ޝޫޓްނުކުރެވި ކަންގަނާގެ "ތަލައިވީ" އަށް 5 ކްރޯޑްގެ ގެއްލުމެއް

ކަންގަނާ.

އަހުމަދު އަދްޝަން، މިހާރު

29 އެޕްރީލް 2020 - 08:47

ކޮރޯނާވައިރަހާ އެކު ކުރިމަތިވި ލޮކްޑައުނާކާ އެކު، ޝޫޓިން ކުރިއަށް ނުގެންދެވި ބަތަލާ ކަންގަނާ ރަނާވަތުގެ ފިލްމު "ތަލައިވީ" އަށް ފަސް ކްރޯޑް ރުޕީސްގެ ގެއްލުމަކާ ކުރިމަތިލާން ޖެހިފައިވާ ކަމަށް އެ ފިލްމުގެ ޕްރޮޑިއުސަރު ޝާއިލޭޝް ސިންގް ބުނެފި އެވެ.

ޓަމިލް ނާޑު ސްޓޭޓްގެ ކުރީގެ ޗީފް މިނިސްޓަރު ޖަޔަލަލީތާގެ ވާހަކަ ކިޔައިދޭ ފިލްމުގެ މަސައްކަތްތަކާ ބެހޭ ގޮތުން އޭނާ ބުނީ ލޮކްޑައުން ކުރުމަތިވި އިރު، ފިލްމުގެ 40 ޕަސަންޓް ޝޫޓިން އަދި ނުނިމި އެބައޮތް ކަމަށެވެ. އެގޮތުން މިދިޔަ މަހުގެ 10 ގައި ހައިދަރުއާބާދުގެ ރާމަކްރިޝްނާ ސްޓޫޑިއޯގައި 45 ދުވަހުގެ ޝެޑިއުލެއް ކުރިއަށް ގެންދަން ހެދި ސެޓް ވެސް ބޭނުންނުކުރެވި ހުއްޓައި ހަލާކުވެދާނެ ކަމަށް ޝާއިލޭޝް ބުންޏެވެ.

އެތަނުގައި ވަނީ ޕާލަމަންޓް ހައުސް ދައްކުވައިދޭ ގޮތަށް ބޮޑު ސެޓެއް ހަދައިފަ އެވެ.

On #Thalaivi 's birth anniversary, here's another glimpse of #KanganaRanaut looking like a mirror image of #jayalalithaa #ThalaviBirthAnniversary @KanganaTeam #Vijay @vishinduri @ShaaileshRSingh @BrindaPrasad1 @thearvindswami @itsBhushanKumar @KarmaMediaent @TSeries @vibri_media pic.twitter.com/qR2W7ojc8z
— ThalaiviTheFilm (@Thalaivithefilm) February 24, 2020

"އަހަރެމެން ކުރިން ރާވައިގެން ތިބީ މާޗް މަހުގެ ތެރޭގައި ޝޫޓިން ފަށައި ޗެންނާއީގައި ނަގަން ޖެހޭ މަންޒަރުތައް މ،ި މަހުގެ މެދުތެރެއަށް އަންނަންވާ އިރަށް ނަގައި ނިންމޭނެ ކަމަށް،" ޝާއިލޭޝް ބުންޏެވެ. "ޢެކަމަކު ލޮކްޑައުނާ ހެދި މުޅި ޝެޑިއުލް ވަނީ ހަރާބުވެފައި. އަދި ކުރިއަށް އޮތީ ވިއްސާރަ މޫސުން ކަމަށްވާތީ ވާރެއާ އެކު ސެޓް ހަލާކުވެދާނެ."

އޭނާ ބުނިގޮތުގައި ހައިދަރުއާބާދާއި ޗެންނާއީގައި އިތުރު އެހެން ދެ ސެޓެއް ވެސް ހަދާފައިވާ އިރު، އެތަންތަނުގައި ނަގަން ޖެހޭ މަންޒަރުތަކެއް ވެސް އަދި ބާކީ އެބަހުއްޓެވެ. އެކަމަކު ޝޫޓިންތައް ކުރިއަށް ގެންދެވެން ނެތި، ވިއްސާރަ މޫސުން ބޯމަތިވާތީ ސެޓްތަކަށް ލިބޭ ގެއްލުންތަކާ އެކު ފިލްމުގެ ޓީމަށް 5 ކްރޯޑް ރުޕީސް (656,901 ޑޮލަރު) ގެއްލުމެއް ވާނެ ކަމަށް ޝާއިލޭޝް ބުންޏެވެ.

އޭނާ ބުނީ މި ހާލަތުގައި ކިރިޔާ ވެސް ފުރުސަތެއް ލިބިއްޖެ ނަމަ "ތަލައިވީ" ގެ ބާކީ ހުރި މަސައްކަތްތަކުގެ އައުޓްޑޯ ޝޫޓިންތައް 10 ވަރަކަށް ދުވަހުގެ ތެރޭގައި ވެސް ނިންމައިލެވިދާނެ ކަމަށެވެ. ނަމަވެސް ޝޫޓިންތައް ކުރިއަށް ނުގެންދަން އިންޑިއާގެ ކަމާބެހޭ ފަރާތްތަކުން ވަނީ މިދިޔަ މަހުގެ ތެރޭގައި އަންގައިފަ އެވެ.

"ތަލައިވީ" އަކީ މި އަހަރުގެ ޖޫން 26 ގައި ސިނަމާތަކަށް ގެންނަން ތާވަލުކޮށްފައި އޮތް ފިލްމެކެވެ.

މި ފިލްމަށް ދިމާވި ފަދަ މައްސަލަތަކެއް އަޖޭ ދޭވްގަންގެ "މައިދާން" އާއި ސަންޖޭ ލީލާ ބަންސާލީގެ "ގަންގްބާއީ ކަތިއަވާޅީ" ވެސް ވަނީ ކުރިމަތިވެފަ އެވެ.