ރޭގެ މީޑިއާ ބްރީފިންގައި ފިނޭންސް މިނިސްޓަރު އަމީރު ވާހަކަ ދައްކަވަނީ.---ފޮޓޯ އަހުމަދު އަވްޝަން/މިހާރު
02 އެޕްރީލް 2020 - 12:39
3 comments
ކޮވިޑް-19 އާ ގުޅިގެން އެކި ފަރާތަކަށް މާލީ އެހީތެރިކަން ފޯރުކޮށްދިނުމަށް ޓަކައި އިންޓަނޭޝަނަލް ފައިނޭންސް ކޯޕަރޭޝަން (އައިއެފްސީ) އިން 50 މިލިއަން ޑޮލަރާއި އިންޓަނޭޝަނަލް މަނިޓަރީ ފަންޑު (އައިއެމްއެފް) އިން 30 މިލިއަން ހޯދުމުގެ މަސައްކަތް ކުރަމުން އަންނަ ކަމަށް ސަރުކާރުން ބުނެފި އެވެ.
ރޭ ދަރުބާރުގޭގާއި ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު އިބްރާހިމް އަމީރު ވިދާޅުވީ، ބޭންކް އޮފް މޯލްޑިވްސް (ބީއެމްއެލް) އަށް އައިއެފްސީގެ ލޯނެއް ހޯދުމުގެ މަސައްކަތް ވަރަށް ބާރަށް ކުރެވޭ ކަމަށެވެ. އައިއެފްސީން ދޭ ލޯނަކީ ޕްރައިވެޓް ސެކްޓަރަށް އެހީވުމަށް ހޯދާ ފައިސާ ކަމަށް އަމީރު ވިދާޅުވި އެވެ.
ރާއްޖޭގެ އިގްތިސާދީ ހާލަތު ދެނެގަތުމުގައި އައިއެމްއެފަކީ މުހިއްމު ބައެއް ކަން ފާހަގަކުރައްވައި އަމީރު ވިދާޅުވީ، ސަރުކާރުން އެ އިދާރާ މެދުވެރިކޮށް ރާއްޖޭގެ ސްޕެޝަލް ޑްރޯއިން ރައިޓްސް (އެސްޑީއާރް) އާ އެއްވަރު އަދަދެއް ނެގުމުގެ ފުރުސަތު އެބައޮތް ކަމަށެވެ. އެގޮތުން އެސްޑީއާރްގެ ދަށުން ނެގޭ އެންމެ ބޮޑު އަދަދު ކަމަށްވާ 30 މިލިއަން ޑޮލަރު ހޯދުމަށްޓަކައި އައިއެމްއެފާ އެކު ސަރުކާރުން އަންނަނީ މަޝްވަރާ ކުރަމުންނެވެ.
މުޅި ދުނިޔެ އާއި ރާއްޖެ ވެސް އިގްތިސާދީ ބޮޑު ކާރިސާއަކާ ދިމާއަށް ދާ އިރު މި ހާލަތުން އަރައުގަތުމަށްޓަކައި ބޭނުންވާ އެހީ ހޯދުމަށްޓަކައި ސަރުކާރުން ބޭރުގެ މާލީ ގިނަ އިދާރާތަކާއި އަންނަނީ މަޝްވަރާ ކުރަމުންނެވެ. މިގޮތުން ބައެއް އެހީތައް ޔަގީން ކުރުމުގެ އެންމެ ފަހު މަރުހަލާގެ މަސައްކަތްތައް ކުރައްވަމުން އަންނަ ކަމަށް އޭނާ ވިދާޅުވި އެވެ.
"އައިއެމްއެފްގެ އާޓިކަލް 4 ކޮންސަލްޓޭޝަން ވެސް ކޮންމެ އަހަރަކު ރާއްޖެ އަށް އަންނާނެ. އައިސް ރާއްޖޭގެ އިގްތިސާދަށް އަންނަ ބަދަލުތައް ދިރާސާކޮށް ރިޕޯޓު ވެސް ނެރޭނެ. ދެން ދުނިޔޭގެ އެހެނިހެން ޖަމިއްޔާ ޖަމާއަތްތަކުން، މަލްޓި-ލޭޓްރަލް އޮގަނައިޒޭޝަން ވެސް އާންމުކޮށް ބަލާނީ އައިއެމްއެފް އިން މިބުނާ ބަސް،" އޭނާ ވިދާޅުވި އެވެ.
