"ކަޕިލް ޝަރުމާ ޝޯ" ހަމައަކަށް އަޅުވަން މަސްދުވަހުގެ މުހުލަތެއް

ސޮނީ ޓީވީގެ މަޝްހޫރު "ދަ ކަޕިލް ޝަރުމާ ޝޯ" ގެ އެންމެ މުހިއްމު ދެ ކޮމޭޑިއަނުން ކަމަށްވާ ކަޕިލް އާއި ސުނިލް ގްރޯވަރުގެ ދެމެދުގައި ބޮޑު އަރާރުމެއް ހިނގުމަށް ފަހު ސުނިލް އެ ޝޯގައި ބައިވެރިނުވާން ނިންމާފައިވާ ކަމަށް އިންޑިއާގެ ނޫސްތަކުން ބުނެ އެވެ. އަދި ސުނިލްއާ އެއްބައިވަންތަކަން ދެއްކުމުގެ ގޮތުން އަލީ އަސްގަރް އާއި ޗަންދަން ޕްރަބާކަރް އަދި ސުގަންދާ މިޝްރާ ވެސް ވަނީ ކަޕިލްގެ ޝޯގެ ޝޫޓިންތައް ބޮއިކޮޓް ކޮށްފަ އެވެ.

ކަޕިލް ޝަރުމާ ޝޯ އަކީ ޓީމެއްގެ މަސައްކަތް ވަރަށް ފުރިހަމައަށް ފެނިގެން ދިޔަ ޝޯ އެކެވެ. އެހެންކަމުން އެ ޓީމުގެ ހަތަރު މެމްބަރަކު ޝޯއާ ދުރަށް ދިއުމުން ޝޯގެ ފުރިހަމަކަން ވަނީ ގެއްލިފަ އެވެ. އެންމެ ފަހުން ދެއްކި ގިނަ އެޕިސޯޑްތަކުގައި ކުރިން މި ޝޯގައި ހުރި މަޖާކަމެއް އެއްގޮތަކަށް ވެސް ނެތްކަމަށް ގިނަ ބަޔަކު ބުނެފައިވެ އެވެ. ނަތީޖާއެއްގެ ގޮތުން، ޝޯ އަކަށް ފަހު ޝޯއެއްގެ ޓީއާރުޕީ ވެސް ވަނީ ވެއްޓިފަ އެވެ.

ކަޕިލްއާ އެކު ސޮނީން މި ޝޯ ދެއްކުމަށް މިދިޔަ އަހަރުގެ އެޕްރީލް މަހުގެ 28 ވަނަ ދުވަހު ސޮއިކުރި 106 ކްރޯޑު (10.6 ބިލިއަން ރުޕީޒް)ގެ އެގްރިމެންޓް މި މަހު ހަމަވާއިރު އަލުން އެގްރިމެންޓް އާ ނުކުރަން ސޮނީގެ އިސް ވެރިން ދަނީ ވިސްނަމުންނެވެ. ސަބަބަކީ ކަޕިލް އާއި ސުނިލްގެ އަރާރުމުގެ ސަބަބުން އެ ޝޯ އާއި ޗެނަލް އަށް ވެސް ހުތުރު ނަން ލިބި މީހުންގެ މަލާމާތް ރައްދުވެފައި ވާތީ އެވެ. އޭގެ އިތުރުން ސުނިލް އާއި އެހެން ބައެއް ބައިވެރިން އަލުން ޝޯ ގައި ބައިވެރިވުމާ ދެކޮޅު ހެދުމުގެ ސަބަބުން ވެސް ސޮނީން ވަނީ ވަރަށް ހިތްހަމަނުޖެހިފަ އެވެ.

އިންޑިއާގެ ބައެއް ނޫސްތަކުން އާދިއްތަ ދުވަހު ބުނި ގޮތުގައި އަލުން ޝޯ ހަމައަކަށް އަޅުވައި ދިރުވަން ކަޕިލް އަށް ސޮނީން މިހާރު ވަނީ އެއްމަސް ދުވަހުގެ މުއްދަތެއް ދީފަ އެވެ. އެ މުއްދަގެ ތެރޭގައި ކުރީގެ ފެންވަރުގެ އެއްޗަކަށް އެ ޝޯ ނުހެދިއްޖެ ނަމަ ކަޕިލްއާ އެކު އަލުން އެގްރިމެންޓް އާ ނުކުރާނެކަމަށް ވެސް ސޮނީން ކަޕިލް އަށް އަންގާފައިވާ ކަމަށްވެ އެވެ.

ނަމަވެސް ސުނިލް އާއި ޓީމުގެ ގިނަ މެމްބަރުންނާ ނުލައި ކަޕިލް އަށް އަލުން މި ޝޯ ދިރުވިދާނެ ކަމާ މެދު ޝައްކެވެ. ސަބަބަކީ ސުނިލްގެ ޓީމުގެ ބަދަލުގައި މިހާތަނަށް ގެނެސްފައިވާ އެއްވެސް ކޮމޭޑިއަން އަކަށް އެހާ މޮޅަށް ޕާފޯމްކޮށް ބެލުންތެރިން ހެއްވާލެވޭގޮތް ވެފައި ނުވާތީ އެވެ.

ކަޕިލް އާއި އޭނާގެ ޓީމުގެ ބައެއް މެމްބަރުންގެ މެދުގައި މައްސަލަ ޖެހުނީ އެމީހުން އޮސްޓްރޭލިއާގެ މެލްބަންގައި ޝޯއެއް ދިނުމަށްފަހު އިންޑިއާ އަށް އެނބުރި ދިޔަ ފްލައިޓް ތެރޭގައި ކަޕިލް ރާ ބޮއެ މަސްތުވެގެން އިނދެ ސުނިލް އާއި ޓީމުގެ މެމްބަރުންތަކެއްގެ ގަޔަށް ބޮލަށް އަރައި މާރާމާރީ ހިންގައި ހަޑި ހުތުރު އެއްޗެހި ގޮވުމުންނެވެ.

"ދަ ކަޕިލް ޝަރުމާ ޝޯ"ގެ ރޫހަކީ ސުނިލް އެ ޝޯގައި ކުޅޭ ޑރ. މަޝްހޫރު ގުލާޓީ އާއި ރިންކޫ ބާބީ ފަދަ ރޯލުތައް ކަމަށް އެ ޝޯ އާއްމުކޮށް ބަލާ ގިނަ ބަޔަކު ގަބޫލު ކުރެ އެވެ. އެހެންކަމުން ސުނިލްއާ ނުލައި ޝޯގައި ފުރާނައެއް ނެތެވެ.

ކަޕިލް ޝޯގައި ބައިވެރި ނުވިޔަސް ސޮނީން ދައްކާ "އިންޑިއަން އައިޑަލް"ގެ މިފަހަރުގެ ސީޒަންގެ ގްރޭންޑް ފިނާލޭ ގައި ސުނިލް ޕާފޯމް ކުރާނެ އެވެ. ފަހަރެއްގައި މިއީ ސޮނީ ޗެނަލަށް ސުނިލް ޕާފޯމްކޮށްދޭ އެންމެ ފަހު ޕްރޮގްރާމަށް ވުމަކީ އެކަށީގެންވާ ކަމެކެވެ.