ބޭންކް އޮފް މޯލްޑިވްސް (ބީއެމްއެލް)ގެ ހިއްސާއަކަށް ފައިދާގެ ގޮތުގައި 22ރ. ބަހަން އެ ބޭންކުގެ ބޯޑުން މިއަދު ނިންމައިފި އެވެ.
ރާއްޖޭގެ އެންމެ ބޮޑު ބޭންކުން މިއަދު ނެރުނު ނޫސްބަޔާނެއްގައި ބުނެފައި ވަނީ އެ ބޭންކުގެ މިދިޔަ އަހަރުގެ ފައިދާއިން ހިއްސާދާރުންނަށް 118.4 މިލިއަން ރުފިޔާ ފައިދާގެ ގޮތުގައި ބަހަން ނިންމާފައިވާ ކަމަށެވެ. އަދި އެއީ މިދިޔަ އަހަރު ބެހި އަދަދަށް ވުރެ ދިހަ ޕަސެންޓް އިތުރު އަދަދެއް ކަމަށް ވެސް ބީއެމްއެލް އިން ބުންޏެވެ.
އެ ބޭންކުން މިދިޔަ އަހަރު ހިއްސާގެ ފައިދާގެ ގޮތުގައި ބަހާފައި ވަނީ ހިއްސާއަކަށް 20ރ.ގެ މަގުންނެވެ. އެގޮތުން ހިއްސާދާރުން ޖުމްލަ 107.6 މިލިއަން ރުފިޔާ ބަހާފައިވެ އެވެ.
ބީއެމްއެލް އިން ހިއްސާގެ ފައިދާ ބަހާނީ އަހަރީ އާއްމު ޖަލްސާ ބޭއްވުމުގެ ކުރިން ބޭންކުން ކަނޑައަޅާ ތަރީހެއްގައި އެ ބޭންކުގެ ހިއްސާދާރުންގެ ގޮތުގައި ރަޖިސްޓްރީވެފައި ތިބޭ ފަރާތްތަކަށެވެ.