މާލީ އެހެން އިދާރާތަކުން އެހީ ހޯދުމުގައި ވެސް އައިއެމްއެފްގެ ރެކޮމެންޑޭޝަނަކީ މުހިއްމު އެއްޗެއް ކަމަށް މިނިސްޓަރު ވިދާޅުވި އެވެ. މިއީ މުޅި ދުނިޔެ އަށް ކުރިމަތިވެފައިވާ "ހާއްސަ ހާލަތު" އަކަށްވާ އިރު މިހާލަތުގައި އައިއެމްއެފްގައި ވާހަކަ ދައްކަނީ ހާއްސަ ޕްރޮގްރާމެއްގައި ބައިވެރިވުމަށް ނޫން ކަމަށެވެ.
މި ހާލަތުން އަރައިގަތުމަށް ސަރުކާރަށް ގާތްގަނޑަކަށް 12 ބިލިއަން ރުފިޔާ އިތުރަށް ހޯދަން ވަނީ ޖެހިފަ އެވެ. އޭގެ ތެރެއިން ބަޖެޓުގައި ކަނޑައަޅާފައިވާ 150 މިލިއަން ޑޮލަރު ލިބޭނެ ކަމުގެ ފުރިހަމަ ޔަގީންކަން މިނިސްޓަރު އަމީރު ވަނީ ދެއްވައިފަ އެވެ. އަދި މިހާރު ވެސް އޭގެ ތެރެއިން 50 މިލިއަން ޑޮލަރު (770 މިލިއަން ރުފިޔާ) ސަރުކާރަށް ލިބިފައިވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ސުހައިލް
02 April 2020
ދަރަނި ދަރަނި ދަރަނި. މި ނޫން ގޮތަކަށް މިކަމުން އަރައިގަންނާނެ ވިސްނުމެއް ބުއްދިއެއް ފިކުރެއް ހަމަ ނެތީތޯ. ކުރީ ސަރުކާރުން ދަރިންގެ ދަރިންގެ ދަރިން ދަރަނިވެރިކުރާ ވާހަކަ ދައްކާ މީހުން މި ދަނީ އަންނަ އޮތް ހުރިހާ ޖީލެއް ދަރަނިވެރިކުރުވަމުން. ނިކަން އެއް ފަހަރުވެސް ޚަރަދުތައް ކުޑަކުރާ ވާހަކައާ އިގްތިސޯދު ކުރިއަރުވާނެ ގޮތްތަކުގެ ވާހަކަ ދައްކަބަލަ، ބޭކާރު ސިޔާސީ މަގާމުތައް އުވާލާ، ބޭކާރު އެމްބަސީތައް ބަންދުކޮށް، ސިޔާސީ މީހުންގެ މުސާރަތައް ކުޑަކޮށްބަލަ.
އޮނަރަބްލް އަފީފު ދީދީ
02 April 2020
ހަމައެކަނި ދަރަނި ހޯދައިގެން ސަލާމަތް ވުމަށް ވިސްނުމުގެ ބަދަލުގައި ޙަރަދުތައް ކުޑަކޮށް އިޤްތިސޯދީ ރަނގަޅު ފިޔަވަޅުތަކެއްވެސް އަޅާންޖެހޭ. # މިރާއްޖޭގައި ތިބި އިލީގަލް ބިދޭސިން ބޭރުކުރުމަށް ހުރަސްތަކެއް ހުރުމާއިއެކު މިވަގުތު ފަސޭހައިން ބޭރުކުރެވޭނެ ބިދޭސިންނަކީ ސަރުކާރާއި ދައުލަތް ޙިއްސާވާ ކުންފުނިތަކުގައިތިބި ބިދޭސިންކަމަށްވާތީ ޕަރޮފެޝަނަލް ގިންތީގެ މީހުންފިޔަވާ ދެންތިބިއެންމެނަށް 3 މަސް ނޯޓިސްދީ ވޯކްވީސާ ކެންސަލްކޮށް ޤައުމަށް ފޮނުވާލާ.
ލެއްގި ކޮމިޝަނަރ
03 April 2020
ލޯން ނަގައިގެން ނޫންގޮތަކަށް އެއްކަމެއްވެސް ކުރާކަށް މިސަރުކާރަކަށް ނޭންގޭނެ. އެވަރުގެ ޤާބިލުކަމެއް ހިއްނަވަރު އިބްރާހިމުގެ އަދި އެމަނިކުފާނުގެ ވަޒީރުންގެ ކިބަޔަކު ނެތޭ. އެކަން ކުރަންއެގޭ މީހާ މިވަގުތުހުރީ މާފުށީ ޖަލުގައޭ.