ބޭރު މީހުންނަށް ރާއްޖޭގައި ދިރިއުޅެވޭ ގޮތަށް "ރެސިޑެންސީ ޕްރޮގްރާމަކަށް" ހުޅުވާލުމަކީ އުސޫލެއްގެ ގޮތުން ރަނގަޅު ކަމެއް ކަމަށާއި ސަރުކާރަށް އެންމެ ރަނގަޅު ގޮތަކަށް ވާނީ އެއްބަސްވުން އަވަހަށް މަޖިލީހަށް ފޮނުވުން ކަމަށް ކުރީގެ ރައީސް އަދި އިދިކޮޅު އެމްޑީޕީގެ ޗެއާޕާސަން މުހައްމަދު ނަޝީދު މިއަދު ވިދާޅުވެއްޖެ އެވެ. 

ޓޫރިޒަމާއި ރިއަލްއެސްޓޭޓް ވިޔަފާރި ހިމެނޭހެން 500 ހެކްޓަރުގެ ބިމެއްގައި ބޮޑު މަޝްރޫއެއް ހިންގަން ޔުނައިޓެޑް އަރަބް އެމިރޭޓްސް (ޔޫއޭއީ)ގެ އީގަލް ހިލްސްއާ އެކު ސަރުކާރުން ވަނީ ކޮމާޝަލް ޓާމްސް އެގްރިމެންޓެއްގައި ސޮއިކޮށްފަ އެވެ. އެ މަޝްރޫއަށް ތާއީދު ކުރައްވައި މީގެ ކުރިން ވެސް އެމަނިކުފާނު ވަނީ ވާހަކަ ދައްކަވައިފަ އެވެ. 

އޭރު ވިދާޅުވީ އެކަމުގައި އޮތް ހަަމައެކަނި މައްސަލައަކީ މާލެ ސަރަހައްދުގައި އެ މަޝްރޫއު ހިންގުން ކަމަށެވެ.

އިދިކޮޅު ސިޔާސީ ބައެއް ލީޑަރުން އެ މަޝްރޫއާ ދެކޮޅު ހައްދަވައި އެކިއެކި ތުހުމަތުތައް ކުރައްވަމުން ގެންދަވަނިކޮށް އެކްސްގައި މިއަދު ކުރެއްވި ޕޯސްޓެއްގައި ނަޝީދު އަނެއްކާ ވެސް ވަނީ އިގްތިސާދީ އެ މަޝްރޫއުން ރާއްޖެ ހުޅުވާލުން މައްސަލައެއް ނެތް ކަމަށް ވިދާޅުވެފަ އެވެ.

ނަޝީދު ވިދާޅުވި ގޮތުގައި އެ މަޝްރޫއާ ގުޅޭ ގޮތުން މިހާތަނަށް އިވިވަޑައިގަތް ވާހަކަތަކުން އޮތީ ދެ މައްސަލައެކެވެ.

"އީގަލް ހިލްސް ކޮންޓްރެކްޓެއް އަދި ނުފެނޭ، ހާމައެއް ނުކުރޭ. މިހާތަނަށް އިވުނު ވާހަކަތަކުން އަަޅުގަނޑަށް އޮތީ ދެ މައްސަލައެއް. 1- އެޑްވާންސް ފައިސާ ނުލިބުން. 2-މާލެ ސަރަހައްދުގައި އެތަން ހަދާކަން،" ނަޝީދު ވިދާޅުވި އެވެ.

އެކަމުގައި ސަރުކާރަށް އެންމެ ރަނގަޅު ގޮތަކަށް ވާނީ އެ ކޮންޓްރެކްޓް އަވަހަށް ރައްޔިތުންގެ މަޖިލީހަށް ފޮނުވުން ކަމަށް އެމަނިކުފާނު ވިދާޅުވި އެވެ. 

"[އަދި] މި ސަރުކާރުގެ އަޣުލަބިއްޔަތުން މި މަޝްރޫއަށް ބޭނުންވާ ގާނޫނީ އޮނިގަނޑު ފާސްކުރުން،" ނަޝީދު ވިދާޅުވި އެވެ. 

