ތިން އަހަރުގެ ބޮޑު ކާމިޔާބު: ދިވެހި ސައިބޯނި ދުބާއީގައި

ބަޔަކަށް ބަރޯސާވުމުގެ ބަދަލުގައި އަމިއްލަ މަސައްކަތުން އާމްދަނީ ހޯދުމަށް އައިޝަތު އަޒްލީނާ އަމީން އިހުތިޔާރުކުރީ އާދައިގެ، ފަސޭހަ މަސައްކަތެއް ނޫނެވެ. އޭނާ ވިސްނީ ސައިބޯނި އުފެއްދުމަށެވެ. އޭރު ވެސް ރާއްޖޭގައި މަދުން ނަމަވެސް އަމިއްލަ ބްރޭންޑުގެ ސައިބޯނި އުފައްދަ އެވެ. އެކަމަކު މި މަސައްކަތުގައި އަޒްލީނާގެ ތަފާތުތަކެއް އެބަހުއްޓެވެ.

އޭނާ ވިސްނީ މި ގޮތަށެވެ؛ "އޯގާ"ގެ ނަމުގައި އަމިއްލަ ބްރޭންޑެއް އުފެއްދުމަށެވެ. އެއީ ތިމާވެއްޓާ ރައްޓެހި ގޮތަކަށް އުފައްދާ ސައިބޯންޏަކަށް ހެދުމަށެވެ. ނަތީޖާ އަކީ، އެހެން ސައިބޯނިތަކާ ހިލާފަށް މިހާރު އެއީ އައިއެސްއޯ ސެޓިފައިޑް ބްރޭންޑެކެވެ. އެ ދަތުރުގައި މިހާރު މި ވަނީ އެންމެ މުހިންމު އެއް އުނދަގޫ ވެސް ހުރަސްކޮށްފަ އެވެ. ރާއްޖެ އިން ބޭރަށް އެ ސައިބޯނި ހިނގައްޖެ އެވެ. ކުޑަ ސްޓޫޑިއޯއެއްގައި ހަދަން ފެށި ސައިބޯނި މިދިޔަ މަހު ވަނީ ދުބާއީގެ މާކެޓަށް ވެސް ނެރެފަ އެވެ.

މީގެ ތިން އަހަރު ކުރިން ސައިބޯނި އުފައްދަން ފެށީ އަޒްލީނާގެ ކުންފުނި، "އާޓިސްޓްރީ"ގެ ނަމުގަ އެވެ. ގުދުރަތީ ވެށިން ލިބޭ އެކި ސާމާނު ބޭނުންކޮށްގެން "އޯގާ"ގެ ނަމުގައި ތަފާތު ބިއުޓީ ޕްރޮޑަކްޓްތައް އުފައްދަން ފެށީ މިދިޔަ އަހަރު އެވެ. ޝޭމްޕޫ ބާ އާއި ކޮންޑިޝަނާ ބާ އަދި ބޮޑީ ބާމު ވެސް އުފައްދަ އެވެ.

ހަތް އަހަރާއި ހަތް މަހުގެ ދެ ކުދިން ގޮވައިގެން، ފިރިމީހާގެ ވެސް އެހީތެރިކަމާ އެކު "އޯގާ"ގެ ކުޑަ ދަށުން އަށް ވައްތަރެއްގެ ސައިބޯނި މިހާރު ބާޒާރަށް ނެރެ އެވެ. އޭގެ ތެރެއިން އެންމެ ޑިމާންޑް ބޮޑިީ ހިތިފަތު ސައިބޯންޏަށެވެ.

އެ އެއްޗެހި ހެދުމަށް ބޭނުންވާ ކާށި ތެލާއި ފަޅޮލާއި ކާށި ކިރާއި މުރަނގަ ފަތާއި ހިތި ފަތް ކަހަލަ އެއްޗެހި ހޯދަނީ މާލެއިންނެވެ. ބޭރުން ގެންނަނީ އެސެންޝަލް ތެޔޮ ކަހަލަ އެއްޗިއްސެވެ.

