އެމެރިކާގެ އެންމެ ފުރަތަމަ ޓްރިލިއަން ޑޮލަރުގެ ކުންފުންޏަކަށް އެޕަލް ވެއްޖެ

ނިއުޔޯކް (2 އޯގަސްޓް)- އެމެރިކާގެ އެންމެ ފުރަތަމަ ޓްރިލިއަން ޑޮލަރުގެ ކުންފުންޏަކަށް، މަޝްހޫރު އެޕަލް ކުންފުނި މިއަދު ވެއްޖެ އެވެ.

ދުނިޔޭގެ އެންމެ އަގު ބޮޑު ކުންފުނީގެ މަގާމުގައި އޮތް ކުންފުނި ޓްރިލިއަން ޑޮލަރުގެ ކުންފުންޏަކަށްވުމުން އެ ކުންފުނީގެ ހިއްސާގެ އަގު އެމެރިކާގެ ހިއްސާގެ ބާޒާރުގައި ވަނީ ވަރަށް ބޮޑަށް އުފުލިފަ އެވެ. އެ ކުންފުނީގެ ހިއްސާއެއްގެ އަގު މިއަދު އުޅެނީ 207.4 ޑޮލަރަށެވެ.

އައިފޯނު އުފައްދައިގެން މަޝްހޫރުވި ކުންފުނީގެ އަގު އެއް ޓްރިލިއަން ޑޮލަރަށް އެރިއިރު، ދުނިޔޭގައި އެންމެ ފުރަތަމަ އެއް ޓްރިލިއަން ޑޮލަރަށް އަރާފައި ވަނީ ޗައިނާގެ ގައުމީ ތެޔޮ ކުންފުނި ޕެޓްރޯ ޗައިނާ އެވެ. އެ ކުންފުނި އެ މަގާމު ލިބުނީ 2007 ވަނަ އަހަރު ޝަންހާއި ސްޓޮކް އެކްސްޗޭންޖްގައި ލިސްޓްކުރުމުން އެވެ. ނަމަވެސް މިހާރު އެ ކުންފުނީގެ އަގު އުޅެނީ 205 ބިލިއަން ޑޮލަރުގަ އެވެ.

އެޕަލް ކުންފުނީގެ އަގު އެއް ޓްރިލިއަން ޑޮލަރަށް އެރިއިރު ދުނިޔޭގެ އެންމެ އަގުބޮޑު ކުންފުނީގެ މަގާމުގައި ދެމި އޮންނަތާ ހަތް އަހަރު ވެއްޖެ އެވެ.

އެޕަލް މި ކާމިޔާބީ ހޯދިއިރު ޗައިނާގެ ވާވޭ އިން ވަނީ، އެޕަލްގެ މަޝްހޫރު އައިފޯނު ފަހަތަށް ޖައްސާލުމަށްފަހު މޯބައިލް ފޯނި މާކެޓްގެ ދެވަނަ މަގާމު ހޯދައިފަ އެވެ.

ހިއްސާ ވިއްކާފައިވާ ކުންފުނިތަކުން އާއްމުކޮށް ނުކުރި ނަމަވެސް، އެޕަލް ކުންފުނިން ދާދިފަހުން ވަނީ އެ ކުންފުނިން ކުރިން ވިއްކާފައިވާ ހިއްސާގެ ބައެއް އަނބުރާ ގަންނަން ވެސް ނިންމައިފަ އެވެ .-- ބްލޫމްބާގް