އައިފޯންތަކުގައި ބޭނުންކުރާ "ހެޕްޓިކް ފީޑްބެކް" (ނޮޓިފިކޭޝަންތަކާއި ބަޓަންތަކަށް ފިތުމުން އަންނަ ވައިބްރޭޝަން) ޓެކްނޮލޮޖީއާ ގުޅޭ ޕޭޓެންޓްތަކަކަށް އަރައިގަނެފައިވާތީ، 5.7 ބިލިއަން ޑޮލަރަށްވުރެ ބޮޑު އަދަދެއް ބަދަލުގެ ގޮތުގައި ދެއްކުމަށް އެމެރިކާގެ ކެލިފޯނިއާގެ ފެޑަރަލް ކޯޓެއްގެ ޖޫރީއަކުން އެޕަލް ކުންފުނީގެ މައްޗަށް ހުކުމްކޮށްފި އެވެ.
އެމެރިކާގެ ސެން ޑިއޭގޯއަށް ނިސްބަތްވާ "ޓެކްޝަން ޓެކްނޮލޮޖީ" އިން ހުށަހެޅި މި މައްސަލައިގައި ކެލިފޯނިއާގެ ސަދަން ޑިސްޓްރިކްޓް ކޯޓުން ނިންމާފައިވަނީ، އެޕަލްގެ އައިފޯންތަކުގައި ޓެކްޝަންގެ ދެ ޕޭޓެންޓެއް ހުއްދަ ނެތި ބޭނުންކޮށްފައިވާ ކަމަށެވެ.
މިއީ 2021 ވަނަ އަހަރު ޓެކްޝަން ކުންފުނިން އެޕަލްއާ ދެކޮޅަށް ހުށަހެޅުމުން ކޯޓު މަރުހަލާގައި އުޅޭތާ ދުވަސްވީ މައްސަލައެކެވެ. ޓެކްޝަން އިން ކޯޓަށް ހުށަހެޅި 31 ސަފުހާގެ މައްސަލައިގައި ތުހުމަތުކޮށްފައިވަނީ، އެޕަލްއިން އެ ކުންފުނީގެ އީޖާދީ ޓެކްނޮލޮޖީ އާއި ހައްގުތަކަށް އުނިކަން އަންނާނެހެން ހުއްދައަކާ ނުލައި ޓެކްނޮލޮޖީ ބޭނުންކުރަމުންދާ ކަމަށެވެ. ނަމަވެސް، 2023 ވަނަ އަހަރު ފެޑަރަލް ފަނޑިޔާރަކު ނިންމެވީ އެޕަލްއިން ޕޭޓެންޓާ ހިލާފުވެފައިނުވާ ކަމަށެވެ. ނަމަވެސް، އިސްތިއުނާފީ ކޯޓަކުން މި މައްސަލަ އަލުން ބެލުމަށް ނިންމުމާ ގުޅިގެން މައްސަލަ އަލުން ކޯޓުގައި ކުރިއަށްދިޔަ އެވެ.
ކޯޓުގެ ޖޫރީން ނިންމާފައިވަނީ އެޕަލްއިން ޕޭޓެންޓާ ހިލާފުވެފައިވާ ކަމަށެވެ. ނަމަވެސް، އެޕަލްއިން މިއަމަލު ހިންގާފައިވަނީ ގަސްދުގައި ކަމަށް ޖޫރީން ނިންމާފައެއް ނުވެ އެވެ.
"ޖޫރީން ޓެކްޝަންގެ ހައްގުގައި ނިންމުން ނިންމައި، އެ ކުންފުނީގެ ޕޭޓެންޓް ހައްގުތައް ކަށަވަރުކޮށްދިނުމުން އަހަރެމެން އުފާކުރަން،" ހުކުމަށް ފަހު ޓެކްޝަންގެ ވަކީލު ލާންސް ޔެންގް ވިދާޅުވި އެވެ.
އެޕަލްއިން ބުނީ ކޯޓުގެ ހުކުމް އިސްތިއުނާފުކުރާނެ ކަމަށެވެ.
"އެޕަލްގެ 'ޓެޕްޓިކް އެންޖިން' އަކީ ޓެކްޝަންގެ ޓެކްނޮލޮޖީއާ މުޅިން ތަފާތު އެއްޗެއް. އަދި ޝަރީއަތުގެ މަރުހަލާގައި ޓެކްޝަން އަމިއްލައަށް އެޕަލްގެ އުފެއްދުންތައް ޓެސްޓުކުރުމުން ވެސް އެކަން ވަނީ ސާބިތުވެފައި،" އެޕަލްއިން ނެރުނު ބަޔާނެއްގައި ބުނެފައިވެ އެވެ.
މި ހުކުމް އައިސްފައިވަނީ އެޕަލްގެ ހިންގުމުގެ ދާއިރާއަށް ބޮޑެތި ބަދަލުތަކެއް އަންނަމުންދާ ދަނޑިވަޅެއްގަ އެވެ. ޓިމް ކުކް 15 އަހަރަށްފަހު ސީއީއޯގެ މަގާމުން ވަކިވެވަޑައިގަތުމުން، މި ސެޕްޓެމްބަރު މަހު އެޕަލްގެ އާ ސީއީއޯގެ މަގާމާ ޖޯން ތާނަސް ވަނީ ހަވާލުވެފަ އެވެ. މީގެއިތުރުން، އާޓިފިޝަލް އިންޓެލިޖެންސް (އޭއައި) ޓެކްނޮލޮޖީ ތައާރަފުކުރުމުގައި އެހެން ބޮޑެތި ޓެކްނޮލޮޖީ ކުންފުނިތަކަށްވުރެ އެޕަލް ފަހަތުގައިވާ ކަމަށް ބެލެވޭ ދަނޑިވަޅެއްގައި މިފަދަ ބޮޑު މާލީ ގޮންޖެހުމަކީ ކުރިމަތިވުމަކީ ކުންފުންޏަށް ކުރިމަތިވި އިތުރު މައްސަލައެއްގެ ގޮތުގައި ބެލެވެ އެވެ.
މި ހުކުމުގެ ހަބަރާ އެކު، ހޯމަ ދުވަހު ހިއްސާގެ ބާޒާރުގައި އެޕަލްގެ ހިއްސާގެ އަގު ވަނީ ގާތްގަނޑަކަށް ދެ ޕަސެންޓް ދަށްވެފަ އެވެ.