"ކަވާލާ" ލަވައިގެ މަންޒަރެއްގައި ރަޖުނީކާތު އާއި ތަމަންނާ ބާޓިއާ.
28 ޖުލައި 2023 - 07:30
ދެކުނު އިންޑިއާގެ ސިނަމާގައި މަޝްހޫރު ތަރިން ކަމަށްވާ ރަޖުނީކާތު އާއި ތަމަންނާ ބާޓިއާ އެކުގައި ކުޅުނު ލަވަ "ކަވާލާ" އަށް ލިބޭ ތަރުހީބު ބޮޑުވެއްޖެ އެވެ.
އެ ލަވައަކީ ރަޖުނީކާތު އާއި ތަމަންނާ އެކުގައި ކުޅޭ ތަމަޅަ ފިލްމު "ޖެއިލާ"ގެ ލަވައެކެވެ. އެއީ އަންނަ މަހު 10 ގައި ސިނަމާތަކުގައި އަޅުވާ ފިލްމެކެވެ.
"ކަވާލާ" ފުލް ވީޑިއޯ ލަވަ އަދި ނުނެރެ އެވެ. އެ ލަވައިގެ ލިރިކަލް ވީޑިއޯ ޔޫޓިއުބަށް ދޫކޮށްލީ މީގެ ދެ ހަފުތާ ކުރިންނެވެ. އެ ލަވައަށް މިހާތަނަށް 75 މިލިއަނަށް ވުރެ ގިނަ ވިއުސް ލިބިފައިވެ އެވެ.
އެ ލަވަ ވައިރަލް ވުމުން، އިއްޔެ ވަނީ އޭގެ ހިންދީ ވާޝަން ވެސް ނެރެފަ އެވެ. ހިންދީ ލަވައަށް ކިޔަނީ "ތޫ އާ ދިލްބާރާ" އެވެ.
ތަމަޅަ ލަވަ ކިޔާފައި ވަނީ ޝިލްޕާ ރާއޯ އާއި އަނިރުދު ރަވިޗަންދުރަ އެވެ. އަދި ހިންދީ ލަވަ ކިޔާފައި ވަނީ ސިންދޫ ސްރިނިވާސަން އާއި އަނިރުދެވެ.
ނެލްސަން ދިލިޕްކުމާރް ޑައިރެކްޓުކުރާ "ޖެއިލާ" އަކީ ރަޖުނީކާންތުގެ ސްޓައިލްގެ އެކްޝަން ކޮމެޑީ ފިލްމެކެވެ.
Copyright © 2024 Mihaaru · Terms and Conditions · Privacy Policy