އެމަނިކުފާނު މިގޮތަށް ވާހަކަ ދައްކަވާފައި މިވަނީ އެ މަޝްރޫއު ކުރިއަަށް ގެންދާނީ އަލަށް ހަދާ ރިއަލްއެސްޓޭޓް ގާނޫނެއްގެ ދަށުން ކަމަށް އެޓާނީ ޖެނެރަލް އަހުމަދު އުޝާމް ވިދާޅުވެފައި ވަނިކޮށެވެ. 

ރައްޔިތުންގެ މަޖިލީހުގެ ސުޕަ މެޖޯރިޓީ އޮތީ ވެރިކަންކުރާ ޕީއެންސީއަށް ކަމަށް ވާތީ އެއީ ފަސޭހަ ކަމަކަށް ވާނެ އެވެ.

"މޯލްޑިވްސް ވޯޓާފްރޮންޓް އެންޑް މެރީނާ ޕްރޮޖެކްޓް"ގެ ނަމުގައި ރަސްމާލޭގައި ހިންގަން އުޅޭ މަޝްރޫއު ރަނގަޅު ކަަމަށް މިދިޔަ ބުދަދުވަހު އެމްޑީޕީގެ އޮފީހުގައި ބޭއްވި މީޑިއާބްރީފިންއެއް ގައި ވެސް ނަޝީދު ވިދާޅުވި އެވެ.

ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެމަނިިކުފާނު އެ ދުވަހު ވިދާޅުވީ ރާއްޖޭގައި ހަމަ އެފަދަ މަޝްރޫއެއް ހިންގަން އީގަލް ހިލްސް އިން މަޝްވަރާކުރި ކަމަށާއި އޭރު ވެސް އެދިވަޑައިގެންނެވީ މާލެ ސަރަހައްދު ނޫން ތަނެެއްގައި މަޝްރޫއު ހިންގަން ކަމަށެވެ. މާލެ ސަރަހައްދުގައި އެފަދަ މަޝްރޫއުތައް ހިންގީމާ މި ސަރަހައްދަށް މީހުން ތޮއްޖެހި ރަށްތައް ފަޅުވަމުންދާނެ ކަަމަށް ވެސް އެ މަނިކުފާނު ވިދާޅުވި އެވެ.

ނަޝީދު އެ ޖަވާބު ދެއްވީ އީގަލް ހިލްސްއާ އެކު ސަރުކާރުން ސޮއިކުރި އެއްބަސްވުމުގެ "ޓާމްސް އެންޑް ކޮންޑިޝަންސް އެނގިވަޑައިގެން ހުންނަވައިތޯ" ނޫސްވެރިއަކު ސުވާލުކުރުމުންނެވެ.

"އޭގެ ތަފްސީލުތައް އަޅުގަނޑުމެންނަށް އެނގެން ޖެހޭނެ. އެކަން ވާނެ ގޮތާއި ޓާމްސް އެންޑް ކޮންޑިޝަންސް، އުސޫލެއްގެ ގޮތުން ފޮރިން ޑައިރެކްޓް އިންވެސްޓްމެންޓާއި އަދި އުސޫލެއްގެ ގޮތުން ޕްރައިވެޓައިޒޭޝަނާއި އުސޫލެއްގެ ގޮތުން އެސެޓް ސޭލްސްއާ މި ހުންނަނީ އަޅުގަނޑު ދެންނެވި ގޮތުގައި އަޅުގަނޑު ގަބޫލުކުރާ އުސޫލުތަކޭ،" އެ ސުވާލަށް ޖަވާބު ދެއްވަމުން ނަޝީދު ވިދާޅުވި އެވެ.

އެ ޖަވާބަށް ފަހު، ވެސް ނޫސްވެރިޔާ ހަަމަ އެ ސުވާލު ތަކުރާރު ކުރުމުން ނަޝީދު ވިދާޅުވީ ޓާމްސް އެންޑް ކޮންޑިޝަންސް ރަނގަޅުވާން ޖެހޭނެ ކަމަށާއި އެކަމަކު އުސޫލެއްގެ ގޮތުން އެ މަޝްރޫއު ރަނގަޅޭ ވިދާޅުވާން ޓާމްސް އެންޑް ކޮންޑިޝަންސް ކޮންމެހެން އެނގެން ނުޖެހޭ ކަމަށެވެ. 

