ސަރުކާރުން އަގުހެޔޮ ކުރި ކަރަންޓް ބިލްތައް ލިބޭނީ މިފެށޭ މަހުގައި ކަމަށް ސްޓެލްކޯއިން މިއަދު ބުނެފި އެވެ.
މާޗް މަހުގެ އެއް ވަނަ ދުވަހުން ފެށިގެން ކަރަންޓުގެ އަގު ހެޔޮކޮށްފައިވާ ކަން ރައީސް އިބްރާހިމް މުހައްމަދު ސޯލިހް ވަނީ އިއުލާން ކުރައްވައިފަ އެވެ. އެކަމަކު މި މަހު ސްޓެލްކޯ އިން ފޮނުވި ކަރަންޓް ބިލްތައް ބޮޑުވެގެން އާއްމުން ދަނީ ޝަކުވާކުރަމުންނެވެ.
ބައެއް މީހުން ކަރަންޓް ބިލް އާއްމުކޮށް ސޯޝަލްމީޑިއާގައި ލިއެފައިވާ ގޮތުގައި، މި މަހު ފޮނުވި ބިލް އެހެން ހުރިހާ މަސްތަކަށް ވުރެން ބޮޑެވެ.
ސްޓްލެކޯގެ މީޑިއާ އޮފިޝަލް އިބްރާހިމް ރައޫފު މިއަދު ވިދާޅުވީ ކަރަންޓްގެ އަގު ހެޔޮ ކުރިކަން ރައީސް އިއުލާން ކުރެއްވިއިރު މިދިޔަ މަހުގެ ކަރަންޓް ބިލްތަކުގެ ރީޑިން ނަގައި ބިލް އޮތީ ތައްޔާރު ކޮށްފައި ކަމަށެވެ.
ސަރުކާރުން އަލަށް ގެނައި ބަދަލާއެކު މާލޭގެ ގޭބިސީތަކުގެ ކަރަންޓް ބިލްތައް ވެސް އަގުހެޔޮވެގެން ދާއިރު ދެން އަންނަ ބިލެއްގައި އެ އަގުތައް ހިމެނޭނެ ކަމަށް ރައޫފު ވިދާޅުވި އެވެ.
"ދެން ގެތަކަށް އަންނާނީ އަގުހެޔޮ ކުރި ގޮތަށް ބިލް،" ރައޫފް ވިދާޅުވި އެވެ.
ކަރަންޓް ޔުނިޓަކަށް އަންނާނެ ބަދަލުތަކުގެ ތަފްސީލެއް އަދި ނުދެ އެވެ.
މިމަހު ފޮނުވި ބިލްތައް ބޮޑުކަމަށް ކުރާ ޝަކުވާއާ ގުޅިގެން ރައޫފު ވިދާޅުވީ މިދުވަސްވަރަކީ ހޫނުގަދަ ދުވަސް ވަރަކަށް ވާތީ ކަރަންޓް ބޭނުން ކުރާ މިންވަރު އިތުރުވެފައިވާ ކަމަށެވެ. ބިލް ބޮޑުވަނީ އެހެންވެ ކަމަށް އޭނާ ވިދާޅުވި އެވެ.
"ހޫނުގަދަވީމާ އޭސީ ވެސް ގިނައިރު ބޭނުން ކުރާނެ. ފްރިޖުވެސް ގިނައިރު ބޭނުން ކުރާނެ. އަދި އަވަސް އަވަހަށް ހުޅުވާނެ. އެހެންވެ ބިލް ބޮޑުވަނީ،" ރައޫފް ވިދާޅުވި އެވެ.
ރައޫފް ވިދާޅުވި ގޮތުގައި އެ ކުންފުނިން ފޯރުކޮށްދޭ ކަރަންޓް ވެސް މު ދުވަސްވަރު ވަނީ ދެ މެގަވޯޓް އިތުރުވެފަ އެވެ.
ރައީސް އިއުލާން ކުރެއްވި ގޮތުގައި މުޅި ރާއްޖެއަށް ދެމުން އަންނަ ކަރަންޓްގެ އަގު ހެޔޮވާނެ އެވެ. ރައީސް ވިދާޅުވި ގޮތުގައި ކަރަންޓުގެ އަގު ހެޔޮކުރަން ނިންމާފައި ވަނީ ތިން ބަޔަކަށް ބަހާލައިގެންނެވެ. ފުރަތަމަ ބަދަލަކަށް ރާއްޖޭގެ ހުރިހާ ރަށެއްގެ ޑޮމެސްޓިކް ކެޓަގަރީގެ 400 ޔުނިޓުން މަތީގެ ބޭންޑުތަކަށް ނަގާ އަގުގެ ފަރަގު ނައްތާލާނެ ކަމަށް އެމަނިކުފާނު ވަނީ ވިދާޅުވެފަ އެވެ.