މަޝްހޫރު ބޭންޑް ޒީރޯ ޑިގްރީ އެޓޯލްގެ ލަވަ ކިޔުންތެރިޔާ އަހުމަދު ނާޝިދު (ފްލޫ) އަށް ހާއްސަކޮށްގެން ބާއްވާ ކޮންސަޓް މިރޭ އޮންނާނެ އެވެ.
"ފަންނުގެ ދަރިން" އިންތިޒާމުކޮށްގެން "ކޮންސަޓް ފޮ ނާޝިދު: ދަ މޭން ހޫ އިންސްޕަޔަޑް އަސް" ގެ ނަމުގައި ބާއްވާ ކޮންސަޓް އޮންނާނީ އަލިމަސް ކާނިވަލްގަ އެވެ.
ފަންޑް ރައިިޒިން އިވެންޓެއްގެ ގޮތުގައި ކުރިއަށް ގެންދާ ކޮންސަޓް ބަލާލުމުގެ ފުރުސަތު އާންމުކޮށް ހުޅުވާލައިފައިވާ އިރު، ކޮންސަޓަށް ހާއްސަ ސްވެނިއާ ޓިކެޓެއް ވެސް ކޮންސަޓް ތެރޭގައި 100ރ. އަށް ވިއްކާނެ އެވެ.
ކެންސަރު ބައްޔަށް ފަރުވާ ހޯދަމުން އަންނަ މިއުޒިކް ލެޖެންޑް ނާޝިދަށް އެހީވުމުގެ ގޮތުން ބޭންކް އޮފް މޯލްޑިވްސް (ބީއެމްއެލް) ގެ އެކައުންޓެއް ވެސް ވަނީ ތައާރަފުކޮށްފަ އެވެ. އެ އެކައުންޓަށް ފައިސާ ހަދިޔާކުރަން ބޭނުންވާ ފަރާތްތަކަށް ފައިސާ ޖަމާ ކުރެވޭނެ އިންތިޒާމް ވެސް ކޮންސަޓް ތެރޭގައި މިރޭ ހަމަޖެހިފައި ހުންނާނެ އެވެ.
މިއުޒިކަށް ނާޝިދު ކޮށްދިން ހިދުމަތާއި އޭނާގެ ސަބަބުން އެތައް ބަޔަކަށް މިއުޒިކްގެ ތެރެއަށް ވަދެވެފައިވާތީ އެކަން ފާހަގަ ކުރަން ބާއްވާ ކޮންސަޓްގައި ރާއްޖޭގެ 34 ފަންނާނަކު ޕަފޮމް ކުރާނެ އެވެ.
އޭގެ ތެރޭގައި ނާޝިދުގެ އަންހެން ދަރިފުޅު ނިޝްފާ ނާޝިދު (ނިޝް) ވެސް ހިމެނެ އެވެ.
ފަންނުގެ ދަރިން އިން ބުނީ ދާދި ފަހުން އޮލިމްޕަހުގައި މިސްކުން ބޭއްވި "އަ ޓްރިބިއުޓް ޓް ނާޝިދު" ގައި ޕަފޮމް ކުރި ގިނަ އާޓިސްޓުން މިރޭގެ ކޮންސަޓުން ފެނިގެން ދާނެ ކަމަށެވެ.
ކޮންސަޓްގައި ނާޝިދު ކިޔާފައިވާ ލަވަތަކެއް އާޓިސްޓުން ހުށަހަޅައި ދޭނެ އެވެ.
އޭގެ ތެރޭގައި ޒީރޯ ޑިގްރީން ކުރިން ނެރެފައިވާ "ދޯނި" އާއި "ބާޑް އިން ފްލައިޓް" އަލްބަމްގެ ލަވަތަކުގެ އިތުރުން ނާޝިދުގެ ކުރިއަށް އޮތް އަލްބަމް "ޖާނީ" ގެ ލަވަތައް ހިމެނެ އެވެ.
މިރޭގެ ކޮންސަޓް ބާއްވަނީ ވަރަށް ގިނަ ފަރާތްތަކެއްގެ އެހީތެރިކަމާ ވެސް އެކުގަ އެވެ. އޭގެ ތެރޭގައި ރާއްޖޭގެ އާޓިސްޓުންގެ އިތުރުން ޕޮޕް ޖޯއި، އިވެންޓް މޯލްޑިވްސް، ސައުންޑް ސްކޮޑް، ނެޝަނަލް ސެންޓަ ފޮ ދި އާޓްސް (އެންސީއޭ) އަދި މޯލްޑިވް މިއުޒިކް އެންޑް އާޓްސް ސެންޓަ (އެމްއެމްއޭސީ) ހިމެނެ އެވެ.