ފިލްމުތަކަށް ލަވަކިޔުން ހުއްޓާލި އިންޑިއާގެ މަޝްހޫރު ލަވަކިޔުންތެރިޔާ އަރްޖިތު ސިންގް އުޅެނީ ސިޔާސީ ދާއިރާއަށް ނުކުންނަން ކަމަށް ރިޕޯޓްތައް ބުނެފި އެވެ.
އިންޑިއާގެ އެންޑީޓީވީގެ ރިޕޯޓެއްގައި ބުނީ އަރްޖިތު އަމިއްލަ ސިޔާސީ ޕާޓީއެއް އުފެއްދުމަށް ވިސްނަމުން އަންނަ ކަމަށެވެ.
މި އަޑުތައް ފެތުރުނީ އަރްޖިތު ފިލްމުތަކަށް ލަވަކިޔުން ހުއްޓާލިކަން ސޯޝަލް މީޑިއާ މެދުވެރިކޮށް، މިދިޔަ އަންގާރަ ދުވަހު އިއުލާން ކުރުމާ ގުޅިގެންނެވެ.
އޭނާގެ "ސިޔާސީ ރޭވުންތައް" ސިއްރުކޮށްފައި ވިޔަސް، ސިޔާސީ ދާއިރާއިން ކުރިއަށް ދިއުމަށް މަސައްކަތް މިހާރު ފަށާފައިވާ ކަމަށް، އޭނާއާ ގާތް މީހުންނާ ހަވާލާދީ އެންޑީޓީވީގެ ރިޕޯޓުގައި ބުންޏެވެ.
އިންޑިއާގައި މިވަގުތު ހުރި އެންމެ މަގުބޫލު އަދި އެންމެ ކާމިޔާބު ފިރިހެން ލަވަކިޔުންތެރިޔާއަށް ވިޔަސް، އަރްޖިތަކީ އޭނާގެ އުފަން ރަށް ކަމަށްވާ މުރުޝިދުއާބާދުގެ ޖިއާގަންޖްގައި ވަރަށް އާދައިގެ ދިރިއުޅުމެއް އުޅެމުން އަންނަ މީހެކެވެ.
އެ ރިޕޯޓްތައް ބުނި ގޮތުގައި، އަރްޖިތު މި އަހަރު ވެސްޓް ބެންގާލްގެ މަޖިލިސް އިންތިހާބުގައި ވާދައެއް ނުކުރާނެ އެވެ. އޭގެ ބަދަލުގައި އޭނާ ގަސްތުކުރަނީ ކުދި، ލޯކަލް އިންތިހާބުތަކުން ފަށައިގެން "ގްރާސްރޫޓް" ލެވެލްގައި މަސައްކަތް ކުރަން ކަމަށް އެ ރިޕޯޓުގައި ބުންޏެވެ.
ފިލްމުތަކަށް ލަވަކިޔުން ހުއްޓާލިކަން ކުއްލި ގޮތަކަށް އަރްޖިތު އިއުލާންކުރުމާ އެކު، އޭނާގެ ފޭނުންނަށް ވަނީ ބޮޑު ސިހުމެއް ލިބިފަ އެވެ. ނަމަވެސް، ފޭނެއް ކުރި ކޮމެންޓަކަށް ދިން ރިޕްލައިގައި އަރްޖިތު ބުނެފައި ވަނީ އޭނާ މިއުޒިކް އުފެއްދުން އެއްކޮށް ހުއްޓާލަނީ ނޫން ކަމަށެވެ.
އަރްޖިތަކީ މިހާރު އިންޑިއާގެ މިއުޒިކް އިންޑަސްޓްރީގައި އެންމެ ބޮޑު އެއް ނަމެވެ. ބޮލީވުޑްގެ ކޮންމެ ފިލްމެއްގައިހެން އޭނާގެ ލަވައެއް ހިމެނެ އެވެ.
އިންޑިއާގެ ރިއަލިޓީ ޝޯ "ފޭމް ގްރުކުލް"ގައި 2005 ވަނަ އަހަރު ބައިވެރިވި، އިންޑިއާގެ ވެސްޓް ބެންގޯލްއަށް އުފަން އަރްޖިތު ބޮޑަށް މަޝްހޫރުވީ 2013 ވަނަ އަހަރު ނުކުތް ބޮލީވުޑްގެ ފިލްމު "އާޝިގީ 2"އަށް ކިޔައިދިން ލަވަ "ތުމް ހީ ހޯ" އިންނެވެ. އޭގެ ފަހުން "ޗަންނާ މޭރެޔާ" އާއި "ރާބްތާ" އާއި "ކޭސަރިޔާ" އަދި "ގެރުއާ" ކަހަލަ މަޝްހޫރު އެތައް ލަވައެއް އޭނާ ފިލްމުތަކަށް ކިޔައިދީފައިވެ އެވެ.