ފުލުހުން ސެކިއުރިޓީ އުވާލުމާ އެކު ޕަންޖާބުގެ ރެޕާއެއް މަރާލައިފި

އިންޑިއާގައި، ޕަންޖާބަށް ނިސްބަތްވާ މަޝްހޫރު ރެޕާ، ސީދޫ މޫސް ވާލާ ގަޔަށް ބަޑި ޖަހައި މަރާލައިފި އެވެ.

މަންސާ ޑިސްޓްރިކްޓްގައި ހޮނިހިރު ދުވަހު ސީދޫގެ ބަޔަށް ބަޑި ޖަހައި މަރާލީ އޭނާގެ އެކުވެރިއަކާ އެކު ޕަންޖާބުގެ މޫސާ ވިލެޖަށް ދަނިކޮށެވެ. އެއީ އޭނާގެ އުފަން އަވަށެވެ.

ރިޕޯޓްތައް ބުނާ ގޮތުގައި އޭނާގެ އުޅަނދަށް އަމާޒުކޮށް 30 ފަހަރު ބަޑިޖެހި އެވެ. އެއީ ދުވާލުގެ ވަގުތެއްގަ އެވެ. އެއިން ހަމަލާތަކެއް ސީދޫގެ ގަޔަށް އަރައި ވަރަށް ބޮޑަށް ލޭ ފޭބި އެވެ. ހޮސްޕިޓަލަށް ގެންދިޔައިރު ވެސް އޮތީ މަރުވެފައި ކަމަށް ޑޮކްޓަރުންނާ ހަވާލާދީ މީޑިއާ އިން ބުނެފައިވެ އެވެ.

ކޮންގްރެސް ލީޑަރުކަން ވެސް ކުރަމުން ދިޔަ އުމުރުން 28 އަހަރުގެ ސީދޫ މަރާލީ ޕަންޖާބުގެ ފުލުހުން 424 މީހަކަށް ދެމުން އައި ސެކިއުރިޓީ އުވާލިތަނާ ހެންނެވެ. ސީދޫ އަކީ ވެސް ސެކިއުރިޓީ ލިބެމުން އައި މީހެކެވެ.

ބަގްވަންތު މަން ސަރުކާރުން އެގޮތަށް ނިންމީ ވީއައިޕީންނަށް ކުރާ ހަރަދުތައް ކުޑަކުރުމުގެ ގޮތުންނެވެ.

އެ ހާދިސާއާ ގުޅިގެން އޭނާގެ ސަޕޯޓަރުންނާއި ބޮލީވުޑްގެ ތަރިން ވެސް ދަނީ ހިތާމަފާޅުކުރަމުންނެވެ.

އޭނާ މަރާލުމުގެ ދެ ހަފްތާ ކުރިން ވަނީ "ދަ ލާސްޓް ރައިޑް" ގެ ނަމުގައި ލަވައެއް ވެސް ނެރެފަ އެވެ.