ކްރިތީ ޝެނޮން އަށް މަލާމާތްކޮށް ހަދާފައިވާ އިންސްޓަގްރާމް ޕޯސްޓަކަށް ލައިކް ދެވުނީ އޮޅުމަކުން ކަމަށް ޔާމީ ގޯތަމް ބުނެފި އެވެ.
މި މަހު އެކެއްގައި ބޭއްވި ޒީ ސިނޭ އެވޯޑްސްގައި ފިލްމު "ތޭރޭ އިޝްގް މޭ" އިން އެންމެ މޮޅު އެކްޓްރެސްގެ އެވޯޑް ކްރިތީއަށް ލިބުމާ ގުޅިގެން، އެއީ އިންސާފެއްތޯ ސުވާލު އުފައްދާފައިވާ ވީޑިއޯއަކަށް ޔާމީ ލައިކް ދިން މައްސަލަ ވަނީ ވަރަށް ބޮޑަށް ހޫނުވެފަ އެވެ. ސޯޝަލް މީޑިއާގައި ދައުރުވި އެ ވީޑިއޯގައި ބުނެފައި ވަނީ އެ އެވޯޑު ލިބުން އެންމެ ބޮޑަށް ހައްގީ ފިލްމު "ހައްގު" އިން ޔާމީއަށް ކަމަށެވެ.
މި މައްސަލަގަނޑާ ގުޅިގެން ޔަމީ އެކްސްގައި ކުރި ޕޯސްޓެއްގައި ވަނީ އޭނާގެ މަގުސަދަކީ އެހެން ފަންނާނަކަށް ދެރަބަހެއް ބުނުން ނޫން ކަން ހާމަކޮށްފަ އެވެ.
ޔަމީ ބުނީ ކޮންމެ ދުވަހަކު ވެސް އެތައް ޕޯސްޓެއްގައި އޭނާ ޓެގް ކުރާ ކަމަށާއި، އެ ވީޑިއޯއަށް ލައިކް ދެވުނީ އެއްވެސް ގަސްދަކާ ނުލައި، އޮޅުމަކުން ކަމަށެވެ.
އޭނާގެ އެއްވެސް ޕީއާރު ޓީމެއް ނޯންނަ ކަމަށާއި، ކެރިއަރުގެ މިހާތަނަށް ދުވަހަކު ވެސް މަޝްހޫރުކަން ހޯދުމަށް "އަގުހެޔޮ ޕީއާރް އުކުޅުތައް" ބޭނުންކޮށްފައި ނުވާނެ ކަމަށް ޔަމީ ބުންޏެވެ.
ޔަމީ ބުނީ އެވޯޑް ހަފުލާތަކާ މެދު އޭނާ ދެކޭ ގޮތް މީގެ ކުރިން ވެސް ސާފުކޮށްދީފައި ވާނެ ކަމަށެވެ.
އޭނާ ގަބޫލުކުރާ ގޮތުގައި އެވޯޑެއް ލިބުމަކީ މީހެއްގެ ހުނަރު ވަޒަންކުރަން އޮތް ހަމައެކަނި ގޮތެއް ނޫނެވެ.
"މިފަދަ ދަށު ދަރަޖައިގެ ގޮސިޕްތަކަށް ޖާގަ ދިނުމުގެ ބަދަލުގައި، އަހަރެން މި ދާއިރާގައި ބިނާކޮށްފައިވާ އަބުރާއި އިއްޒަތަށް އިހުތިރާމް ކުރުމަށް އުންމީދު ކުރަން،" ޔާމީ ބުންޏެވެ.
ޔާމީ ބުނީ އޭނާގެ ފޯކަސް ހުރީ ހަމައެކަނި މަސައްކަތަށް ކަމަށާއި އެހެން ފަންނާނުންގެ ކާމިޔާބީއަށް ހުރަސްއެޅުމުގެ އެއްވެސް ނިޔަތެއް ނެތް ކަމަށެވެ.