ރަންވީރާއި ދީޕިކާގެ "83" އަންނަ މަހު ނާޅުވަން ނިންމައިފި

އަހުމަދު އަދްޝަން، މިހާރު

22 މާޗް 2020 - 08:22

ކައިވެންޏަށް ފަހު، ބޮލީވުޑްގެ ދެ ތަރިން ކަމަށްވާ ރަންވީރު ސިންގް އާއި ދީޕިކާ ޕަދްކޯން އެކީގައި ކުޅުނު ފުރަތަމަ ފިލްމު "83" އަންނަ މަހު ނާޅުވަން ނިންމައިފިި އެވެ.

ކަބީރު ޚާން ޑައިރެކްޓްކޮށްފައިވާ މި ފިލްމު ސިނަމާތަކަށް ގެންނަން ކުރިން ތާވަލުކޮށްފައި އޮތީ އަންނަ މަހުގެ 10 އެވެ. ނަމަވެސް މިހާރު މުޅި ދުނިޔެ އަށް ކުރިމަތިވެފައިވާ ކޮވިޑް-19ގެ ބަލިމަޑުކަމާ ހެދި މި ދަނޑިވަޅުގައި ފިލްމު ނާޅުވަން ނިންމި އިރު، މިދިޔަ ހަފުތާގައި "83" ގެ ޓްރެއިލާ ވެސް ދައްކައިލަން ރޭވުމަށް ފަހު، އެކަން ވެސް އޮތީ މަޑުޖައްސާލައިފަ އެވެ.

"83" ގެ ޓީމުން ނެރުނު ބަޔާނެއްގައި ބުނީ މި ފިލްމަކީ ހަމައެކަނި އޭގައި މަސައްކަތްކުރި މީހުންގެ ފިލްމެއް ނޫން ކަމަށާއި މިއީ މުޅި އިންޑިއާ ތަމްސީލުކުރާ ފިލްމެއް ކަމަށެވެ. ސަބަބަކީ މި ފިލްމު ހަދާފައި ވަނީ އިންޑިއާ އިން 1983 ގައި ކާމިޔާބުކުރި ކްރިކެޓް ވޯލްޑް ކަޕަށްވުމެވެ.

83 is not just our film but the entire nation’s film. But health and safety of the nation always comes first. Stay safe, take care.
We shall be back soon! #ThisIs83 @RanveerOfficial @kabirkhankk @deepikapadukone @Shibasishsarkar #SajidNadiadwala @vishinduri @ipritamofficial pic.twitter.com/r3DOnWmQ1j
— 83 (@83thefilm) March 20, 2020

ފިލްމުގެ ޓީމުން ބުނީ މި ދަނޑިވަޅިގައި ފިލްމު ސިނަމާތަކަށް ނުގެންނަން ނިންމުމަށް ފަހު، ކުރިއަށް އޮތް ދުވަސްތަކުގައި ހާލަތަށް ރިއާޔަތްކޮށް ފިލްމަށް އިންތިޒާރުކުރާ މީހުންނަށް އުފާވެރި ޚަބަރެއް ދޭނެ ކަމަށެވެ. "83" އަކީ "ބަޖިރަންގީ ބައިޖާން" އާއި "އޭކް ތަ ޓައިގާ" ފަދަ ކާމިޔާބު ފިލްމުތައް ގެނެސްދިން ކަބީރު 2017 ގެ "ޓިއުބްލައިޓް" އަށް ފަހު ގެނެސްދޭ ފުރަތަމަ ފިލްމެވެ.

#ThisIs83
.@kabirkhankk @deepikapadukone @Shibasishsarkar #SajidNadiadwala @vishinduri @ipritamofficial @RelianceEnt @_KaProductions @FuhSePhantom @NGEMovies @vibri_media @ZeeMusicCompany @PicturesPVR @83thefilm pic.twitter.com/hI8WvbNoL4
— Ranveer Singh (@RanveerOfficial) March 7, 2020

މި ފިލްމުގައި ރަންވީރު ކުޅެފައި ވަނީ ކްރިކެޓް ވޯލްޑް ކަޕް އިންޑިއާ ކާމިޔާބުކުރި އިރު، އެ ގައުމުގެ ޓީމްގެ ކެޕްޓަނަކަށް ހުރި ކަޕިލް ދޭވްގެ ރޯލެވެ. ދީޕިކާ ކުޅެފައި ވަނީ ކަޕިލްގެ އަންހެނުން ރޯމީ ބާޓިއާގެ ރޯލެވެ.

މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "83" އަކީ ބޮޑު ކާސްޓެއް ވެސް ފެނިގެންދާނެ ފިލްމެކެވެ.

ކޮވިޑް-19އާ ހެދި އިންޑިއާގެ ފިލްމު އިންޑަސްޓްރީ މިހާރު ވަނީ އެއްކޮށްހެން ހުއްޓުމަކަށް އައިސްފަ އެވެ. އެގޮތުން މި މަހުގެ 19-31 ގެ ނިޔަލަށް އެއްވެސް އެއްޗެއްގެ ޝޫޓިން ކުރިއަށް ނުގެންދަން ކަމާބެހޭ ފަރާތްތަކުން ވަނީ އަންގައިފަ އެވެ. އަދި ހުރިހާ ސިނަމާތަކެއް ވަނީ ބަންދުކޮށްފަ އެވެ.