ރަސްމާލޭގައި ތަރައްގީކުރާ "މޯލްޑިވްސް ވޯޓާ ފްރަންޓް އެންޑް މެރީނާ" މަޝްރޫއުގެ 10 އަހަރުގެ މުއްދަތުގެ ތެރޭގައި ދައުލަތަށް 11 ބިލިއަން ޑޮލަރު (169 ބިލިއަން ރުފިޔާ) އަށްވުރެ ބޮޑު އާމްދަނީއެއް ލިބޭނެ ކަމަށް ލަފާ ކުރެވޭ ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެ އެވެ.
"މޯލްޑިވްސް ވޯޓާފްރޮންޓް އެންޑް މެރީނާ" ގެ ނަމުގައި ރަސްމާލޭގައި ބޮޑު މަޝްރޫއެއް ހިންގަން ޔޫއޭއީގެ ރިއަލް އެސްޓޭޓްގެ އެންމެ ބޮޑު އެއް ކުންފުނި ކަމަށްވާ އީގަލް ހިލްސްއާ އެކު ސަރުކާރުން ވަނީ ކޮމާޝަލް ޓާމްސް އެއްބަސްވުމެއްގައި ސޮއިކޮށްފަ އެވެ.
އެކަމާ ގުޅިގެން ކުރެއްވި ޕޯސްޓެއްގައި ޒަރީރު ވިދާޅުވި ގޮތުގައި އެއީ 500 ހެކްޓަރުގެ ސަރަޙައްދެއްގައި 20 ބިލިއަން ޑޮލަރުގެ "ވޯޓަ ފްރަންޓް އެންޑް މެރީނާ" މަޝްރޫއެއް 10 އަހަރު ދުވަހުގެ މުއްދަތަށް ބަހާލައިގެން ތަރައްގީކުރުމަށް ވެފައިވާ އެއްބަސްވުމެކެވެ. އަދި އެ މަޝްރޫއުގެ ދަށުން ދިރިއުޅޭނެ ގެދޮރާއި ހޮޓާތަކާއި ރިސޯޓުތަކާއި މެރީނާގެ އިތުރުން ފިހާރަތަކާއި އޮފީސްތަކާއި ތައުލީމީ އަދި ސިއްހީ ހިދުމަތްދޭ މަރުކަޒުތައް ގާއިމުކުރުމަށް ވަނީ ޕްލޭންކޮށްފަ އެވެ.
އެކްސްގައި ކުރެއްވި ޕޯސްޓެއްގައި ޒަރީރު ވިދާޅުވި ގޮތުގައި 10 އަހަރުގެ ތެރޭގައި 11 ބިލިއަން ޑޮލަރު ލިބޭނެ ކަމަށް ލަފާކުރެވޭއިރު އެއީ އަހަރަކު އެވްރެޖްކޮށް ގާތްގަނޑަކަށް 1.1 ބިލިއަން ޑޮލަރު ކަމަށެވެ.
މިނިސްޓަރު ވިދާޅުވީ ރަސްމާލެ މަޝްރޫއުން އަހަރަކު ލިބޭނެ ކަމަށް ލަފާކުރާ އެ އާމްދަނީއަކީ ރާއްޖޭގެ 179 ރިސޯޓާއި 16 ހޮޓަލާއި 920 ގެސްޓްހައުސްގެ އިތުރުން 165 ސަފާރީ އުޅަނދުން ދައުލަތަށް މިހާރު ލިބޭ ޖުމްލަ އާމްދަނީއަށްވުރެ އިތުރު އަދަދެއް ކަމަށެވެ.
އެއީ ދައުލަތުގެ މާލީ ހާލަތު ވަރުގަދަކޮށް، ރާއްޖޭގެ ދިގު ރާސްތާގެ ތަރައްގީއަށް މި މަޝްރޫއުގެ ސަބަބުން ލިބިގެންދާނެ ބޮޑު ކުރިއެރުން ހާމަކޮށްދޭ ކަމެއްކަން މިނިސްޓަރު ފާހަގަ ކުރެއްވި އެވެ.
