ހުޅުމާލޭގައި ސީލައިފް ގްލޯބަލް އިން ހަދާ އެޕާޓްމަންޓްތަކުގެ މަސައްކަތް ނުނިމި ދިގުލައިގެންދާތީ އެތައް ބަޔަކު ޝަކުވާކުރި ނަމަވެސް ފުރަތަމަ ފިޔަވަހީގެ 300 އެޕާޓްމަންޓްގެ މަސައްކަތް އަންނަ އަހަރުގެ ނިޔަލަށް ނިންމާނެ ކަމަށް އެ ކުންފުނިން މިއަދު ބުނެފި އެވެ.
ސީލައިފްގެ މެނޭޖިން ޑިރެކްޓަރު އަހުމަދު މޫސާ ވިދާޅުވީ އެ ޕްރޮޖެކްޓް ކުރިޔަށް ނުގެންދެވި ލަސްވީ ލިބެން ޖެހޭ ހުއްދަތައް ނުލިބި ލަސްވެގެން ކަމަށެވެ. ނަމަވެސް ފުރަތަމަ ފިޔަވަހީގައި ހިމެނޭ 14 ބުރީގެ ތިން ޓަވަރުގެ ފައުންޑޭޝަން އެޅުމުގެ ހުއްދަ މިދިޔަ ޖޫން މަހު ލިބުމާ އެކު ފުރަތަމަ ޓަވަރުގެ ފައުންޑޭޝަން މިހާރު އަޅާފައިވާ ކަމަށް ވެސް އޭނާ ވިދާޅުވި އެވެ.
"ޖޫންގައި އަމަލީ މަސައްކަތް ފަށަން ހުއްދަ ދިނީ. މިހާރު އެހުރީ އެއް ޓަވަރު ފައުންޑޭޝަން އަޅާ ނިންމާފައި. ލަފާކުރެވެނީ ބާކީ ހުރި ދެ ޓަވަރުގެ ފައުންޑޭޝަން މަސައްކަތަށް އަންނަ އަހަރުގެ ޖެނުއަރީގެ ނިޔަލަށް ނިންމާލެވޭނެ ކަމަށް،" އަހުމަދު ވިދާޅުވި އެވެ.
އޭނާ ވިދާޅުވީ ފުރަތަމަ ފިޔަވަހީގައި ހިމެނޭ 300 އެޕާޓްމަންޓް ގަންނަން ޝައުގުވެރިވެގެން 280 މީހުން ބުކިން ފީ ދައްކާފައިވާ ކަމަށެވެ. އެގޮތުން ކޮންމެ މީހެއްގެ އަތުން 50،000ރ ނަގާފައިވެ އެވެ. އެހެންކަމުން ބުކިން ފީއަށް އެކަނި ވެސް 14 މިލިއަން ރުފިޔާ ސީލައިފް އަށް ވަނީ ދައްކައިފަ އެވެ.
އެކަމަކު މަސައްކަތް ލަސްވެގެން އޭގެ ތެރެއިން ބައެއް މީހުން ކެންސަލްކުރުމުން އެ ފައިސާ އަނބުރާ ހަވާލުކޮށްފައިވެ އެވެ.
އަހުމަދު ވިދާޅުވީ މިހާރު ބުކިން ހަދާފައިވާ ފަރާތްތަކަށް އަންނަ އަހަރުގެ ޑިސެމްބަރަށް ފްލެޓްތައް ނިންމައި ހަވާލުކުރެވޭނެ ކަމަށެވެ.
"މި މަސައްކަތް މިހާ ދިގުލައިގެން ދިޔައީ އަޅުގަނޑުމެންގެ ސަބަބަކުން ނޫން. އަޅުގަނޑުމެންނަށް ލިބެން ޖެހޭ އެކި ހުއްދަތައް ނުލިބި ދިގުލައިގެން ދިއުމުން މަސައްކަތް ނުފެށި ލަސްވީ. އެކަމަކު އަޅުގަނޑުމެންނަށް ހުއްދަ ލިބުމާ އެކު އެތަނުގެ ފުރަތަމަ ފިޔަވަހީގެ ތިން ޓަވަރުގެ ފައުންޑޭޝަން އަޅަން މަސައްކަތް ފަށައިފިން،" އޭނާ ވިދާޅުވި އެވެ.
އަހުމަދު ވިދާޅުވި ގޮތުގައި ދެ ޝިފްޓަށް ބަހާލައިގެން ތިން ޓަވަރުގެ މަސައްކަތް ކުރިޔަށްގެންދަން ކޮންޓްރެކްޓަރު ވަނީ އެއްބަސްވެފަ އެވެ. އަދި މުޅި ޕްރޮޖެކްޓް ޖޫން 2019 ގައި ނިންމަން ޖެހޭ ކަމަށް ވެސް ވިދާޅުވި އެވެ.
ހުޅުމާލޭގައި އެޕާޓްމަންޓާއި ޝޮޕިން މޯލާއި ފުޑް ކޯޓު ހިމެނޭ ގޮތަށް ހަދާ ސީލައިފް ކޮމްޕްލެކްސް ތަރައްގީކުރުމުގެ އެއްބަސްވުމުގައި އެޗްޑީސީއާ އެކު ސޮއިކުރީ މާޗް 13، 2014ގަ އެވެ. އަދި އެތަނުގެ ބިންގާ ރައީސް އަބްދުﷲ ޔާމީން އަޅުއްވައިދެއްވީ އެ އަހަރުގެ އޭޕްރިލް މަހު އެވެ.
ސީލައިފް ކޮމްޕްލެކްސްގެ ފުރަތަމަ ފިޔަވަހީގެ ކޮންޓްރެކްޓަރަކީ ސްރީ ލަންކާގެ ކޮރަލް ހޮލްޑިން ކިޔާ ކުންފުންޏެވެ.
ސީލައިފްއިން ބުނީ ހުޅުމާލޭގެ ފުރަތަމަ ފިޔަވަހީގެ ތިން ބްލޮކެއްގައި ޖުމްލަ 3،000 އެޕާޓްމަންޓް ހިމެނޭ 14 ބުރީގެ 18 ޓަވަރު އަޅަން ނިންމާފައިވާ ކަމަށެވެ.
