ބޮލީވުޑްގެ އެކްޓަރު ސަނީ ޑިއޯލްގެ ހަނގުރާމަ މަތީ ފިލްމު "ބޯޑާ 2"އަށް ބޮކްސް އޮފީހުގައި ފުރަތަމަ ހަފުތާ ބަންދުގައި ރަނގަޅު އާމްދަނީއެއް ލިބިއްޖެ އެވެ.
ރިޕޯޓްތައް ބުނި ގޮތުގައި، މިދިޔަ ހުކުރު ދުވަހު ރިލީޒްކުރި "ބޯޑާ 2"އަށް ފުރަތަމަ ތިން ދުވަހުގެ ތެރޭގައި ދުނިޔޭގެ ބޮކްސް އޮފީހުގައި ވަނީ 167 ކްރޯޑް ރުޕީސް ލިބިފަ އެވެ. އެއާ އެކު، މިއީ މި އަހަރު 100 ކްރޯޑް ރުޕީސްއަށް ވުރެ ބޮޑު އާމްދަނީއެއް ހޯދި ބޮލީވުޑްގެ ފުރަތަމަ ފިލްމަށް ވަނީ ވެފަ އެވެ.
"ބޯޑާ 2"އަށް ތިން ދުވަހުގެ ތެރޭގައި ލިބުނު އާމްދަނީއަކީ މިދިޔަ އަހަރު ނެރުނު ސަނީގެ އެކްޝަން ފިލްމު "ޖާޓު"އަށް ލިބުނު ޖުމްލަ އާމްދަނީއަށް ވުރެ ވެސް ބޮޑު އަދަދެކެވެ. "ޖާޓު"އަށް ލިބުނު ޖުމްލަ އާމްދަނީއަކީ 119 ކްރޯޑް ރުޕީސް އެވެ.
"ބޯޑާ 2"އަކީ މި އަހަރު ނުކުތް އިންޑިއާގެ ފިލްމުތަކުގެ ތެރެއިން ތިން ވަނައަށް އެންމެ އާމްދަނީއެއް ހޯދި ފިލްމެވެ. މިވަގުތު އެންމެ ކުރީގައި އުޅެނީ ތެލެގޫ ދެ ފިލްމެކެވެ.
ރިޕޯޓްތައް ބުނި ގޮތުގައި، މިއަދު ފާހަގަކުރާ އިންޑިއާގެ ޖުމްހޫރީ ދުވަހުގެ ބަންދާ އެކު، އެ ފިލްމު ބަލަން ދާ މީހުންގެ އަދަދު އިތުރުވާނެ ކަމަށް ލަފާކުރެވެ އެވެ.
ޓީ-ސީރީޒް އާއި ޖޭޕީ ފިލްމްސް ގުޅިގެން ގެނެސްދޭ "ބޯޑާ 2"ގައި ސަނީއާ އެކު މުހިންމު ރޯލުތައް ކުޅެފައި ވަނީ ވަރުން ދާވަން އާއި އަހާން ޝެޓީގެ އަދި ދިލްޖީތު ދޮސަންޖެވެ.
މީގެ 27 އަހަރު ކުރިން ގެނެސްދިން "ބޯޑާ"ގެ ފުރަތަމަ ފިލްމަކީ އޭރު ނުކުތް ހަނގުރާމަ މަތީ ފިލްމުތަކުގެ ތެރެއިން އެންމެ ކާމިޔާބު އެއް ފިލްމެވެ.
ޖޭޕީ ދައްތާ ޑައިރެކްޓުކޮށް 1997 ވަނަ އަހަރު ގެނެސްދިން "ބޯޑާ"ގެ ލީޑު ރޯލު ކުޅުނީ ސަނީ އެވެ.
"ބޯޑާ 2" ޑައިރެކްޓުކުރީ އަނޫރާގް ސިންގެވެ. އޭނާއަކީ "ދިލް ބޯލޭ ހަޑިއްޕަ" އާއި "ޖެޓް އެންޑް ޖޫލިއެޓް" އާއި "ޕަންޖާބް 1984" އަދި "ކިސާރީ" ކަހަލަ ފިލްމުތަކުގެ ޑައިރެކްޓަރެވެ.
މިދިޔަ އަހަރު ގެނެސްދިން "ޖާޓް"ގެ ކުރިން ސަނީ ފެނުނީ، އަނިލް ޝަރްމާ ޑައިރެކްޓުކޮށް 2023 ވަނަ އަހަރު ގެނެސްދިން "ގަދަރު 2" އިންނެވެ. "ގަދަރް 2" އަކީ 2001 ވަނަ އަހަރު ނެރުނު ފިލްމެއްގެ ސީކުއެލްއެކެވެ. އެ ފިލްމު ވަނީ ބޮކްސް އޮފީހުގެ ރެކޯޑުތައް މުގުރާލައި 2023 ވަނަ އަހަރުގެ އެންމެ ކާމިޔާބު ބޮލީވުޑް ފިލްމުތަކުގެ ތެރޭގައި ހިމެނިފަ އެވެ. ބޮކްސް އޮފީހުގައި އެ ފިލްމަށް ވަނީ 450 ކްރޯޑަށް ވުރެ ގިނަ ރުޕީސް ލިބިފަ އެވެ.