ރީތީގެ ރާނީ މަނޫޝީ ތައާރަފު ވާނީ އަކްޝޭ ކުމާރާ އެކު

ދެހާސް ސަތާރަ ވަނަ އަހަރު މިސް ވޯލްޑްގެ ތާޖު ހާސިލުކުރި އިންޑިއާގެ މަނޫޝީ ޗިލާރު ބޮލީވުޑަށް ނެރުމުގެ ވާހަކަތައް ދެކެވޭތާ މިހާރު ދުވަސްތަކެއްވެއްޖެ އެވެ. މީޑިއާތަކުން ކުރިން ރިޕޯޓްކޮށްފައިވާ ގޮތުގައި އޭނާ ބޮލީވުޑަށް ނެރޭ ފިލްމު ޑައިރެކްޓް ކުރާނީ ފަރާ ހާނެވެ.

ނަމަވެސް ފިލްމީ ހަބަރުތައް ގެނެސްދޭ ނޫސްތަކުން މިހާރު ބުނާ ގޮތުން މަނޫޝީ، 21، ގެ ފުރަތަމަ ފިލްމަކަށް ވާނީ އަކްޝޭ ކުމާރު، 51، އާ އެކު ކުޅޭ ތާރީހީ ފިލްމެކެވެ. އެއީ ޔާޝްރާޖް ފިލްމްސް (ވައިއާރްއެފް) އިން ޕްރޮޑިއުސްކޮށް، ޑރ. ޗަންދުރަޕްރަކާޝް ދިވެދީ ޑައިރެކްޓް ކުރާ ފިލްމެކެވެ.

އެ ފިލްމަކީ އިންޑިއާގެ ކުރީގެ ވަރުގަދަ ރަސްކަލެއް ކަމަށްވާ ޕްރިތުވީރާޖް ޗޯހަންގެ ވާހަކަ ކިޔައިދޭ ފިލްމެވެ. މި ފިލްމުގައި އަކްޝޭއާ އެކު ބަތަލާގެ ރޯލު ކުޅެން މަނޫޝީ ސޮއިކޮށްފައިވާ ކަމަށް ގިނަ މީޑިއާތަކުން ބުނާ އިރު، ފިލްމާ ބެހޭ އެއްވެސް މައުލޫމާތެއް ވައިއާރްއެފާއި ޗަންދުރަޕްރަކާޝް ވެސް އަދި ރަސްމީކޮށް ހިއްސާކޮށްފައެއް ނުވެ އެވެ.

އެކަމަކު މި ފިލްމުގެ މަސައްކަތް މި އަހަރުގެ ފަހުކޮޅު ފަށަން ތައްޔާރުވަމުން އަންނަ ކަމަށް މީޑިއާތަކުން ބުންޏެވެ.

މީގެ ކުރިން ވެސް އަކްޝޭއާ އެކު ރީތީގެ ތާޖް ހާސިލުކޮށްފައިވާ ދެ ބަތަލާއަކު ބޮލީވުޑަށް ތައާރަފުވެފައިވެ އެވެ. އެއީ 2000 ވަނަ އަހަރު މިސް ވޯލްޑްގެ މަގާމު ހޯދި ޕްރިޔަންޔާ ޗޯޕްޅާ އާއި އެ އަހަރުގެ މިސް ޔުނިވާސް ލާރާ ދައްތާ އެވެ.

އަކްޝޭއާ އެކު އެ ދެ ތަރިން އެކްޓިން އަށް ނުކުތީ 2003 ގައި ރާޖް ކަންވަރު ގެނެސް ދިން "އަންދާޒް" އިންނެވެ.

މަނޫޝީގެ ފުރަތަމަ ފިލްމަކީ ކޮބައިކަން ކަށަވަރު ނުވާ އިރު، ދާދި ފަހުން މީޑިއާތަކުން ބުނި ގޮތުގައި އޭނާ ވަނީ "ބޭންޑް ބާޖާ ބާރާތު" ގެނެސް ދިން ޑައިރެކްޓަރު މަނީޝް ޝަރުމާ، ރަންވީރު ސިންގްއާ އެކު ގެނެސް ދޭން ނިންމާފައިވާ ފިލްމެއްގެ ބަތަލާގެ ރޯލަށް ވެސް ސޮއިކޮށްފަ އެވެ.