ކެވިން ހާޓް އޮސްކާ އެވޯޑް ހަފުލާ ހޯސްޓް ނުކުރަން ނިންމައިފި

ކެވިން ހާޓް: އޭނާ ވަނީ އޮސްކާ އެވޯޑް ހޯސްޓް ނުކުރަން ނިންމާފައި.

އަހުމަދު އަދްޝަން، މިހާރު

09 ޑިސެމްބަރ 2018 - 09:23

އަންނަ އަހަރު ބާއްވާ 91 ވަނަ އޮސްކާ އެވޯޑް ހަފުލާގެ ހޯސްޓަކަށް މަޝްހޫރު ކޮމީޑިއަން އަދި އެކްޓަރު ކެވިން ހާޓް ހަމަޖެއްސިތާ ދެ ދުވަސް ފަހުން އޭނާ އެ ފުރުސަތު ދޫކޮށްލައިފި އެވެ.

އޮސްކާ އެވޯޑް ހޯސްޓް ކުރަން ފުރުސަތެއް ލިބޭނެ ދުވަހެއްގެ އިންތިޒާރުގައި ހުއްޓައި، އެ ފުރުސަތު އެމެޑެމީން ފަހިކޮށް ދިނުމުން އެކަމުގެ އުފަލުގައި ހުއްޓައި 39 އަހަރުގެ އެކްޓަރަށް އެ ފުރުސަތު ދޫކޮށްލަން މަޖުބޫރުވީ މީގެ 10 ވަރަކަށް އަހަރު ކުރިން "ވަކި ކޮމިއުނިޓީއަކަށް" އިހުތިރާމު ކުޑަވާ ގޮތަށް އޭނާ ކުރި ޓްވީޓްތަކެއްގެ މައްސަލަ އަލުން ހޫނުވެ، އަމާޒުވި ފާޑުކިޔުންތަކާ ގުޅިގެންނެވެ.

އަދި ވަރަށް ގިނަ ބަޔަކު ވަނީ އޮސްކާގެ ހޯސްޓް މަގާމުން ކެވިން ވަކިކުރަން ވެސް ގޮވާލައިފަ އެވެ.

I'm sorry that I hurt people.. I am evolving and want to continue to do so. My goal is to bring people together not tear us apart. Much love & appreciation to the Academy. I hope we can meet again.
— Kevin Hart (@KevinHart4real) December 7, 2018

ކެވިންގެ ޓްވީޓް.

މިކަމާ ގުޅިގެން ކެވިން ޓްވިޓާ އާއި އިންސްޓްގްރާމްގައި ވަނީ އޭނާ ދެއްކި ވާހަކައަކުން އެއްވެސް ބަޔަކު ދެރަކޮށްލެވުނު ނަމަ އެކަމަށް މައާފަށް އެދޭ ކަމަށް ބުނެފަ އެވެ. އަދި އޭނާއާ ހެދި އޮސްކާ އެވޯޑް ހަފުލާ ހަރާބުވާން ބޭނުން ނުވާ ކަމަށް ވެސް ބުންޏެވެ.

ކެވިން ބުނީ މި ފަހަރު އޮސްކާ އެވޯޑް ހޯސްޓް ކުރުމާ ދުރުވިޔަސް ކުރިއަށް އޮތް ތަނުގައި އަދި އެ ފުރުސަތު ލިބޭނެ ކަމަށް އުންމީދު ކުރާ ކަމަށެވެ.

Really disappointed was looking forward to his hosting #KevinHart #Oscars2019 There’s just so many times you can apologize.
— D̟a̟r̟l̟a̟🍒 (@darlaxtc) December 7, 2018

މީހަކު ޝުއޫރު ފާޅުކޮށްފައި.

އަންނަ އަހަރުގެ އޮސްކާ އެވޯޑް ހަފުލާ ބާއްވަން ހަމަޖެހިފައި ވަނީ ފެބްރުއަރީ މަހުގެ 24 ވަނަ ދުވަހު އެވެ. ކެވިން ހޯސްޓަކަށް ހަމަޖެއްސިކަން އޮސްކާ އިންތިޒާމު ކުރާ އެކެޑެމީ އޮފް މޯޝަން ޕިކްޗާ އާޓްސް އެންޑް ސައިންސް (އޭއެމްޕީއޭއެސް) އިން އިއުލާން ކުރީ މިދިޔަ އަންގާރަ ދުވަހު އެވެ.

މި އަހަރާއި އޭގެ ކުރީ އަހަރު އޮސްކާ ހޯސްޓް ކުރީ މަޝްހޫރު ޓީވީ ހޯސްޓް ޖިމީ ކިމެލް އެވެ.

ކެވިންގެ ބަދަލުގައި އެކެޑެމީ އަށް މިހާރު ޖެހިފައި ވަނީ އެވޯޑް ހަފުލާ ހޯސްޓް ކުރާނެ އާ ފަންނާނަކު ހޯދަން އަތްފުނާއަޅާށެވެ.