ބޮލީވުޑްގެ ޑައިރެކްޓަރު އިމްތިއާޒު އަލީގެ ކުރިއަށް އޮތް ފިލްމު "ހީރް ރާންޖާ"ގެ ލީޑު ރޯލަށް ޒުވާން އެކްޓަރު ރޯހިތު ސަރަފް ހަމަޖައްސައިފި އެވެ.
ރިޕޯޓްތައް ބުނި ގޮތުގައި، "މިސްމެޗްޑް" އާއި "ލޫޑޯ" އަދި "ޑިއާ ޒިންދަގީ" ކަހަލަ ކާމިޔާބު އުފެއްދުންތަކުން ބޮޑު މަގުބޫލު ކަމެއް ހޯދާފައިވާ ރޯހިތު މި ފިލްމުގައި ކުޅޭނީ ރަންޖާގެ ރޯލެވެ.
އެ ފިލްމުގައި އޭނާއާ އެކު ހީރްގެ ރޯލުން ފެންނާނީ ބޮލީވުޑަށް އަލަށް ތައާރަފުވާ އާ މޫނެކެވެ. މީގެ ކުރިން ސާރާ އަރުޖޫން އެ ރޯލަށް ހަމަޖެހުނު ކަމަށް އަޑު ފެތުރުނު ނަމަވެސް، ފިލްމުގެ ޓީމުން މުޅިން އާ އެކްޓްރެސްއަކަށް ފުރުސަތު ދިނުމަށް ނިންމާފައިވާ ކަމަށް ރިޕޯޓްތައް ބުންޏެވެ.
ކްލެސިކް ލޯބީގެ ހަގީގީ ވާހަކައެއްގެ މައްޗަށް ބިނާކޮށް އުފައްދާ މި ފިލްމު ޑައިރެކްޓްކުރަނީ 2018 ވަނަ އަހަރު "ލައިލާ މަޖްނޫ" އުފެއްދި ސާޖިދު އަލީ އެވެ. އަދި ފިލްމުގެ މައިގަނޑު ވާހަކަ އާއި ސްކްރީންޕްލޭ ލިޔެފައި ވަނީ އޭނާގެ ބޭބެ މަޝްހޫރު ޑައިރެކްޓަރު އިމްތިއާޒެވެ.
ބާލާޖީ މޯޝަން ޕިކްޗާސްގެ ދަށުން އެކްތާ ކަޕޫރާއި އިމްތިއާޒް ގުޅިގެން ޕްރޮޑިއުސްކުރާ މި ފިލްމުގެ އަމަލީ މަސައްކަތްތަކާއި ޝޫޓިން ފެށުމަށް ހަމަޖެހިފައި ވަނީ އަންނަ ސެޕްޓެމްބަރު މަހުގެ ފުރަތަމަ ހަފްތާގައި ކަމަށް ރިޕޯޓްތައް ބުންޏެވެ.
މި ފިލްމަކީ "ލައިލާ މަޖްނޫ" ސިނަމާތަކުގައި އަލުން އަޅުވައި ލިބުނު ބޮޑު ތަރުހީބަށް ފަހު، މި އަހަރުގެ ލޯބިވެރިންގެ ދުވަހާ ދިމާކޮށް މިދިޔަ ފެބްރުއަރީ މަހު އިއުލާންކުރި ފިލްމެކެވެ.
"ހީރް ރަންޖާ" ވާނީ އިހުގެ ވާހަކައެއް ޒަމާނީ މިއުޒިކަލް އަދި އަސަރުގަދަ ސިނެމަޓިކް އަދަބީ އުފެއްދުމެއްގެ ގޮތުގައި ބެލުންތެރިންނާ ހަމައަށް ގެނެސްދޭނެ ފިލްމަކަށް ކަމަށް ރިޕޯޓްތައް ބުންޏެވެ.
ފިލްމު ރިލީޒްކުރާ ދުވަހެއް އަދި އިއުލާނެއް ނުކުރެ އެވެ.