ކަރީނާ ކަޕޫރެއް ނޫން، ޝާހްރުކް ޚާނާ އެކީ ކާޖޮލް؟

ޝާހްރުކް ޚާން ބަތަލުގެ ރޯލަށް ލައިގެން ޑައިރެކްޓަރު ރާޖްކުމާރީ ހިރާނީ ހަދަން ނިންމާފައިވާ ފިލްމުގެ ބަތަލާ އަކީ ކަރީނާ ކަޕޫރް ނޫން ކަމަށާއި ބަތަލާގެ ރޯލުން ފެނުމުގެ ފުރުސަތު ބޮޑީ ކާޖޮލް ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ކުރިން ބުނިގޮތުގައި ހިރާނީގެ 2009 ގެ "3 އިޑިޓްސް" ގެ ބަތަލާގެ ރޯލް ވެސް ކުޅުނު ކަރީނާ ވަނީ އާ ފިލްމަށް އެއްބަސްވެފަ އެވެ. ނަމަވެސް ބޮލީވުޑް ހަންގާމާ އިން ބުނީ ހިރާނީ ބޭނުން ވަނީ ޝާހްރުކާއި ކާޖޮލްގެ ޖޯޑް ސްކްރީނަށް ގެންނަން ކަމަށެވެ.

މިފަދަ ވާހަކަތަކެއް ދެކެވެމުން ދިޔަ ނަމަވެސް، ހިރާނީގެ އާ ފިލްމާ ބެހޭ އެއްވެސް ވާހަކައެއް މިހާތަނަށް ރަސްމީކޮށް އަދި ހިއްސާކޮށްފައެއް ނުވެ އެވެ. އެކަމަކު ރިޕޯޓްތައް ބުނާގޮތުން ކުރިއަށް އޮތް ދެ މަސްތެރޭގައި ފިލްމު އިއުލާންކޮށް، އެޕްރީލް މަހުގެ ތެރޭގައި މަސައްކަތް ފަށާނެ އެވެ. އެކަމަކު ފިލްމު ސިނަމާތަކަށް އަންނާނީ އަންނަ އަހަރު ކަމަށްވެ އެވެ.

މިހާތަނަށް ހިރާނީގެ ފިލްމެއްގައި ކާޖޮލް މަސައްކަތްކޮށްފައި ނުވާތީ އޭނާގެ ފިލްމަކުން ހުނަރުވެރި ބަތަލާއަކު ފެނުމަކީ ވަރަށް ހާއްސަ ކަމަކަށް ވާނެ އެވެ. އަނެއްކޮޅުން ޝާހްރުކާއި ކާޖޮލްގެ ޖޯޑަކީ ހިންދީ ސިނަމާގެ އެންމެ މަގުބޫލު އެއް ޖޯޑަށްވާތީ، މި ދެ ތަރިން އެކީގައި ފިލްމަކުން ފެނުމަކީ އަބަދު ވެސް ބެލުންތެރިން ވަރަށް އިންތިޒާރުކުރާ ކަމެކެވެ.

"ދިލްވާލޭ ދުލްހަނިޔާ ލޭޖާއޭގޭ" އާއި "ކުޗް ކުޗް ހޯތާ ހޭ" އާއި "ކަބީ ޚުޝީ ކަބީ ޢަމް" އަދި "ބާޒީގަރު" ފަދަ ފިލްމުތައް އެކީގައި ކުޅުނު ޝާހްރުކާއި ކާޖޮލް އެންމެ ފަހުން އެކީގައި ފެނިގެން ދިޔައީ 2015 ގެ "ދިލްވާލޭ" އިންނެވެ. އެކަމަކު އެއީ ބެލުންތެރިންނަށް އެހާ ކަމުދިޔަ ފިލްމެއް ނޫނެވެ.

މިހާރު ސިނަމާތަކުގައި ދައްކަމުން އަންނަ ފިރިމީހާ އަޖޭ ދޭވްގަންގެ "ތާނަޖީ: ދި އަންސަންގް ވޮރިއާ" ގެ ރޯލެއް ވެސް ކުޅެފައިވާ ކާޖޮލް އަންނަނީ ދެ ފިލްމެއްގެ މަސައްކަތްކުރަމުންނެވެ. އެއީ "ދޭވީ" ކިޔާ ކުރު ފިލްމަކާއި ނެޓްފްލިކްސް އަށް ހަދާ "ތުރިބާންގާ" އެވެ.