ސިއްރު ކަންތައްތަކެއްގެ ތެރެއިން އުފަންކުރާ އެއްބަސްވުމަކަށް އާނއެކޭ ބުނެގެން ނުވާނެ ކަމަށާއި އެމްޑީޕީ ސަރުކާރެއްގައި ވެސް އެފަދަ އެއްބަސްވުމަކަށް އަމަލު ކޮށްގެން ނުވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) މިރޭ ވިދާޅުވެއްޖެ އެވެ.
އިބޫ މިހެން ވިދާޅުވީ އަބޫދާބީގެ އީގަލް ހިލްސް ކުންފުނިން ރަސްމާލޭގައި ތަރައްގީކުރަން ނިންމާފައިވާ މަޝްރޫއުއާ ގޮތުން، މިރޭ އޮތް އެމްޑީޕީ ކޮންގްރެސްގައި ވާހަކަ ދައްކަވަމުންނެވެ.
އެމްޑީޕީގެ ކޮންގްރެސް ފެށުމަށް މިރޭ ބޭއްވި ޖަލްސާގައި ވާހަކަ ދައްކަވަމުން އިބޫ ވިދާޅުވީ ރަސްމާލެ ތަރައްގީ ކުރަން ފުށިދިއްގަރުފަޅު ހިއްކަނީ ރައްޔިތުންގެ ފައިސާއިން ގާތްގަނޑަކަށް 700 މިލިއަން ޑޮލަރު ހަރަދުކޮށްގެން ކަމަށާއި އޭގެ ތެރެއިން 500 ހެކްޓަރުގެ ބިމެއް ހިލޭ ބޭރު ބަޔަކަށްދިނުމަކީ ސުވާލު އުފެދޭ ކަމެއް ކަމަށެވެ.
"...ސުވާލަކީ ރައްޔިތުންނަށް މީގެން ވަނީ ކޮން ފައިދާއެއްތޯ؟ ސަރުކާރަށް މީގެން ލިބެނީ ކޮން އެއްޗެއްތޯ؟،" ކުރީގެ ރައީސް އެއްސެވި އެވެ.
އިބޫ ވިދާޅުވި ގޮތުގައި އެމްޑީޕީން ފޮރިން އިންވެސްޓްމެންޓްތަކާ ދެކޮޅު ހަދަނީ ނޫން ކަމަށާއި ރެސިޑެންސް ވިސާ ވެސް އުސޫލުތަކެއްގެ މަތިން ދިނުމަކީ ނުރުހޭ ކަމެއް ނޫން ކަމަށެވެ. ނަމަވެސް، މައްސަލައަކީ ރަސްމާލޭގެ މަޝްރޫއުގެ ތެރޭގައި ނޭނގޭ ކަންތައްތަކެއް ހިނގުން ކަމަށް ވިދާޅުވި އެވެ.
އެމަނިކުފާނު ވިދާޅުވި ގޮތުގައި މަޝްރޫއުގެ މައުލޫމާތުތައް ހާމަނުކުރާ ނަމަ، އެ އެއްބަސްވުން އުވާލުމަށް ސަރުކާރަށާއި އީގަލް ހިލްސްއަށް ކޮންގްރެސްއިން ގޮވާލަން ޖެހޭނެ އެވެ.
"ސިއްރުން ހިނގާ އެއްވެސް ކަމަކަށް އަޅުގަނޑުމެން އާނއެކޭ ބުނެގެން ނުވާނެ. އަދި އެފަދަ މަސައްކަތެއް އަޅުގަނޑުމެންގެ ސަރުކާރެއްގައި ކުރިއަށް ގެންދަން ޖާގަ ވެސް ދީގެން ނުވާނެ،" އިބޫ ވިދާޅުވި އެވެ.
ރަސްމާލެ މަޝްރޫއުއަށް އެމްޑީޕީން ދެކޮޅު ހަދާތީ ސަރުކާރުގެ ބައެއް ބޭފުޅުން ވަނީ މިދިޔަ ސަރުކާރުގައި ވ. ފޮއްތެޔޮފަޅު ކުއްޔަށް ދިން ގޮތާ މެދު ފާޑުވިދާޅުވެފަ އެވެ. އިބޫ މިރޭ ވަނީ އެކަމަށް ވެސް ރައްދު ދެއްވައިފަ އެވެ.
އިބޫ ވިދާޅުވީ އެ ފަޅު ކުއްޔަށް ދޫކޮށްގެން ސަރުކާރުން 43 މިލިއަން ޑޮލަރު ވަދެފައިވާނެ ކަމަށާއި އަދި އެ ފަޅުގައި ޑޮމެސްޓިކް އެއާޕޯޓެއް އެޅުމަށް އެ ކުއްޔަށް ނެގި ކުންފުނީގެ ފައިސާ ބިން ހިއްކާފައިވާ ކަމަށެވެ.
ކުރީގެ ރައީސް ވިދާޅުވި ގޮތުގައި މަޝްރޫއުއެއް ހިނގާއިރު ބަލަންޖެހެނީ އޭގެން ރައްޔިތުންނާއި ގައުމަށް ކުރާނެ ފައިދާ އެވެ. އެގޮތުން ވ. އަތޮޅުގައި ޑޮމެސްޓިކް އެއާޕޯޓެއް އެޅުމުން އެތައް ރައްޔިތުންނަކަށް ފައިދާވާނެ ކަން ފާހަގަކުރެއްވި އެވެ.
އެފަދަ އެއާޕޯޓެއް އަޅަން ނ. އަތޮޅުން ވެސް މިދިޔަ ސަރުކާރުން ފަޅެއް ދޫކުރި ކަމަށާއި ނަމަވެސް، މި ސަރުކާރުން ވަނީ އެ މަޝްރޫއު އެސްއީޒެޑްގެ ތެރެއަށް ވައްދާ ޓެކްސްގެ ލުއިތައްދީ، ދައުލަތަށް ލިބެން އޮތް އެތައް އާމްދަނީއެއް ނުލިބޭނެ ގޮތަށް ހަދާފައި ކަން އިބޫ ފާހަގަކުރެއްވި އެވެ.
ރަސްމާލޭގެ މަޝްރޫއުގެ އެއްބަސްވުމަށް އިބޫ ފާޑުވިދާޅުވިއިރު ކުރީގެ ރައީސް މުހައްމަދު ނަޝީދު ވެސް ވަނީ އެ އެއްބަސްވުމުގެ މައުލޫމާތުތައް ވީއެންމެ އަވަހަކަށް ހާމަކުރަން ގޮވާލައްވައިފަ އެވެ. ކުރީގެ ރައީސް އަބްދުﷲ ޔާމީން ވެސް ވަނީ ދެން އުފެދޭ ސަރުކާރެއްގައި އެ އެއްބަސްވުން އުވާލުމަށް ގޮވާލައްވައިފަ އެވެ.