ރަސްމާލެ އެއްބަސްވުމުގެ ދަށުން ކަނޑައެޅިފައިވާ ރޭޓުތަކުން ލިބޭ ޓީޖީއެސްޓީގެ އިތުރުން ތަންތަން ފުރަތަމަ ފަހަރަށް ވިއްކައިގެންނާއި ކުއްޔަށް ދީގެން ޑިވެލޮޕަރަށް ލިބޭ އާމްދަނީގެ 10 ޕަސެންޓް ދައުލަތަށް ލިބޭނެ ކަމަށް ޒަރީރު ވިދާޅުވި އެވެ. އަދި ފުރަތަމަ ފަހަރަށް ތަންތަން ގަންނަ ފަރާތްތަކުގެ އަތުން ތަންތަން އެ ތަނެއްގެ އަގުގެ ހަތަރު ޕަސެންޓް ދައުލަތަށް ދައްކަންޖެހޭނެ ކަމަށް ވެސް ވިދާޅުވި އެވެ.
ޒަރީރު ވިދާޅުވީ ރަސްމާލެ މަޝްރޫއުގެ އެއްބަސްވުމުގެ ދަށުން އެއްވެސް ކަހަލަ ޓެކްސް އިނާޔަތެއް ނުވަތަ ޑިއުޓީ މައާފުކޮށްދިނުމެއް ނުހިމެނޭ ކަމަށެވެ.
"މި މަޝްރޫއު ކުރިއަށް ގެންދިއުމަށް ދައުލަތުން އެއްވެސް ލޯނެއް ނުނަގާނެ. އަދި ސޮވެރިން ގެރެންޓީއެއް ވެސް ނުދޭނެ. މީގެ ސަބަބުން ދައުލަތަށް މާލީ އިލްތިޒާމެއް ނުއުފުލައި، ސީދާ އާމްދަނީ ލިބޭނެ މަގު ކަށަވަރުވެގެންދާނެ،" މިނިސްޓަރު ވިދާޅުވި އެވެ.
ރަސްމާލެ އެއްބަސްވުމުގެ ދަށުން، ތަންތަން ވިއްކައިގެން ލިބޭ ހުރިހާ ފައިސާއެއް ބަހައްޓަންޖެހޭނީ ރާއްޖޭގައި ހުޅުވާފައިވާ އެސްކްރޯ އެކައުންޓެއްގައި ކަން ވެސް މިނިސްޓަރު ފާހަގަ ކުރެއްވި އެވެ. އަދި އެ ފައިސާ ދޫކުރެވޭނީ އެއްބަސްވުމުގައިވާ އުސޫލުތަކުގެ މަތިން ކަމަށެވެ.
މީގެ އިތުރުން މަޝްރޫއުގެ ހުރިހާ ފައިސާގެ މުއާމަލާތެއް ހިންގަން ޖެހޭނީ ދިވެހި ބޭންކުތައް މެދުވެރިކޮށް ކަމަށް ވެސް މިނިސްޓަރު ވިދާޅުވި އެވެ.
"މި މަޝްރޫއު އެއްކޮށް ނިމި، ގާތްގަނޑަކަށް 10 އަހަރުގެ ތެރޭގައި ފުރިހަމަ އޮޕަރޭޝަނަށް އަންނައިރު، އަހަރަކު އެއް މިލިއަނަށްވުރެ ގިނަ ފަތުރުވެރިން ޒިޔާރަތް ކުރާނެ ކަމަށް ލަފާކުރެވޭ. މީގެ ސަބަބުން ރާއްޖޭގެ އިގުތިސޯދަށް ފަތުރުވެރިކަމުގެ ދާއިރާއިން އަހަރަކު ގާތްގަނޑަކަށް ދެ ބިލިއަން ޑޮލަރުގެ އާމްދަނީއެއް ވަންނާނެ،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވި ގޮތުގައި މިއީ ރާއްޖޭގެ ފަތުރުވެރިކަމުގެ ސިނާއަތް އިތުރަށް ވަރުގަދަވެ، ދިގު މުއްދަތުގެ އިގުތިސޯދީ ކުރިއެރުމަށް މަގުފަހިވެގެންދާނެ ކަމެކެވެ.