ޖަޔާ ރުޅިއައިސް މީހެއް ގައިގައި ޖަހައިފި

ބޮލީވުޑްގެ އެކްޓްރެސް އަދި އިންޑިއާގެ މަޖިލިސް މެމްބަރު ޖަޔާ ބައްޗަން ރުޅިއައިސް މީހެއް ގައިގައި ޖަހައިފި އެވެ.

ސޯޝަލް މީޑިއާގައި މިހާރު އާންމުވެފައިވާ ވީޑިއޯއަކުން ފެންނަ ގޮތުގައި، ޖަޔާގެ ފޭނެއް ކަމަށް ބެލެވޭ މީހަކު އޭނާއާ އެކު ސެލްފީއެއް ނަގަން ކައިރިވުމާއެކު ޖަޔާ ވަނީ އެ މީހާ ކޮއްޕާލައި އޭނާ ގައިގައި ޖަހައިފަ އެވެ.

"ކަލޭ ކީއްތިކުރަނީ؟ މިއީ ކޮންފަދަ ކަމެއް،" ޖަޔާ ރުޅިއައިސްގެން އެ މީހާއާ ދިމާލަށް ބުންޏެވެ.

ޖަޔާއަކީ އަބަދުވެސް އޭނާގެ ފޭނުންނާއި ޕަޕަރާޒީންނާ ވެސް ވަރަށް ރުންކުރުކޮށް މުހާތަބުކޮށް އުޅޭ މީހެކެވެ. އަދި ޕަޕަޒާރީން އޭނާގެ ފަހަތުން ދާތީ އަބަދުވެސް ރުޅިއައިސްގެން އޭނާ އެކަމާ ހިތްހަމަނުޖެހޭކަން އަންގަ އެވެ.

ޖަޔާ އެގޮތަށް ކަންތައްތައް ކުރާތީ އާންމުންގެ ފާޑުކިޔުން އޭނާއަށް ވަރަށް ބޮޑަށް ލިބެ އެވެ.

މި ވީޑިއޯ އާންމުވުމާއެކު މިފަހަރު ޖަޔާއަށް އެންމެ ބޮޑަށް ފާޑުކިޔާފައި ވަނީ ބޮލީވުޑްގެ އެކްޓްރެސް އަދި އިންޑިއާގެ މަޖިލިސް މެމްބަރު ކަންގަނާ ރަނާވަތެވެ.

ކަންގަނާގެ އިންސްޓަގްރާމް ސްޓޯރީގައި މި ވީޑިއޯ އިއްޔެ ޕޯސްޓުކޮށް އޭނާ ބުނީ ޖަޔާއަކީ "ނުލަފާ އަންހެނެއް" ކަމަށެވެ.

"ނުބައިނުލަފާ އަދި ވަރަށް ބޮޑާ އަންހެނެއް. މީހުން އޭނާގެ މި އަމަލުތައް ތަހައްމަލުކުރަނީ އޭނާއަކީ އަމީތާބް ބައްޗަންގެ އަނބިމީހާއަށް ވީމަ،" ކަންގަނާ ބުންޏެވެ.