ސުވާލެއް ނެތެވެ؛ ޒީރޯ ޑިގްރީ އަހުމަދު ނާޝިދު )ފުލޫ ނާޝިދު( އަކީ ރާއްޖޭގެ އެންމެ ހުނަރުވެރި އެއް މިއުޒީޝަނެކެވެ. ދިވެހި މިއުޒިކަށާއި ދިވެހި އުފެއްދުމަށް އޭނާ ވަނީ އަގު ނުކުރެވޭ ވަރުގެ ހިދުމަތްތަކެއް ކޮށްދީފަ އެވެ. އެހެންވެ، ރޭ ފެނިގެން އެ ދިޔައީ، ދިވެހި ފަންނާނުންތަކެއް އޭނާާ އަށް ދިން އަގުބޮޑު ހަދިޔާ އެކެވެ. އެ މަންޒަރު ބަލަން "ބަލި އެނދުގައި" ނާޝިދު އޮލިމްޕަހުގައި ވަގުތުކޮޅަކަށް ނަމަވެސް އޮތީ ވެސް އެހެން މީހުންގެ ލޮލުން ކަރުނަ އޮއްސުވަމުންނެވެ.
ނާޝިދުގެ ހަނދާންތައް ކުރިމަތީގައި ހުރި ސްޓޭޖްގައި ދިރުވަމުން އައިއިރު، އޭނާ އިނީ އޭނާ އަށް ޚާއްސަ ސޯފާއެއްގައި އެ މަންޒަރުތައް ބަލާށެވެ. ނާޝިދު، 53، އަންނަނީ ކެންސަރުގެ ބައްޔަށް ފަރުވާ ހޯދަމުންނެވެ. އަދި އެނގިފައިވާ ގޮތުގައި އޭނާ ސީރިއަސް އެވެ. ތެދުވެ ވެސް ނޫޅެވެ އެވެ.
ރޭ އޮލިމްޕަހުން ފެނިގެން ދިޔަ "އަ ޓްރިބިއުޓް ޓް ނާޝިދު" ޝޯ ކުރިއަށް ދިޔައީ ޒުވާން އާޓިސްޓުންތައް ޖޯޝާ އެކުގަ އެވެ. މިކަމުގައި އެންމެ ނަގާ ކިޔާ އެކަކަށް ހުރީ ނާޝިދުގެ އަންހެން ދަރިފުޅެއް ކަމަށްވާ ނިޝް ނާޝިދެވެ.
ޝޯ ފެށުމުގެ ގޮތުން ނިޝް އާއި ނާޝިދުގެ އަނެއް ދަރިފުޅު ނަޝް ސްޓޭޖަށް އަރައި އޯޑިއަންސާ ކުރިމަތިލައި ބުނީ މިއީ އެ މީހުންނަށް ވަރަށް އުފާވެރި ވަގުތެއް ކަމަށެވެ. އަދި ބައްޕަގެ ހިދުމަތުގެ އަގު ވަޒަން ކުރަން މިފަދަ ޝޯއެއް ބޭއްވޭތީ އެކަމާ ފަހުރުވެރިވާ ކަމަށާއި މިކަމުގައި ބައިވެރިވާ އެންމެންނަށް ޝުކުރު ވެސް އަދާ ކުރާ ކަމަށެވެ.
ޝޯ ފެށިގެން ދިޔައީ ނާޝިދު މިއުޒިކީ ކެރިއަރު ފެށިގެން އައި ގޮތުގެ މައްޗަށް ދައްކާލި ޕްރެންޒެންޓޭޝަނަކާ އެކުގަ އެވެ. ކެރިއަރިގެ ހިސާބުގައި އޭނާ ކޮށްފައިވާ މަސައްކަތްތަކާ ބެހޭ މައުލޫމާތު ދޭތެރެ ދޭތެރެ އިން ޝޯގައި ވީޑިއޯގެ ޒަރީރާ އިން ހިއްސާ ވެސް ކުރަމުން ދިޔަ އެެވެ.
