ނަޝީދު ހިޔާލު ދެއްވިއިރު، ކުރީގެ ރައީސް އިބްރާހިމް މުހައްމަދު ސޯލިހު ވަނީ އެމްޑީޕީ ވެރިކަމެއްގައި އެ މަޝްރޫއުގެ އެއްބަސްވުމަށް ޖާގަދީގެން ނުވާނެ ކަމަށް ރޭ ވިދާޅުވެފަ އެވެ.
ސަރުކާރުން ތަކުރާރުކޮށް ބުނަމުން އަންނަނީ އީގަލް ހިލްސްއާ އެކު މަސައްކަތް ކުރަނީ ގާނޫނީ އިމުގެ ތެރެއިން ކަމަށާއި އުސޫލުން ބޭރުން އެއްވެސް ކަމެއް ނުކުރާނެ ކަމަށެވެ.