ރާޖްކުމާރު ހިރާނީގެ އާ ފިލްމަށް އިތުރު ލިޔުންތެރިއެއް

ޝާހްރުކް ޚާނާ އެކު ޑައިރެކްޓަރު ރާޖްކުމާރު ހިރާނީ ހަދަން ނިންމާފައިވާ ކަމަށް ބުނާ ފިލްމުގެ ސްކްރީންޕްލޭގައި އިތުރު ލިޔުންތެރިއަކު ހިއްސާވެއްޖެ ކަމަށް ރިޕޯޓްތައް ބުނެފި އެވެ.

"މުންނާބާއީ" އާއި "3 އިޑިއަޓްސް" އަދި "ޕީކޭ" ފަދަ ފިލްމުތައް ގެނެސްދިން ޑައިރެކްޓަރު އާންމުކޮށް އޭނާގެ ފިލްމުތަކުގެ ސްކްރީންޕްލޭ ލިޔަނީ ރައިޓަރު އަބިޖާތު ޖޯޝީއާ ގުޅިގެންނެވެ. ނަމަވެސް ސްކްރީންޕްލޭގައި މި ފަހަރު ހިރާނީ އާއި އަބިޖާތާ އެކު މުޅިން އަލަށް އަންހެން ލިޔުންތެރިޔާ ކަނިކާ ދިލަން ހިއްސާވާނެ ކަމަށް ބޮލީވުޑްގެ ޚަބަރުތައް ގެނެސްދޭ ނޫސްތަކުން ބުންޏެވެ.

ކަނިކާ ސްކްރީންޕްލޭގައި ހިއްސާވި ފިލްމުތަކުގެ ތެރޭގައި ޝާހްރުކް 2011 ގައި ކުޅުނު ކުޅުނު ސުޕަހީރޯ ފިލްމު "ރާ.ވަން" ހިމެނެ އެވެ. އޭނާ ހިއްސާވި އިތުރު ފިލްމުތަކުގެ ތެރޭގައި ޖެނުއަރީ މަހު ނެޓްފްލިކްސް ސްޓްރީމްކުރި "ގިލްޓީ" އާއި 2018 ގެ "މަންމަރުޒިޔާ" އާއި 2018 ގެ "ކޭދަރުނާތު" ގެ އިތުރުން މިދިޔަ އަހަރުގެ "ޖަޖްމެންޓަލް ހޭ ކިޔާ" ހިމެނެ އެވެ.

ކަނިކާ ވަނީ އެސިސްޓަންޓް ޑައިރެކްޓަރެއްގެ ގޮތުގައި ވެސް މަސައްކަތްކޮށްފަ އެވެ. އެގޮތުން އެންމެ ފާހަގަކޮށްލެވޭ ފިލްމަކީ ޝާހްރުކާ އެކު ފަރާ ޚާން 2007 ގައި ގެނެސްދިން "އޯމް ޝާންތި އޯމް" އެވެ.

ބޮލީވުޑް ހަންގާމާ އިން ބުނިގޮތުގައި ހިރާނީ އާއި އަބިޖާތުއާ އެކު މަސައްކަތްކުރާ އިރު، ކަނިކާ މުޅި ސްކްރީންޕްލޭގައި ބޮޑު ހިއްސާއެއް އަދާކުރާނެ އެވެ.

ނަމަވެސް ހިރާނީގެ އާ ފިލްމާ ބެހޭ އެއްވެސް މައުލޫމާތެއް މިހާތަނަށް ރަސްމީކޮށް ހިއްސާއެއްނުކުރެ އެވެ. އެކަމަކު މިދިޔަ މަހު ޝާހްރުކް ކުރިއަށް ގެންދިޔަ އިންސްޓަގްރާމް ލައިވް އިންޓަވިއުއެއްގައި ފޭނަކު ކުރި ސުވާލަކާ ގުޅިގެން ވަނީ ހިރާނީގެ ފިލްމަކަށް އެއްބަސްވެފައިވާކަމުގެ އިޝާރާތެއް ދީފަ އެވެ.

މީޑިއާތަކުން ކުރިން ބުނެފައިވާ ގޮތުގައި މި ފިލްމަކީ ހިޖުރަކުރުމާ ބެހޭ ވާހަކައެއް ކިޔައިދޭނެ ފިލްމެކެވެ. އަދި އަންނަ އޮގަސްޓް ހިސާބުގައި ފިލްމުގެ ޝޫޓިން ފެށޭތޯ ބަލަމުން އަންނަ ކަމަށްވެ އެވެ. ބައެއް ނޫސްތަކުން ކުރިން ބުނިގޮތުގައި ހިރާނީގެ ފިލްމުން ޝާހްރުކާ އެކު ބަތަލާގެ ރޯލުން ފެނިގެންދާނީ ކާޖޮލެވެ.

ހިރާނީ އެންމެ ފަހުން ގެނެސްދިން ފިލްމަކީ 2018 ގެ "ސަންޖޫ" އެވެ. ރަންބީރު ކަޕޫރް ކުޅުނު އެ ފިލްމަކީ އެކްޓަރު ސަންޖޭ ދަތުގެ ބައޮގްރަފިކަލް ޑްރާމާއެކެވެ.