ހަ ހާހަށް ވުރެ ގިނަ ޓޫރިސްޓުންނާ އެކު، މި އަހަރު ރާއްޖެ އަށް އެންމެ ގިނަ ޓޫރިސްޓުން އައި ދުވަހަކަށް އިއްޔެ ވެއްޖެ އެވެ.
ޓޫރިޒަމް މިނިސްޓްރީން އާއްމުކޮށްފައިވާ ތަފާސްހިސާބުން އެނގޭ ގޮތުން އިއްޔެ ރާއްޖެ އަށް 6،197 ޓޫރިސްޓުން އައިސްފައިވެ އެވެ. މިހާތަނަށް ރާއްޖެ އަށް އެންމެ ގިނަ ޓޫރިސްޓުން އައިސްފައި ވަނީ މިދިޔަ އޮގަސްޓް މަހު އެވެ. އެ މަހު އެއް ދުވަހުގެ ތެރޭ 5،000 ޓޫރިސްޓުން އައިސްފައިވެ އެވެ. އެހެންވެ މިއީ ކޮވިޑަށް ފަހު ރާއްޖޭގެ ބޯޑަރު ހުޅުވާލި ފަހުން ރާއްޖެ އަށް އެންމެ ގިނަ ޓޫރިސްޓުން އައި ދުވަހެވެ.
އިއްޔެ ޓޫރިސްޓުން އައުމުގެ ރެކޯޑެއް ހަދާފައިވާ އިރު ޓޫރިޒަމް ދާއިރާއިން މި އަހަރަށް ސަރުކާރުން ކަނޑައެޅި އަމާޒުގެ 90 ޕަސެންޓް މި މަހަށް ވަނީ ހާސިލުވެފަ އެވެ.
ޓޫރިޒަމް މިނިސްޓްރީން އާންމުކުރި ތަފާސްހިސާބުތަކުން އެނގޭ ގޮތުން މި އަހަރުގެ މިހާތަނަށް 923،000 ޓޫރިސްޓުން ރާއްޖެ އަށް ޒިޔާރަތް ކޮށްފައިވެ އެވެ. މި އަހަރު ބަޖެޓުގައި ހިސާބު ޖަހާފައިވާ ގޮތުން ނަމަ ރާއްޖެ އަންނާނެ ކަމަށް ލަފާކުރީ އެއް މިލިއަން ޓޫރިސްޓުންނެވެ.
މި އަހަރު އެއް މިލިއަން ޓޫރިސްޓުން އަންނާނެ ކަމަށް ބަޖެޓް ފޮތުގައި ޖަހާފައިވީ ނަމަވެސް ޓޫރިޒަމް މިނިސްޓްރީގެ އަމާޒަކީ 1.3 މިލިއަން ޓޫރިސްޓުން ގެނައުމެވެ. މި އަމާޒް ހާސިލުވާނެ ކަމުގެ ވަރަށް ބޮޑު އުންމީދެއް އެބައޮތް ކަމަށް ޓޫރިޒަމް މިނިސްޓްރީން ބުނެ އެވެ.
މި ވަގުތު ރާއްޖެ އަށް އެންމެ ގިނައިން ޓޫރިސްޓުން އަންނަނީ އިންޑިއާއިންނެވެ. އެ ގައުމުން މި އަހަރުގެ މިހާތަނަށް ދެ ލައްކަ ޓޫރިސްޓުން އައިސްފައި ވެ އެވެ. ދެވަނައިގައި އުޅޭ ރަޝިއާ އިން އައި ޓޫރިސްޓުންގެ އަދަދަކީ 177،000 އެވެ. ތިން ވަނަ އަށް އެންމެ ގިނަ ޓޫރިސްޓުން އައީ ޖަރުމަނުންނެވެ. އެ ގައުމުން 60،000 ޓޫރިސްޓުން އައިސްފައި ވެ އެވެ.
ކުރިއަށް އޮތީ ޕީކް ސީޒަން ކަމުން މި އަހަރު އެންމެ ގިނަ ޓޫރިސްޓުން އަންނާނެ ކަމަށް ޓޫރިޒަމް ދާއިރާގެ ފަރާތްތަކުން ލަފާ ކުރަނީ އަންނަ ނޮވެމްބަރާއި ޑިސެމްބަރު މަހުގަ އެވެ.