އީގަލް ހިލްސް މަޝްރޫއު އުސޫލެއްގެ ގޮތުން ރަނގަޅު، މައްސަލައަކީ މާލެ ސަރަހައްދުގައި ހިންގާތީ: ނަޝީދު
Mihaaru
އީގަލް ހިލްސް މަޝްރޫއު އުސޫލެއްގެ ގޮތުން ރަނގަޅު، މައްސަލައަކީ މާލެ ސަރަހައްދުގައި ހިންގާތީ: ނަޝީދު
ޔުނައިޓެޑް އަރަބް އަރަބް އެމިރޭޓްސްގެ އީގަލް ހިލްސްއާ އެކު ސޮއިކުރި "މޯލްޑިވްސް ވޯޓާފްރޮންޓް އެންޑް މެރީނާ" މަޝްރޫއަކީ އުސޫލެއްގެ ގޮތުން ރަނގަޅު ޕްރޮޖެކްޓެއް ކަމަށާއި އެކަމަކު މައްސަލައަކީ އެހާ ބޮޑު މަޝްރޫއެއް މާލެ ސަރަހައްދުގައި ހިންގާތީ ކަމަށް ކުރީގެ ރައީސް އަދި އެމްޑީޕީގެ ޗެއާޕާސަން މުހައްމަދު ނަ

"އަޅުގަނޑު މިއީ ފޮރިން ޑައިރެކްޓް އިންވެސްޓްމެންޓަށް ތާއީދުކުރާ މީހެއް. އަޅުގަނޑު ދެކޭ ގޮތުގައި [އެކަމުން] ރާއްޖެއަށް، ރާއްޖޭގެ ރައްޔިތުންނަށް ތަނަވަސްކަން އިތުރުވެގެންދާނީ. ރައްޔިތުން މި ބޭނުންވަނީ ތަނަވަސްކަން. ރައްޔިތުން މި ބޭނުންވަނީ އުފާވެރިކަން، ރައްޔިތުން ބޭނުންވަނީ ހާސްކަމެއް ނެތުން، ބޯހިޔާވަހިކަމެއް ލިބުން، ވިޔަފާރީގެ ފުރުސަތެއް އޮތުން،" ނަޝީދު ވިދާޅުވި އެވެ.

އެ މަނިކުފާނު ވިދާޅުވި ގޮތުގައި ރާއްޖޭގެ އިގުތިސާދު ކުރިއެރުވޭނީ ބޭރުގެ އިންވެސްޓްމެންޓްތައް ރާއްޖެއަށް ގެނެސްގެންނެވެ. ގެންނަ އިންވެސްޓްމެންޓްތަކަކީ ބޮޑެތި އިންވެސްޓްމެންޓްތަކަށް ވާން ޖެހޭނެ ކަމަށް ވެސް ވިދާޅުވި އެވެ. 

އިދިކޮޅު މައި ޕާޓީގެ އެންމެ އިސް ލީޑަރުގެ ހައިސިއްޔަތުން އެ މަޝްރޫއަށް ތާއީދުކުރައްވަންތޯ ނޫސްވެރިއާ ސުވާލުކުރުމުން ނަޝީދު ވިދާޅުވީ އެމްޑީޕީއަކީ ސެންޓާ ރައިޓް ޕާޓީއެއް ކަމަށާއި ޕްރައިވެޓައިޒޭޝަނާއި ބޭރުގެ އިންވެސްޓްމެންޓް ގެނައުމަށް އެ ޕާޓީން ތާއީދުކުރާ ކަމަށެވެ.

އެކަމަކު ޕާޓީއެއްގެ ހައިސިއްޔަތުން އެމްޑީޕީގެ ސިޔާސަތު އެ މަނިކުފާނަށް ކަނޑަނޭޅުއްވޭނެ ކަމަށް ވެސް ނަޝީދު ވިދާޅުވި އެވެ. އެމްޑީޕީގެ ސަރުކާރެއްގައި އެ މަޝްރޫއާ މެދު އަމަލު ކުރާނެ ގޮތް ކަނޑައަޅާނީ ރިޔާސީ އިންތިހާބުގެ މެނިފެސްޓޯގައި ކަމަށް ވެސް ނަޝީދު ވިދާޅުވި އެވެ.