ސުނިލް ގްރޯވަރާ ޖެހުނު މައްސަލަ ކަޕިލް ޝަރުމާ ކިޔައިދީފި

ސޮނީ ޓީވީން ދެއްކި ވަރަށް މަޖާ އެހާމެ މަޝްހޫރު ކޮމެޑީ ޝޯ "ދަ ކަޕިލް ޝަރުމާ ޝޯ" ގެ ހޯސްޓް ކަޕިލް ޝަރުމާ އާއި އެ ޝޯގެ މުހިއްމު ބައިވެރިއެއް ކަމަށްވާ ސުނިިލް ގްރޯވަރާ ޖެހުނު މައްސަލަތަކާއި އޭގެ ފަހުން އޭނާއާ ދޭތެރޭ ކަންތައްތައް ދިމާވި ގޮތް ކަޕިލް ފުރަތަމަ ފަހަރަށް މީޑިއާއާ ހިއްސާކޮށްފި އެވެ.

ކަޕިލް އަލަށް އުޅުނު "ފިރަންގީ"ގެ ޓްރެއިލާ ނެރުމަށް ބޭއްވި އިވެންޓެއްގައި ކަޕިލް ވަނީ ސުނިލްއާ ޖެހުނު މައްސަލައިގެ ސަބަބުން އޭނާއަށް ނަފްސާނީ ގޮތުން ލިބުނު ހިތްދަތިކަމާއި ޑިޕްރެޝަނަށް ގޮސްގެން ދިޔަ ގޮތް ވެސް ކިޔައިދީފަ އެވެ.

އޭނާ ބުނި ގޮތުގައި އޮސްޓްރޭލިއާގައި ޝޯތަކެއް ދިނުމަށް ފަހު އޭނާ އާއި ޓީމުގެ އެހެން މެމްބަރުންނާއި ކުރޫ އިންޑިއާ އަށް ދަތުރުކުރި ފްލައިޓް ތެރޭގައި ހިނގި އަރާރުމާ ގުޅިގެން އޭނާގެ އެންމެ ގާތް މީހުންގެ ތެރޭގައި ހިމެނުނު ސުނިލް އާއި އެހެން ބައެއް ބައިވެރިން އޭނާ ދޫކޮށްލާފައި ދިއުމުން ވަރަށް ބޮޑު ހިތާމައެއް އޭނާއަށް ލިބުނެވެ. އަދި އެ ދިމާވި ކަންތައްތަކުން ވީ ދެރައިން ބަނގުރަލުގެ ޝިކާރައަކަށް ވީ ގޮތާއި އަމިއްލައަށް މަރުވުމުގެ ވިސްނުން ވެސް ގެންގުޅެވުނުކަމަށް ކަޕިލް ވަނީ އެއްބަސް ވެފަ އެވެ.

އޭނާގެ ހިތުގެ ވޭންތައް އިތުރަށް ބޮޑުވެގެން ދިޔައީ ސުނިލް އާއި ބައެއް މެމްބަރުން ޝޯއިން ވަކިވުމުން، ކުރިން ޓޮޕް 10 ގައި އޮތް އޭނާގެ ޝޯގެ ޓީއާރުޕީ ކުއްލިއަކަށް ވަރަށް ބޮޑަށް ވެއްޓުނީމަ އެެވެ.

"އަހަރެންގެ ވަރަށް ގާތް އެކުވެރިއަކު އޭނާގެ މޫދުކައިރީގައި ހުންނަ އެޕާޓްމަންޓަށް އަހަރެން ގެންދިޔަ. އެއީ މާހައުލު ބަދަލުކޮށްލީމަ ވެސް އަހަރެންގެ ޑިޕްރެޝަން މައްސަލަތައް ލުއިވެދާނެކަމުގެ އުންމީދުގައި. ނަމަވެސް އެ އެޕާޓްމަންޓުން ބޭރު ފެންނައިރު މާދުރަށް ފެތުރިފައި އޮތް ކަނޑު ފެނުނީމަ ވެސް ހިތަށް އެރީ ކަނޑަށް ފުންމާލަންވީއޭ. އޭރު އަހަރެންގެ ޑިޕްރެޝަން ގޮސް ހުރި ހިސާބު އެއީ،" މިޑް-ޑޭ އާ ވާހަކަ ދައްކަމުން ކަޕިލް ބުންޏެވެ.

ސިއްހީ މައްސަލަތައް ބޮޑުވެ ކަޕިލް އަށް ޝޯ ހޯސްޓް ނުކުރެވޭ ހިސާބަށް ދިޔަ އެވެ. މިއީ ވެސް ކަޕިލްގެ ހިތާމަތަކުގެ ތެރެއަށް އިތުރުވި ކަމެކެވެ. ނަމަވެސް ޝޯތަކުގެ ޝޫޓިން އޭނާ ކެންސަލްކުރީ ގަސްތުގައި ނޫން ކަމަށް ކަޕިލް ބުންޏެވެ.

މި ހުރިހާ ކަމެއްގެ ޒިންމާ ކަޕިލް ނެގިޔަސް އޭނާގެ ހިތުގައި ވެސް ބައެއް ޝަކުވާ އެބަހުއްޓެވެ. މަތިންދާބޯޓުގައި ހިނގި ޒުވާބެއްގައި ބޫޓު ކިބަ ނަގައި ސުނިލްއާ ދިމާލަށް ހޫރާލުމަކީ އޭނާގެ ކުށެއް ކަމަށް ކަޕިލް ގަބޫލު ކުރެ އެވެ. އަދި އެކަމަށް މައާފަށް އެދެން ވެސް އޭނާ ވަރަށް މަސައްކަތް ކުރި އެވެ.

ކަޕިލް ބުނި ގޮތުގައި އެހެން ނޫނީ އޭނާ ނޫޅޭ ގޮތަކަށް އުޅުމުން އޭނާގެ އެކުވެރިން ސުވާލުކޮށް ވެގެން އުޅޭ ގޮތް އޮޅުން ފިލުވާކަށް އެންމެ ފަހަރަކު މަސައްކަތް ކޮށްފައެއް ނުވެ އެވެ.

"އަހަންނާއި ސުނިލް އެކުގައި ޝޯގައި މަސައްކަތްކުރާތާ ފަސް އަހަރު ވެއްޖެ. ސުނިލް ވެސް އެންމެ ފަހަރަކު ނަމަވެސް އަހަރެން ކައިރީ ވެގެން އުޅޭ ގޮތް ސާފުކޮށްލަން އަހާލި ނަމަ ކީއް ވާނީ. ކޮންމެ ގޮތަކަށް ކަންތައްތައް ވެފައި ވިޔަސް އަދިވެސް އަހަރެން އޭނާ ދެކެ ވަރަށް ލޯބިވޭ،" ކަޕިލް ބުންޏެެވެ.

ކަޕިލް ބުނި ގޮތުގައި އޭނާގެ މޫޑު އެ ދުވަސްކޮޅު ވަރަށް ގޯސްވެފައި ހުރީ ވަރަށް ގާތް އެކުވެރިއެއްގެ ކުއްލި މަރުގެ ސަބަބުން ލިބުނު ހިތާމައިގައި ކަމަށެެވެ.