ބޮލީވުޑްގެ އެކްޓަރު ސިދާތު މަލްހޯތުރާ އާއި ތަމަންނާ ބާޓިއާ ލީޑު ރޯލުން ފެންނަ ފެންޓަސީ ސުޕަނެޗުރަލް ތުރިލާ ފިލްމު "ދަ ވާން: ފޯސް އޮފް ދަ ފޮރެސްޓް" ސިނަމާތަކަށް ނެރުނު ދެވަނަ ދުވަހު ބޮކްސް އޮފީހުގައި ބޮޑު ކުރިއެރުމެއް ހޯދައި، ޖުމްލަ އާމްދަނީ 19 ކްރޯޑު ރުޕީސްއަށް އަރައިފި އެވެ.
ބޮކްސް އޮފީސް ޓްރެކިން ސައިޓް "ސެކްނިލްކް"ގެ ތަފާސްހިސާބުތައް ދައްކާ ގޮތުން، މިދިޔަ ހުކުރު ދުވަހު ރިލީޒްކުރި މި ފިލްމަށް ފުރަތަމަ ދުވަހު އިންޑިއާ އިން ލިބުނީ 8 ކްރޯޑު ރުޕީސް އެވެ.
ނަމަވެސް އިއްޔެ (ދެވަނަ ދުވަހު) ފިލްމުގެ ވިޔަފާރި 37.5 ޕަސެންޓުގެ ކުރިއެރުމެއް ހޯދައި، ހަމައެކަނި އެ ދުވަހު ވަނީ 11 ކްރޯޑު ރުޕީސް ލިބިފަ އެވެ. އެއާ އެކު، ޖުމްލަ އާމްދަނީ މިހާތަނަށް ވަނީ 19 ކްރޯޑު ރުޕީސް (1.9 މިލިއަން ޑޮލަރު) އަށް އަރައިފަ އެވެ.
"ދަ ވާން" އުފެއްދީ 80-100 ކްރޯޑު ރުޕީސް (8-10 މިލިއަން ޑޮލަރު)ގެ ބަޖެޓަކުންނެވެ.
މި ފިލްމު ރިލީޒްކުރީ "އެވެންޖާސް: އެންޑްގޭމް" އަލުން ސިނަމާތަކުގައި އަޅުވައިގެން ބޮޑު ތަރުހީބެއް ލިބެމުން އަންނަ ދަނޑިވަޅެއްގަ އެވެ. ނަމަވެސް، "ދަ ވާން"ގެ ދެ ދުވަހުގެ އާމްދަނީ ވަނީ ސިދާތުގެ އެންމެ ފަހުން ނުކުތް ތިން ފިލްމުތައް ކަމަށްވާ "ޕަރަމް ސުންދަރީ" އާއި "ޔޯދާ" އަދި "ތޭންކް ގޯޑް"ގެ ޖުމްލަ ވިޔަފާރިއަށް ވުރެ އިތުރުވެފަ އެވެ.
ދީޕަކް ކުމާރު މިޝްރާ ޑައިރެކްޓްކޮށް، ބާލާޖީ މޯޝަން ޕިކްޗާސް އާއި ޓީވީއެފް ގުޅިގެން އުފައްދާފައިވާ މި ފިލްމަކީ އިންޑިއާގެ ގަދީމީ ވާހަކަތަކާއި ނާމާން ސިއްރުތަކެއްގެ މައްޗަށް ބިނާކޮށް ތައްޔާރުކޮށްފައިވާ ފިލްމެކެވެ.
މި ފިލްމުގެ އިތުރު ރޯލުތަކުން އަނޫޕް ސޯނީ، ސުނިލް ގްރޯވާ، ޝްވެތާ ތިވާރީ އަދި މަނީޝް ޕޯލް ފެނެ އެވެ.