ބިލް ބޮޑުކަމަށް ދައްކަނީ ކުންފުނީގެ މައްސަލައަކުން ނޫން: ސްޓެލްކޯ

މި މަހުގެ ކަރަންޓު ބިލުތައް މިދިޔަ މަހަށް ވުރެ ބޮޑު ކަމަށް ދައްކަނީ ސަރުކާރުން އެދިގެން މިދިޔަ މަހު ޑިސްކައުންޓް ދިން ނަމަވެސް މި މަހުގެ ބިލްތަކުން އެ ޑިސްކައުންޓް ނުދޭތީ ކަމަށް ސްޓެލްކޯ އިން މިއަދު ބުނެފި އެވެ.

އެ ކުންފުނީގެ މީޑިއާ އޮފިޝަލް ވިދާޅުވީ، ގޭބީސީތަކުގެ މިދިޔަ މަހުގެ ކަރަންޓު ބިލުން 40 ޕަސެންޓްގެ ޑިސްކައުންޓެއް ދިން ނަމަވެސް އެގޮތަށް އަމަލުކުރަން ސަރުކާރުން އެދުނު މުއްދަތު ހަމަވެފައިވާ ކަމަށެވެ. .

އޭނާ ވިދާޅުވީ، އެހެންވެ މި މަހުގެ ބިލްތަކުން ޑިސްކައުންޓެއް ނުދޭ ކަމަށާއި ސަބަބަކީ ކޮވިޑްގެ ދަތިކަމާ ގުޅިގެން ކަރަންޓު ބިލްތަކުން ޑިސްކައުންޓް ދޭން ސަރުކާރުން ކަނޑައެޅީ ހަމައެކަނި މޭ މަހުގެ ބިލުން ކަމަށް ވާތީ ކަމަށެވެ.

މީޑިއާ އޮފިޝަލް ވިދާޅުވިގޮތުގައި، ބިލްތައް އާދަޔާ ހިލާފަށް ބޮޑުވީ ސްޓެލްކޯގެ މައްސަލައަކުން ނޫނެވެ. އަދި އެ ކުންފުނީގެ މައްސަލައެއް ނެތް ކަން ޔަގީން ކުރަން ބޭނުންވާ ފަރާތްތަކަށް އެ ކަން ސްޓެލްކޯ އަށް ހުށަހަޅައިގެން ކުރިއަށް ގެންދެވޭނެ ކަމަށް އޭނާ ވިދާޅުވި އެވެ. އެ ޝަކުވާ ހުށަހަޅާ ގޭބީސީތަކަށް ވަކިން ގޮސް އެފަދަ ގޭބީސީތަކުގެ ރީޑިން އަލުން ނަގާނެ ކަމަށް އޮފިޝަލް ވިދާޅުވި އެވެ.

އޭނާ ވިދާޅުވީ، ޑިސްކައުންޓުގެ އިތުރުން ބައެއް ބިލްތައް އިތުރަށް ބޮޑު ކަމަށް ދައްކަނީ މިދިޔަ ދުވަސްތަކުގައި ކަރަންޓް ބިލް ނުދެއްކި ހުރި މީހުން، ކުރިއަށް ހުރި މަސްތަކަށް ބަހާލައިގެން ބިލް ދެއްކުމުގެ ފުރުސަތު ދިނުމުން އެ ބައި ވެސް މި ފަހަރުގެ ބިލަށް އިތުރުކޮށްފައި އޮތުމުން ކަމަށެވެ.

މި މަހުގެ ކަރަންޓް ބިލް ބޮޑުވުމުގެ ސަބަބުން މާލޭގެ މޭޔަރު ޑރ. މުހައްމަދު މުއިއްޒު ވެސް ވަނީ ކަންބޮޑުވުން ފާޅުކުރައްވައިފަ އެވެ.

އޭނާ ވިދާޅުވީ ކަރަންޓް ބިލް މިހާ ބޮޑުވުން ހާލުގައި އުޅޭ އެތައް ބަޔަކު އިތުރަށް ހާލުގައި ޖެހިފައިވާ ކަމަށެވެ. ބަައެއް މީހުންގެ ބިލްތައް ދެ ގުނަ އިތުރު ވެފައި ކަމަށް ވެސް މޭޔަރު ވިދާޅުވި އެވެ.

އެހެން މީހަކު ބުނި ގޮތުގައި މިދިޔަ ބޮޑު ޗުއްޓީގައި މާލޭގައި ނެތް އިރުވެސް ކަރަންޓް ބިލް ބޮޑުވެފައިވާ ކަމަށެވެ. ސްޓެލްކޯއިން ބުނީ ބިލްތަކުގެ ރީޑިން ނަގާ ގޮތުން މިދިޔަ ޢީދު ޗުއްޓީގެ ދުވަސްތައް ބިލުން ފެންނާނީ އަންނަ މަހުގެ ބިލުން ކަމަށެވެ.

ކަރަންޓް ބިލަށް ކޮންމެ މަހަކު ވެސް އެ މަހެއްގެ ޔޫސޭޖަށް ބިނާކޮށް ބަދަލު އަންނާނެ އެވެ. އެކަމަކު، މިދިޔަ ފެބްރުއަރީ މަހު ސްޓެލްކޯ އިން ވަނީ ކަސްޓަމަރުންނަށް މަހުން މަހަށް ފިކްސްޑް ބިލެއް ދެއްކޭނެ ގޮތަށް "އީކުއަލް ޕޭމެންޓް ސިސްޓަމް"ގެ ނަމުގައި ޕޭމެންޓް ޕްލޭނެއް ތައާރަފުކޮށްފި އެވެ. މި ޕްލޭންގެ ދަށުން ކަސްޓަމަރުންނަށް ކޮންމެ މަހެއްގައި ކަރަންޓަށް ހޭދަކުރަން ބޭނުންވާ ވަރު ބަޖެޓު ކުރެވޭނެ އެވެ.