ބޮލީވުޑްގެ ޚަބަރުތައް ކުރުކޮށް

ހަތަރު ހިއްސާދަރުންވެގެން ހިންގި ފިލްމު ކުންފުނި ފެންޓަމް މިދިޔަ އަހަރުގެ ތެރޭގައި އުވާލާފައި ވަނިކޮށް، އެ ކުންފުނީގައި ހިއްސާވި ޑައިރެކްޓަރު އަނޫރާގް ކެޝަޕް އާ ކުންފުންޏެއް އުފައްދަން ނިންމައިފި އެވެ.

އޭނާ ކުރި ޓްވީޓެއްގައި ބުނީ އާ ކުންފުންޏެއް ހަދައި، އާ ފެށުމަކުން ފަށައި، އާ ފިލްމުތަކެއް ގެނެސްދޭން ނިންމާފައިވާ ކަމަށެވެ. ނަމަވެސް އެކަމާ ބެހޭ އިތުރު އެއްވެސް ވާހަކައެއް ހިއްސާއެއް ނުކުރެ އެވެ.

މިދިޔަ އަހަރު "މަންމަރުޒިޔާ" ގެނެސް ދިން ޑައިރެކްޓަރު، ޕްރޮޑިއުސރެއްގެ ގޮތުގައި ހިއްސާވާ ފިލްމަކަށް އެންމެ އަވަހަށް ސިނަމާތަކަށް އަންނާނީ އަންނަ މަހުގެ 12 ގައި ރިލީޒް ކުރާ ރިތިކް ރޯޝަންގެ "ސުޕަ 30" އެވެ. އަދި އަންނަ އޮކްޓޯބަރު 25 ގައި ރިލީޒް ކުރާ "ސާންޑް ކީ އާންކް" އަކީ ވެސް އަނޫރާގް ހިއްސާވާ ފިލްމެކެވެ.

އޭނާ ޑައިރެކްޓްކޮށް ގެނެސް ދޭން މި ވަގުތު ފިލްމެއް ނެތް ނަމަވެސް ނެޓްފްލިކްސް އިން ވަރަށް އަނޫރާގް ޑައިރެކްޓްކޮށްފައިވާ ވެބް ސީރީޒް "ސެކްރެޑް ގޭމްސް" ގެ ސީޒަން ދޭއް ސްޓްރީމް ކުރަން ފަށާނެ އެވެ.

މިދިޔަ އަހަރު ހަނގުރާމަ ފިލްމު "ޕަލްޓާން' ގެނެސް ދިން ބޮލީވުޑްގެ ދުވަސްވީ ޑައިރެކްޓަރު ޖޭޕީ ދައްތާ ޖިއޯ ސްޓޫޑިއޯސްއާ ގުޅިގެން އިތުރު އުފެއްދުންތަކެއް ގެނެސް ދޭން ނިންމައިފި އެވެ.

މީގެ ތެރޭގައި ހިމެނެނީ ތާރީހީ ހާދިސާއަކަށް ހަދާ އޭނާ ޑައިރެކްޓް ކުރާ ފިލްމަކާއި އިންޑިއާގެ އަސްކަރީ އޮފިސަރެއްގެ ވާހަކަ ކިޔައިދޭ ބައޮގްރަފިކަލް ޑްރާމާއެއްގެ އިތުރުން އިންޑިއާގެ އަސްކަރިއްޔާ، ނޭވީ އަދި އެއާފޯސްގެ ބަތަލުންތަކެއްގެ މައްޗަށް ބިނާކޮށް ހަދާ ވެބް ސީރީޒެކެވެ.

މި އުފެއްދުންތަކަށް ކާސްޓުން ނެގުމުގެ މަސައްކަތް މިހާރު ކުރަމުން ދިޔަ ނަމަވެސް، އެއްވެސް ޕްރޮޖެކްޓަކާ ބެހޭ އިތުރު ތަފުސީލެއް އަދި ހާމައެއް ނުކުރެ އެވެ. ޖޭޕީ ދައްތާއަކީ ކާމިޔާބު ފިލްމު "ބޯޑާ" ގެނެސް ދިން ޑައިރެކްޓަރެވެ.

ސްޓާ ޕްލަސް އިން މިހާރު ދައްކަމުން އަންނަ ސިލްސިލާ "ކަސޯޓީ" އާ ސީޒަނުގެ ޓްރެއިލާއެއް، ބަޖާޖްގެ ކެރެކްޓާއާ އެކު ދައްކާލައިފި އެވެ.

އޭގައި ފެންނަނީ ބަޖާޖްގެ ކުންފުނީގެ ލޯގޯ ދައްކައިލަން އުސް އިމާރާތެއްގެ މަތިން "ހީރޯއެއް" ގެ ގޮތުގައި ފުންމާލައި، މީޑިއާތަކާ ބައްދަލުކޮށް ވާހަކަ ދައްކާ ތަނެވެ. މި ފަހަރު ބަޖާޖްގެ ރޯލް ކުޅެނީ ބޮލީވުޑްގެ ބަތަލާ ބިޕާޝާ ބާސޫގެ ފިރިމީހާ އަދި "ހޭޓް ސްޓޯރީ 3" ފަދަ ފިލްމުތައް ކުޅުނު އެކްޓަރު ކަރަން ސިންގް ގްރޯވާއާ އެވެ.

ބަޖާޖްގެ ކެރެކްޓާ "ކަސޯޓީ" އަށް މި އަންނަނީ ޕްރޭނާ އާއި އަނޫރާގް ކައިވެންޏާ ދިމާކޮށެވެ. އެހެންވެ އެ ކައިވެނި އޭނާގެ ސަބަބުން ހުއްޓި، ބަޖާޖާއި ޕްރޭނާގެ ކައިވެނި ފެނިގެން ދާނެ އެވެ. ބަޖާޖްގެ ކެރެކްޓާ ފެންނަން ފަށާނީ މި މަހުގެ 17 އިން ފެށިގެންނެވެ.

ރާޖްކުމާރު ރާއޯ އާއި ޖާންވީ ލީޑް ރޯލް ކުޅޭ ހޮރޯ ކޮމެޑީ "ރޫހީ އަފްޒާ" ގެ ޝޫޓިން ފަށައިފި އެވެ.

މިދިޔަ އަހަރު "އިސްތިރީ" ގެނެސް ދިން ޕްރޮޑިއުސަރު ދިނޭޝް ވިޖަންގެ މެޑޮކް ފިލްމްސް އިން ހަދާ މި ފިލްމަކީ ހާޑިކް މެހެތާ ޑައިރެކްޓް ކުރާ ފިލްމެކެވެ. މިދިޔަ އަހަރު ބޮލީވުޑަށް ތައާރަފުވި ބަތަލާ ޖާންވީ ރޫހް އާއި އަފްޒާ ކިޔާ ޑަބަލް ރޯލަކުން ފެންނަ "ރޫހީއަފްޒާ" ގެ ރޯލަކުން ވަރުން ޝަރުމާ ވެސް ފެނިގެން ދާނެ އެވެ.

މި ފިލްމު ރިލީޒް ކުރާނީ އަންނަ އަހަރުގެ މާޗް 20 ގަ އެވެ.