ތާރީހީ ރޯލެއް ކުޅެން އަޖޭ ދޭވްގަން އަށް ފުރުސަތެއް

ބޮލީވުޑްގައި ބައޮގްފަރިކަލް ޑްރާމާތައް ހަދަން އުފެދިފައިވާ ފޯރީގެ ތެރެއިން އަނެއްކާ ވެސް އިންޑިއާގެ ތާރީހުގައި ފާހަގަކޮށްލެވޭ ޝަހުސިއްޔަތެއްގެ ވާހަކަ ކިޔައިދޭ ފިލްމެއް ހަދަން ނިންމައިފި އެވެ.

މި ފިލްމަކީ އުސްތާޒެއްގެ ގޮތުގައި މަޝްހޫރުވި 4 ވަނަ ގަރުނުގެ އިލްމުވެރިޔާ ޗަނަކިއާގެ ވާހަކަ ކިޔައިދޭ ފިލްމެކެވެ. އޭނާއަކީ ޕޮލިޓިކަލް ސައިންސާއި އިގުތިސާދީ ދާއިރާގެ ފަންނުވެރިއެއް ވެސް މެ އެވެ.

ޗަނަކިއާގެ ވާހަކަ ބޮޑު ސްކްރީނަށް ގެނެސްދޭ އިރު، އޭނާގެ ރޯލުން ފެނިގެން ދާނީ އަޖޭ ދޭވްގަން އެވެ. އަދި ފިލްމްގެ ޑައިރެކްޓަރަކީ އިންޑިއާގެ މަޝްހޫރު ކްރިކެޓް ތަރި އެމްއެސް ދޯނީގެ ބައޮޕިކް "އެމްއެސް ދޯނީ: ދި އިންޓޯލްޑް ސްޓްރީ" ގެނެސް ދިން ނީރަޖް ޕާންޑޭ އެވެ.

އޭނާ ބުނީ ޗަނަކިއާގެ ވާހަކަ އަށް ފިލްމެއް ހަދަން އޭނާ އޭގެ ސްކްރިޕްޓްގެ މަސައްކަތް ކުރާތާ މިހާރު ދުވަސްތަކެއްވެއްޖެ ކަމަށެވެ.

"އަހަންނަށް ވަރަށް ޔަގީން ޗަނަކިއާގެ ރޯލުން އަޖޭ އޯޑިއަންސާ ބައްދަލު ކުރާ އިރު، ފިލްމް ބެލުންތެރިންނަށް ވަރަށް ކަމުދާނެކަން،" މި އަހަރު "އައްޔާރީ" ވެސް ގެނެސް ދިން ޑައިރެކްޓަރު ބުންޏެވެ.

ނީރަޖް ބުނި ގޮތުގައި ޗަނަކިއާގެ ތާރީހަކީ އިންޑިއާގެ މިހާރުގެ ޖީލާ ހަމައަށް ގެނެސް ދޭން ޖެހޭ ވާހަކައެކެވެ. އެހެންވެ ބޮޑު ސްކްރީންގައި އެ ފިލްމް ވަރަށް ފުރިހަމަ އަށް އިންސާފުކޮށް ދޭނެ ކަމަށް ބުންޏެވެ.

އަނެއްކޮޅުން އަޖޭ ވެސް ހުރީ ޗަނަކިއާގެ ރޯލް ކުޅެން ލިބުމުން ވަރަށް އުފަލުންނެވެ. އޭނާ ބުނީ އެ ރޯލް ކުޅެލަން ކެތްމަދުވެފައިވާ ކަމަށާއި ނީރަޖްއަކީ ވަރަށް ވެސް މޮޅު ޑައިރެކްޓަރެއް ކަމަށެވެ.

"ނީރަޖަކީ އަބަދުވެސް އަހަންނަށް ވަރަށް ކަމުދާ ޑައިރެކްޓަރެއް. އޭނައާ އެކު މަސައްކަތްކޮށްލަން ލިބުމަކީ ވެސް ފަހުރެއް،" އަޖޭ ބުންޏެވެ.

ޗަނަކިއާ ބެލުންތެރިންނަށް ގެނެސް ދޭނީ ނީރަޖްގެ ކުންފުނި ފްރައިޑޭ ފިލްމްވޯކްސް އާއި ރިލަޔަންސް އެންޓަޓައިންމަންޓް އަދި ޕްލޭން ސީ ގުޅިގެންނެވެ.

އެކަމަކު ފިލްމްގައި ދެން ހިމެނޭ ކާސްޓުންނާއި ޝޫޓިން ފަށާނެ އިރަކާއި ރިލީޒް ކުރާނެ ތާރީހެއް އަދި އިއުލާނެއް ނުކުރެ އެވެ.

އަޖޭ ދެން އެންމެ އަވަހަށް ފެނިގެން ދާނީ ޑިސެމްބަރު 7 ގައި ރިލީޒް ކުރާ ކޮމެޑީ ފިލްމް "ޓޯޓަލް ދަމާލް" އިންނެވެ.