ނާޝިދު ކިޔާފައިވާ ބައެއް އިނގިރޭސި ލަވަތަކާ އެކު ނިޝްގެ އަޑުން ޝޯ ފަށައިގަތް އިރު އޯޑިއަންސް އޮތީ ވަރަށް ހިމޭންކޮށެވެ.
އެކަމަކު ޒީރޯ ޑިގްރީގެ އެންމެ މަޝްހޫރު އަލްބަމް "ދޯނި" ގެ ލަވަތައް އާޓިސްޓުން ހުށަހަޅައިދޭން ފެށުމުން އޯޑިއަންސް ގުގުމަމުން ދިޔަ އެވެ. ނާޝިދަށް ޝުކުރުގެ ބަސްތައް ރައްދު ކުރަމުން ދިޔަ އެވެ.
ހަމަ މިއާ އެކު ބޭންޑް އެހެން އަލްބަމެއް ކަމަށްވާ "ބާޑް އިން ފްލައިޓް" ގެ ލަވަތަކާ އެކު ވެސް އޯޑިއަންސް ކެކިގަތެވެ.
ވަރަށް ކުޑަ ވަގުތުކޮޅަކަށް އޮލިމްޕަހުގައި މަޑު ކުރުމަށް ފަހު ނާޝިދު ޝޯއިން ވަކިވީ އެވެ. އެކަމަކު އޭގެ ފަހުން ދެން އައީ ނާޝިދުގެ ކުރިއަށް އޮތް އަލްބަމް "ޖާނީ" ގެ ލަވައަކުން އޯޑިއަންސް ހިތް ފުރާލަ ދިނުމެވެ.
މި އަލްބަމަކީ ނާޝިދުގެ އަމިއްލަ މަސައްކަތެކެވެ. "ޖާނީ" އަކީ 10 އަހަރު ކުރިން މަސައްކަތް ފެށި އަލްބަމެލެވެ. އެކަމަކު ހާލަތު ތަން ދިން ގޮތުން އެ އަލްބަމް އަދި އެހުންތެރިންނާ ހަމައަށް ފޯރުކޮށް ދެވިފައި ނެތީ އެވެ.
އެކަމަކު ނިޝް އާއި އޭނާގެ އާއިލާ އޮތީ ނާޝިދުގެ "ޖާނީ" އާންމުންނަށް ދޫކޮށްލުމުގެ ތައްޔާރީތަކުގަ އެވެ. ކައިރި މުސްތަގުބަލެއްގައި މި އަލްބަމް އެހުންތެރިންނާ ހަމައަށް އަންނާނެ ކަމަށް އިންތިޒާރު ކުރަމާ ހިނގާށެވެ.
ރާއްޖޭގައި އުފެދުނު ވަރުގަދަ އަދި ދިވެހި މިއުޒިކަށް އިންގިލާބެއް ގެނައި މިއުޒިކް ލެޖެންޑަކަށް ޓްރިބިއުޓެއް ދޭން މިއުޒިކް އިން ސޯޝަލް ކޮމިއުނިޓީ (މިސްކް މޯލްޑިވްސް) އިން ކުރި މަސައްކަތަށް ވެސް ސާބަސް ދޭން ޖެހެ އެވެ. އެތައް އާޓިސްޓުންނެއް އެއްތަންކޮށްގެން މިފަދަ ކަމެއް ކުރުމަކީ ގައިމު ވެސް އަގު ވަޒަން ކުރަން ޖެހޭނެ ކަމެކެވެ.
"އަ ޓްރިބިއުޓް ޝޯ" އަށް އެކި ގޮތްގޮތުން އެހީތެރިކަން ފޯރުކޮށް ދިން ފަރާތްތަކުން ރޭ ވަނީ ނާޝިދަށް ހަނދާނީ ފިލާ ވެސް އަރުވައިފަ އެވެ. އެ ފިލާތަކާ ހަވާލުވީ ނާޝިދުގެ ދެ އަންހެން ދަރިން ކަމަށްވާ ނިޝް އާއި ނަޝް އެވެ.