ސަނީ ޑިއޯލްގެ "ގަދަރު" ގެ ދެވަނަ ބައެއް ހަދަނީ

ސަނީ ޑިއޯލްގެ ކެރިއަރުގެ އެންމެ ކާމިޔާބު އަދި ބެލުންތެރިން އެ ފިލްމެއްގެ ޖާދޫގައި ވަރަށް ބޮޑަށް ޖެހުނު ފިލްމު "ގަދަރު: އޭކް ޕްރޭމް ޚަތާ" ގެ ދެވަނަ ބައެއް ހަދަން ނިންމައިފި އެވެ.

ސަނީ އާއި އަމީޝާ ޕަޓޭލް ލީޑް ރޯލް ކުޅުނު އެ ފިލްމަކީ 2001 ގައި ޑައިރެކްޓަރު އަނިލް ޝަރުމާ ގެނެސްދިން ފިލްމެކެވެ.

"ގަދަރު" ގެ ދެވަނަ ބަޔާ ބެހޭ ގޮތުން އެ ފިލްމުގެ ޓީމްގެ މެމްބަރަކާ ހަވާލާދީ ޕްރެސް ޓްރަސްޓް އޮފް އިންޑިއާ (ޕީޓީއައި) އިން ބުނީ އޭގެ ދެވަނަ ބައެއް ހަދަން މަސައްކަތް ކުރާތާ މިހާރު 15 އަހަރުވެއްޖެ ކަމަށެވެ. އެހެންވެ ހަމަ ކުރީގެ ސްޓޯރީ ލައިނަށް ބިނާކޮށްގެން ދެވަނަ ބައި ގެނެސް ދޭނެ ކަމަށް ބުންޏެވެ.

ނަމަވެސް އޭގެ މަސައްކަތް ފަށާނެ އިރެއް އަދި ނޭނގެ އެވެ. އަނެއްކޮޅުން ސަނީ މި ވަގުތު އަންނަނީ އިންޑިއާގެ ވެރިކަންކުރާ ޕާޓީ ބީޖޭޕީ އަށް ސޮއިކޮށް، ގާނޫނު ހަދާ މަޖިލީހުގެ ތިރިގެ ލޯކް ސަބާގެ ގޮނޑިއަކަށް ވާދަ ވެސް ކުރަމުންނެވެ.

އަދި "ގަދަރު" ގެ ބަތަލާ އަމީޝާއަކީ މިހާރު ބޮލީވުޑުން ގެއްލިފައިފައިވާ ބަތަލާއެކެވެ. އޭނާ ދެވަނަ ބައިން ފެންނާނެ ކަމެއް ކަށަވަރެއް ނުވެ އެވެ. އެކަމަކު ޔަގީނުން ވެސް ފިލްމުގެ ބަތަލަކީ ސަނީ ކަމަށް ޓީމުން ބުންޏެވެ.

ޖޫން، 15، 2001 ގައި ރިލީޒް ކުރި "ގަދަރު" ގައި ކިޔައި ދެނީ އިންޑިއާގެ ފިރިއަކާއި ޕާކިސްތާނުގެ އަންބެއްގެ މައްސަލާގައި ދެ ގައުމުގެ މެދުގައި ހިނގާ ހަމަނުޖެހުންތަކެކެވެ. މީގެ އެކްޝަން މަންޒަރުތަކާއި ޑައިލޮގްތަކަކީ ބެލުންތެރިންގެ ހިތްތަކުގައި ބިންވަޅު ނެގިފައިވާ ކަންކަމެވެ. އަދި ފިލްމު ރިލީޒް ކުރި ދުވަސްވަރު "ގަދަރު" ލަވަތައް ވެސް ވަރަށް ހިނގި އެވެ.

ގާތްގަނޑަކަށް 19 ކްރޯޑް ރުޕީސްގެ ބަޖެޓަކުން ހެދި "ގަދަރު" އަށް ބޮކްސް އޮފީހުގައި 133 ކްރޯޑްގެ އާމްދަނީއެއް ލިބުނެވެ.

އެ ފިލްމުގެ ޑައިރެކްޓަރު އަނިލް އެންމެ ފަހުން ބެލުންތެރިންނަށް ގެނެސް ދިނީ "ގަދަރު" ގައި ސަނީ އާއި އަމީޝާގެ ދަރިފުޅުގެ ރޯލް ކުޅުނު އޭނާގެ ފިރިހެން ދަރިފުޅު އުތުކާޝް ޝަރުމާ ބޮލީވުޑަށް ތައާރަފު ކުރި މިދިޔަ އަހަރުގެ "ޖީނިއަސް" އެވެ.