ރާއްޖޭގެ މަޝްހޫރު މިއުޒިކް ލެޖެންޑް ޒީރޯ ޑިގްރީގެ އަހުމަދު ނާޝިދު (ފްލޫ) އަށް ހާއްސަކޮށްގެން އަނެއްކާ ވެސް ވަރުގަދަ ޝޯއެއް ބާއްވަން ނިންމައިފި އެވެ.
މި ފަހަރު ޝޯ އިންތިޒާމު ކުރަނީ ލައިވް މިއުޒިކަށް ލޯބި ކުރާ ފަންނާނުންގެ ހުނަރުތައް ދައްކާލުމަށް އުފައްދާފައިވާ މިއުޒިކް ކޮމިއުނިޓީ "ފަންނުގެ ދަރިން" ގެ ފަރާތުންނެވެ.
މި މަހުގެ 21 ގައި މިއުޒިކް އިން ސޯޝަލް ކޮމިއުނިޓީ (މިސްކް) އިން އިންތިޒާމްކޮށްގެން އޮލިމްޕަހުގައި ބޭއްވި "އަ ޓްރިބިއުޓް ޓް ނާޝިދު" އަށް ވެސް އާންމުންގެ ފަރާތުން ބޮޑު ތަރުހީބެއް ލިބިފައިވާތީ އާއި ނާޝިދު މިއުޒިކަށް ކޮށް ދިން ހިދުމަތުގެ އަގު ވަޒަން ކުރުމަށް ފަންނުގެ ދަރިން ބާއްވާ ޝޯ އޮންނާނީ އަންނަ މަހުގެ ހައެއްގަ އެވެ.
މި ފަހަރުގެ ޝޯ ބާއްވަނީ "ނާޝިދު: ދަ މޭން ހޫ އިންސްޕިއާޑް އަސް" ގެ ނަމުގަ އެވެ.
މި އިވެންޓް އިންތިޒާމު ކުރުމުގައި އިސްކޮށް ހަރަކާތްތެރިވާ އަދި ފަންނުގެ ދަރިން 2013 ގައި ވުޖޫދަށް ގެނައުމުގައި އިސް ރޯލެއް އަދާ ކުރި އަދުހަމް މުހައްމަދު ރާޝިދު ބުނީ އަންނަ މަހުގެ ހަ ވަނަ ދުވަހުގެ ރޭ ކާނިވާ ސަރަހައްދުގައި ކޮންސަޓް ބާއްވަނީ ފަންޑް ރެއިޒިން އިވެންޓެއްގެ ގޮތުގައި ކަމަށެވެ.
"ބޭނުމަކީ އަހަރެމެން އެންމެން މިއުޒިކަށް އިންސްޕަޔާވުމުގައި ނާޝިދުގެ އޮތް އިންފުލުއަންސް ދައްކާލައި، ނާޝިދު މިއުޒިކަށް ކޮށް ދިން ހިދުމަތުގެ އަގު ވަޒަން ކުރުން. ހަމަ މިއާ އެކު މީގެ އެއް ބޭނުމަކީ ނާޝިދަށް ފައިސާގެ ގޯތުން އެހީއެއް ފޯރުކޮށް ދިނުން،" ކެންސަރަށް ފަރުވާ ހޯދަމުން އަންނަ 53 އަހަރުގެ ލަވަ ކިޔުންތެރިޔާ އާ ބެހޭ ގޮތުން އަދުހަމް ބުންޏެވެ.
އޭނާ ބުނީ ކޮންސަޓް ބާއްވާނީ ހެޔޮ އެދޭ ވަރަށް ގިނަ ފަރާތްތަކެއްގެ އެހީތެރިކަމާ އެކުގައި ކަމަށެވެ. އެގޮތުން ޝޯ ބާއްވާނެ ތަނާއި ލައިޓިން އާއި ސްޓޭޖް ހަދައި ދިނުން ފަދަ ކަންކަމަށް އެހީތެރިކަން ލިބިފައިވާ ކަމަށް ބުންޏެވެ.
"އަޅުގަނޑުމެން އެބަ ވިސްނަން ފަންޑް ރެއިޒިން އިވެންޓެއްގެ ގޮތުގައި ކޮންސަޓް ބާއްވާތީ ޓިކެޓް ވިއްކަން ވެސް. އަދި ބީއެމްއެލްގައި އެކައުންޓެއް ހުޅުވައިގެން އާންމުކޮށް ޑޮނޭޓް ކުރުމުގެ ފުރުސަތު ހުޅުވާލަން ވެސް ރާވާފައި ވަނީ،" އަދުހަމް ބުންޏެވެ. "އެހެން ނަމަވެސް ޓިކެޓް ވިއްކާނެތޯ ނޫންތޯ އަދި ޑިސައިޑެއް ނުކުރަން."
ކޮންސަޓްގެ ތައްޔާރީތައް މިހާރު ވަމުން އަންނަ އިރު "އަ ޓްރިބިއުޓް ޓް ނާޝިދު" ގައި ޕަފޯމް ކުރި ގިނަ ފަންނާނުންތައް ފަންނާނުންގެ ދަރިން ބާއްވާ ކޮންސަޓްގައި ވެސް ޕަފޯމް ކުރާނެ އެވެ.
އޭގެ ތެރޭގައި ނާޝިދުގެ ދަރިފުޅު ނިޝްފާ ނާޝިދު (ނިޝް) ހިމެނެ އެވެ.
"އަޅުގަނޑުމެން މި ބަލަނީ ވަރަށް ވަރުގަދަކޮށް، ވަރަށް ފުރިހަމަކޮށް ކޮންސަޓް ބާއްވަން. ކުރީ ފަހަރާ ހިލާފަށް މި ކޮންސަޓް ލައިވްކޮށް ގިނަ ބަޔަކަށް ޝޯ ބަލާލުމުގެ ފުރުސަތު ޔަގީނުން ވެސް ލިބިގެން ދާނެ،" ލަންކާ އިން ސައުންޑް އިންޖިނިއަރިއަކު ގެނެސްގެން ބާއްވާ ކޮންސަޓާ ބެހޭ ގޮތުން އަދުހަމް ބުންޏެވެ. "ޒީރޯ ޑިގްރީގެ ލަވަތައް ހާއްސަކޮށް ނާޝިދުގެ ލަވަތައް ލައިވްކޮށް ކުޅޭ ތަން ބަލަން ވަރަށް ގިނަ ބަޔަކު ބޭނުންވޭ."
ކޮންސަޓްގައި "ދޯނި" އަލްބަމާއި "ބާޑް އިން ފްލައިޓް" ގެ ލަވަތައް އަޑު އިވިގެން ދާނެ ކަމުގެ ޔަގީންކަން އަދުހަމް ދިނެވެ.
އަދި ޝޯގެ ތެރެއިން ނާޝިދު ފެނިގެން ދިއުން އެކަށީގެންވާ ކަމަށް ފަންނުގެ ދަރިން ބުންޏެވެ.
"މި ޝޯގެ ޕްރޮމޯޝަނަލް ކަންކަމާއި ޝޯ އާ ބެހޭ އިތުރު މައުލޫމާތުތައް ކުރިއަށް މި އޮތް ދުވަސްތަކުގައި ހާމަ ކުރަމުން ގެންދާނަން،" އަދުހަމް ބުންޏެވެ.