މާލެ އާއި ހުޅުލެ އާއި ހުޅުމާލެ ކަރަންޓުގެ އެއް ވިއުގައަކުން ގުޅުވާލުމަށް ކުރިއަށްގެންދިޔަ އިންޓަ ކަނެކްޝަން ޕްރޮޖެކްޓުގެ އަމަލީ މަސައްކަތް މިއަދު ނިންމާލައިފި އެވެ.
މި ޕްރޮޖެކްޓުގެ ދަށުން ކަނެކްޝަން ގުޅުވާލުމަށް މޭލޭގެ ބައެއް ސަރަހައްދުތަކުން މިއަދު ހެނދުނު ވަނީ ކަރަންޓު ކަނޑާލައިފަ އެވެ. މި މަސައްކަތް ނިމުމުން މިހާރު ވަނީ އަލުން ކަރަނަޓު ދީފަ އެވެ.
ސްޓެލްކޯ އިން ބުނީ މި ޕްރޮޖެކްޓުގެ އަމަލީ މަސައްކަތް ނިމިފައިވާއިރު ދެން އޮތީ "އެނަޖައިޒް" ކުރުމުގެ މަސައްކަތް ކަމަށެވެ. މި މަސައްކަތް އަންނަ ހުކުރު ދުވަހު ނިންމާލެވޭނެ ކަމަށް އެ ކުންފުނިން ބުންޏެވެ.
މި ޕްރޮޖެކްޓު އެނަޖައިޒް ކުރުމުން ހުޅުމާލެ އިން މާލެ އަށް އަދި ހުޅުލެ އަށް ކަރަންޓު ފޯރުކޮށްދެވޭނެ އެވެ. މިއީ މާލެ އަށް ދިމާވެފައިވާ ކަރަންޓުގެ މައްސަލަ އަށް ހައްލު ހޯދުމަށް ސްޓެލްކޯ އިން ފެށި ޕްރޮޖެކްޓެކެވެ.
ހުޅުމާލޭގައި އަޅާފައިވާ 50 މެގަވޮޓުގެ އިންޖީނުގެ އިން 50 މެގަވޮޓުގެ ކަރަންޓު އުފައްދާއިރު، މިހާރު ހުޅުމާލެ އަށް ބޭނުން ވަނީ އެންމެ 15 މެގަވޮޓްގެ ކަރަންޓެވެ. އެހެންވެ، ބާކީ އުފައްދާ ކަރަންޓު މި ވިއުގަ މެދުވެރިކޮށް މާލެ ސަރަހައްދަށް ބަހާލާނެ އެވެ.
މާލެ ސަރަހައްދުން ކަރަންޓުގެ ޑިމާންޑު އަހަރަކު ގާތްގަނޑަކަށް ހަތް ޕަސެންޓަށް އިތުރުވެ އެވެ. އެހެންވެ، މި ޕްރޮޖެކްޓާ އެކު މިކަމަށް ބޮޑު ހައްލެއް ލިބި، ޑިމާންޑާ އެއްވަރަށް ކަރަންޓު ފޯރުކޮށްދެވޭނެ ކަމަށް ސްޓެލްކޯ އިން ބުންޏެވެ.