އަޒްލީނާ ބުނާގޮތުން ޕްލާސްޓިކް ބޭނުންކުރާ މިންވަރު މަދުކުރުމަށް އެ ސައިބޯނިތައް ޕެކްކޮށްފައި ހުންނަނީ ޕޭޕަރު ކަހަލަ އެއްޗެހި ބޭނުންކޮށްގެންނެވެ. އެ އެއްޗެހި ތައްޔާރުކުރުމުގައި ވީހާ ވެސް މަދުން ޕްލާސްޓިކް ބޭނުން ކުރުމަކީ އޭނާގެ އެންމެ ބޮޑު އަމާޒެވެ.

އެކަން ފެށުމުގެ ކުރިން ސައިބޯނި ހަދާ ގޮތް މެލޭޝިޔާއިން ދަސްކުރި އެވެ. އެކަމަކު ގިނަ ކަންކަން ދަސްވެފައިވަނީ، 36 އަހަރުގެ އަޒްލީނާ ބުނިގޮތުގައި މަސައްކަތުގައި އަމަލީގޮތުން ހަރަކާތްތެރިވާން ފެށުމުންނެވެ. މިހާރު ހަފުތާގެ ހަތަރު ވަރަކަށް ދުވަހު ސައިބޯނި އުފެއްދުމުގައި އުޅެން ޖެހެ އެވެ. ބެޗެއްގައި ހަދަނީ 78 ބާ އެވެ.

"ފެށިއިރު ހިތަށްއެރި އެ ޗެލެންޖަސް އަންނާނެއޭ. އެކަމަކު އެހެންނެއް ނުވޭ. ދިވެހީންގެ ތެރޭގައި ވަރަށް ބަލައިގަނޭ މިހާރު އޯގާގެ ޕްރޮޑަކްޓްސް. ރެގިއުލާކޮށް ގަންނަ ކުދިން އުޅޭ،" އަޒްލީނާ ބުންޏެވެ.

މަސައްކަތް ފެށިތާ ކުރީކޮޅު، މިދިޔަ އަހަރުގެ ފެބްރުއަރީގައި އައިއެސްއޯ ސެޓްފިކެޓް ލިބުމަކީ އުފެއްދުންތަކަށް ކަސްޓަމަރުންގެ އިތުބާރު ބޮޑުވެގެންދިއުމަށް ލިބުނު ބޮޑު ހަދިޔާއެކެވެ. އެއާއެކު، އެ އިތުބާރު ދަމަހައްޓައި މިންގަނޑުތަކުގައި ހިފެހެއްޓުމަށް ބައެއް ސައިބޯނި ޓެސްޓުކުރަން ބޭރަށް ފޮނުވަ އެވެ.

"އަބަދު ވެސް އުއްމީދުކުރަން އަސްލު އިންޓަނޭޝަނަލް ބްރޭންޑަކަށް އޯގާ ހަދަން. ހަމައެކަނި ރާއްޖެއަކަށް ލޯކަލްސް އަކަށް ނޫން. މިހާރު ވެސް އަޅުގަނޑުމެންގެ ގިނަ ކަސްޓަމާޒްއަކީ ފޮރިނާސް ރިސޯޓުތަކަށް ވެސް ސަޕްލައިކުރާތީއާ އެކު،" އަޒްލީނާ ބުންޏެވެ.

ރާއްޖޭގެ 20 ރިސޯޓެއްގެ އިތުރުން ވެލާނާ އިންޓަނޭޝަނަލް އެއާޕޯޓުގައި ހުންނަ ޑިއުޓީ ފްރީއާއި ހުޅުމާލެ ސެންޓްރޯ މޯލްގައި ހުންނަ އޮތެންޓިކް މޯލްޑިވްސް ފިހާރައިން އެ އުފެއްދުންތައް ލިބޭނެ އެވެ. ދުބާއީގެ ވެލްނެސް ސެންޓަރެއް ކަމަށްވާ ސެވާ އެކްސްޕީރިއެންސްގައި "އޯގާ"ގެ ސައިބޯނި ވިއްކަން ފެށީ މިދިޔަ މަހުގެ ތެރޭގަ އެވެ.

