ގައުމީ ފިލްމު އެވޯޑްސް ހަފުލާ އިއްޔެ ރޭ ނިންމައިލި އިރު، އެވޯޑަށް ހުށަހެޅި ކުރު ފިލްމުތަކާ ބެހޭ އެއްވެސް ވާހަކައެއް ނުދެކެވެ އެވެ. އެވޯޑަށް 11 ފީޗާ ފިލްމާއި ކުރު ހަ ފިލްމު ހުށަހެޅި އެވެ.
އެކަމަކު 21 ކެޓަގަރީއަކުން ފީޗާ ފިލްމުތަކަށް އެވޯޑް ދީ ނިންމާލި އިރު ކުރު ފިލްމްތަކަށް ވީ ގޮތެއް ނޭނގިގެން ބައެއް މީހުން ތިބީ ސުވާލު އުފެދިފަ އެވެ.
މި ފަހަރުގެ އެވޯޑަށް ހުށަހެޅި ކުރު ފިލްމުތަކުގެ ތެރެއިން ފަސް ފިލްމަކީ ރައްޔިތުންގެ މަޖިލީހުގެ އިހަވަންދޫ ދާއިރާގެ ޕީޕީއެމް މެމްބަރު މުހައްމަދު އަބްދުﷲ (މުހައްމާ) ޕްރޮޑިއުސްކޮށް، އެކްޓްކޮށްފައިވާ ފިލްމުތަކެވެ.
ނެޝަނަލް ސެންޓަ ފޮ ދި އާޓްސް (އެންސީއޭ) ހިންގެވުމާ ހަވާލުވެ ހުންނެވި ޔޫތު މިނިސްޓްރީގެ އެގްޒެކެޓިވް ކޯޑިނޭޓަރު މުހައްމަދު ފާރިޝް ތޯހާ ވިދާޅުވީ ކުރު ފިލްމުތަކަށް އެވޯޑް ނުދެވުނީ ގަވައިދުގައި ކަނޑައަޅާފައިވާ މިންގަނޑަށް ބައެއް ފިލްމުތައް ނުފެތޭތީ ކަމަށެވެ.
އެވޯޑަށް ހުށަހެޅި ފިލްމުތަކުގެ ތެރެއިން ދެ ފިލްމެއް ގަވައިދުގައި ބުނާ ވަރަށް ވުރެ ދިގެވެ. ގަވައިދުގައި ބުނާ ގޮތުން ކުރު ފިލްމެއް ނަމަ ކުރުވެގެން ފަސް މިނިޓް އަދި ދިގުވެގެން ހުންނަން ޖެހޭނީ 60 މިނިޓެވެ.
"އެކަމަކު ހުށަހެޅި ހަ ފިލްމުގެ ތެރެއިން ދެ ފިލްމެއް ކަނޑައަޅާފައި އޮތް ޑިއުރޭޝަނަށް ވުރެ ދިގުވީމަ، އެ ދެ ފިލްމު ޑިސްކޮލިފައިކުރީމާ އެވޯޑް ދެވޭކަށް ވެސް ނެތް. އެއީ މަދުވެގެން ހަ ފިލްމު ވާދަކުރަން ޖެހޭ އެވޯޑަށް،" ފާރިޝް ވިދާޅުވި އެވެ.
މި މައްސަލަ މިގޮތަށް ދިމާވުމުން އަލުން އިއުލާންކުރަން ވެސް އެންސީއޭ އިން ވިސްނި އެވެ. އެކަމަކު އެވޯޑްގެ މުއްދަތު ކައިރިވެފައި އޮތުމުން، ޕްރޮޑިއުސަރުންނަށް ވެސް އަލުން ފިލްމު ހުށަހަޅަން ދަތިވެދާނެތީ، މި ފަހަރު ކުރު ފިލްމުތަކަށް އެވޯޑް ނުދޭން ނިންމީ އެވެ.
މިފަހަރުގެ ފިލްމު އެވޯޑްސް ހާއްސަކުރީ 2011-2013 އަށް ރިލީޒްކުރި ފިލްމުތަކަށެވެ.
ފާރިޝް ވިދާޅުވީ އަންނަ އަހަރު ބާއްވާ ގައުމީ ފިލްމު އެވޯޑްސްގައި 2011-2013 އަށް ރިލީޒްވި ކުރު ފިލްމުތަކަށް އަލުން ފުރުސަތު ދޭނެ ކަމަށެވެ.
"އެކަހަލަ ގޮތަކަށް އަޅުގަނޑުމެން އެވޯޑް ހަފުލާ ދެން ފަހަރަކުން ބާއްވާނީ. ދެން ގަވައިދަށް އިސްލާހެއް ގެންނަން ޖެހޭ ކަމަށްވާ ނަމަ އެކަން ވެސް ކުރުމަށް ފަހު، ކުރު ފިލްމުތަކަށް އެވޯޑް ދޭނީ،" އޭނާ ވިދާޅުވި އެވެ.