އަޖޭ ދޭވްގަންގެ "ދުރިޝްޔަމް" ފްރެންޗައިޒްގެ ފަހު ބައި "ދުރިޝްޔަމް 3: ދަ ކޮންކްލޫޝަން" ސިނަމާތަކަށް ނެރުނު ފުރަތަމަ ދުވަހު ބޮކްސް އޮފީހުގައި ތާރީޚީ ކާމިޔާބީއެއް ހޯދައި، 50 ކްރޯޑު ރުޕީސްއަށް ވުރެ ބޮޑު އާމްދަނީއެއް ލިބިއްޖެ އެވެ.
އިންޑިއާގެ ގައުމީ ދުވަހުގެ ބަންދާ ދިމާކޮށް އިއްޔެ ރިލީޒްކުރި އެ ފިލްމު ސިނަމާތަކުގައި އެޅުވުމުގެ ކުރިން ވެސް ވަނީ އެޑްވާންސް ބުކިންތަކުން އެކަނިވެސް 50 ކްރޯޑު ރުޕީސްއަށް ވުރެ ބޮޑު އާމްދަނީއެއް ހޯދައިފަ އެވެ.
ފިލްމު އަޅުވައި، އިއްޔެ އިރުއޮއްސުނުއިރު އެކަނިވެސް އިންޑިއާގެ ބޮކްސް އޮފީހުގައި ޖުމްލަ އާމްދަނީގެ ގޮތުގައި 51.09 ކްރޯޑު ރުޕީސް (5.3 މިލިއަން ޑޮލަރު) އެ ފިލްމަށް ލިބިފައިވާ ކަމަށް ރިޕޯޓްތައް ބުންޏެވެ.
މި ބޮޑު ކާމިޔާބީއާ އެކު "ދުރިޝްޔަމް 3" ވަނީ މި އަހަރު ނުކުތް ބޮޑެތި ފިލްމުތައް ކަމަށްވާ "ބޯޑާ 2"، "މިރްޒާޕޫރު: ދަ މޫވީ" އަދި "އާވާރާޕަން 2"ގެ ފުރަތަމަ ދުވަހުގެ އާމްދަނީގެ ރެކޯޑުތައް މުގުރާލައިފަ އެވެ.
މި އަހަރު ނުކުތް ބޮލީވުޑްގެ ފިލްމުތަކުގެ ތެރެއިން ފުރަތަމަ ދުވަހު 145 ކްރޯޑު ރުޕީސްއާ އެކު އެންމެ ބޮޑު އާމްދަނީއެއް ހޯދީ ރަންވީރު ސިންގުގެ "ދުރަންދަރު 2" އެވެ.
ބެލުންތެރިންނާއި ފިލްމު ކްރިޓިކުންގެ ފަރާތުން މި ފިލްމަށް ވަނީ ވަރަށް ތައުރީފު ވެސް ލިބިފަ އެވެ.
"ދުރިޝްޔަމް 3: ދަ ކޮންކްލޫޝަން" އުފެއްދީ 110 ކްރޯޑު ރުޕީސް (11.4 މިލިއަން ޑޮލަރު)ގެ ބަޖެޓަކުންނެވެ.
އަބީޝެކް ޕާޓަކް ޑައިރެކްޓްކޮށްފައިވާ މި ފިލްމުގައި އަޖޭ ދޭވްގަން (ވިޖޭ ސަލްގާއޮންކަރު)ގެ އިތުރުން ތަބޫ، ޝްރިޔާ ސަރަން އަދި އަލަށް ގުޅުނު ޖައިދީޕް އަހްލާވަތު އާއި ޕްރަކާޝް ރާޖް އަދި ސޯރަބް ޝުކްލާ ވަނީ މުހިންމު ރޯލުތައް ކުޅެފަ އެވެ.
"ދުރިޝްޔަމް"ގެ ފުރަތަމަ ދެ ފިލްމަށް ވެސް ބޮކްސް އޮފީހުގައި ބޮޑު ކާމިޔާބީއެއް ލިބިފައިވެ އެވެ.