އެހެން މީހުންނަށާއި ތިމާވެއްޓަށް އޯގާތެރިވުމުން އުފަންކުރި "އޯގާ" އަށް މުހިއްމު އުފެއްދުމެއް އިތުރުކުރަން މަސައްކަތްކުރި އެވެ. ކުރިއާ ހިލާފަށް އެކަމަށް މިހާރު އެކަށީގެންވާ ވަގުތު ނުލިބުމުން ސައިބޯނި ފުޅި ނެރެވޭ ގޮތެއް ނުވި އެވެ. އަންނަ އަހަރުގެ ތެރޭގައި އާ ޕްރޮޑަކްޓް ލޯންޗުކުރުމަށް އަޒްލީނާ ހުރީ ނިންމައިގެންނެވެ.

އަޖުމަ ބެލުމަށް އެއް ފަހަރު އޭނާ ދިޔާ ސައިބޯނި އުފެއްދި އެވެ. ނަތީޖާއާ މެދު އޭނާ ހިތްހަމަޖެހުނަސް ދިމާވާނެ އެއް ގޮންޖެހުމަކީ ޕްލާސްޓިކް ފުޅީގެ ބަދަލުގައި އެހެން ގޮތެއް ހޯދުމެވެ.

ތަކެތި ނުލިބުމާއި ޓެސްޓުކުރުމުގެ ގައިޑްލައިނެއް ނެތް، ބޮޑު ގޮންޖެހުމެއް

މާ ވަރުގަދަ އަށް ނޫނަސް ސައިބޯންޏާއި ރީތިވުމަށް ބޭނުންވާ ތަފާތު އެއްޗެހި އުފައްދާ ހުނަރުވެރި ޒުވާނުން ރާއްޖޭގައި އުޅެ އެވެ. އެކަމަކު ރައްކާތެރިކަން ކަށަވަރުކުރުމަށް، މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ އުސޫލެއް ނެތުމަކީ އަޒްލީނާ ފަދަ ހުނަރުވެރިންނަށް ކުރިމަތިވެފައި އޮތް ގޮންޖެހުމެކެވެ.

"ރާއްޖޭގައި ކޮސްމެޓިކްސް އާއި މިކަހަލަ ސައިބޯނި އެއްޗެހި ހެދުމުގައި އެމްއެފްޑީއޭގެ ވަކި ގައިޑްލައިނެއް ނެތް. ޓެސްޓުކުރެވޭނެ ވަކި ގޮތެއް ނެތް. މިކޮޅުން ޓެސްޓުކުރެވޭނެ ގޮތެއް ނެތީމަ ރާއްޖެއިން ބޭރަށް މި ފޮނުވަނީ ވެސް،" އަޒްލީނާ ބުންޏެވެ.

ފިހާރަތަކުން އާއްމުކޮށް ލިބޭ ސައިބޯންޏަށް ވުރެ "އޯގާ"ގެ އުފެއްދުން އަގުބޮޑުވެގެން ދަނީ ވެސް އެ ސަބަބާ ހެދި އެވެ. މުހިއްމު ތަކެތި ގެންނަން ޖެހެނީ ބޭރުންނެވެ.

ފަސޭހައިން، ހެޔޮ އަގެއްގައި އެ އެއްޗެހި ލިބޭ ނަމަ މިހާރަށް ވުރެ އަގުހެޔޮކޮށް ސައިބޯނި ވިއްކޭނެ ކަމަށް އަޒްލީނާ ބުނެ އެވެ. އޭނާ އުފައްދާ ސައިބޯންޏެއް މިހާރު ލިބެން ހުންނަނީ ގާތްގަނޑަކަށް 150ރ. އަށެވެ.

އާއިލީ ޒިންމާތައް އަދާކުރުމުގެ ބުރައާއެކު ވެސް އަޒްލީނާ ހުރީ ރާއްޖޭގެ އިތުރުން ބައިނަލްއަގުވާމީ މައިދާނުގައި ވަރުގަދަ ބްރޭންޑަކަށް އޯގާ ހެދުމުގެ އުއްމީދުގަ އެވެ. މި ތިން އަހަރުގެ ތެރޭގައި ހާސިލްވި ކަންކަމަށް ބަލާއިރު އެއީ މާ ދުރުގައި އޮތް ކަމެއް ނޫނެވެ.