ހިންދީ ސިނަމާގެ އައިކޮނިކް ފިލްމުތަކެއް ގެނެސްދިން ބަރްޖަތިއާ އާއިލާގެ ފިލްމު ކުންފުނި ރާޖްޝްރީ ޕްރޮޑަކްޝަން ހިންގުމުގެ ޒިންމާ މިހާރު ނަގަމުން އަންނަ ޑައިރެކްޓަރު ސޫރަޖް ބަރްޖަތިއާގެ ދަރިފުޅު އަވްނިޝް ބަރްޖަތިއާގެ ފުރަތަމަ ފިލްމުގެ ބަތަލުގެ ރޯލް މީޒާން ޖެފްރީ އަށް ދީފައިވާ ކަމަށް ރިޕޯޓްތައް ބުނެފި އެވެ.
މިދިޔަ އަހަރު ބައެއް ނޫސްތަކުން ބުނި ގޮތުގައި އެ ފިލްމު ވަނީ ކާތިކް އާރިޔަނަށް ހުށަހަޅައިފަ އެވެ. ނަމަވެސް ޕިންކްވިލާ އިން ބުނި ގޮތުގައި އަވްނިޝް ހަދަން ތައްޔާރުވަމުން އަންނަ ފެމިލީ ޑްރާމާގެ ޗޮކްލެޓް ބޯއި ކެރެކްޓާ އަށް ކާތިކަށް ވުރެ ބޮޑަށް ގުޅެނީ މީޒާންއާ ކަމަށްވާތީ އޭނާ އަށް ފިލްމު ދޭން ނިންމީ އެވެ. މިދިޔަ އަހަރު ފިލްމު "މަލާލް" އިން ބޮލީވުޑަށް ނުކުތް މީޒާނަކީ މަޝްހޫރު އެކްޓަރު ޖާވިދު ޖެފްރީގެ ދަރިއެކެވެ.
މީޒާންގެ ކުރިއަށް އޮތް ފިލްމަކީ ޕްރިޔާދަރުޝަން ގެނެސްދޭ "ހަންގާމާ 2" އެވެ. އޭގެ ކާސްޓުންގެ ތެރޭގައި ޝިލްޕާ ޝެޓީ އާއި ޕަރޭޝް ރާވަލާއި ޕްރަނީތާ ސުބާޝް ހިމެނެ އެވެ.
ޕިންކްވިލާ އިން ބުނި ގޮތުގައި އަވްނީޝްގެ ފިލްމުގެ ސްކްރީންޕްލޭގެ ފައިނަލް ޑްރާފްޓް ވެސް ނިންމާފައިވާ އިރު، މި ފިލްމަކީ ޒަމާނީ ޓްވިސްޓަކާ އެކު ގެނެސްދޭނެ ވަރަށް އަސަރު ގަދަ ފެމިލީ ޑްރާމާއެކެވެ. އަދި އޭގެ މައިގަނޑު ވާހަކަ އެނބުރޭނީ ޑެސްޓިނޭޝަން ވެޑިންއަކަށް ކަމަށް ބުންޏެވެ.
ޕިންކްވިލާ އިން ބުނީ އަވްނީޝްގެ ފުރަތަމަ ފިލްމަކީ އޭނާގެ ބައްޕަ ސޫރަޖް ގެނެސްދީފައިވާ ކަހަލަ ބިޔަ ފިލްމަކަށް ވާނެ އެވެ. އަދި އޭގެ އެންމެ ހާއްސަ އެއް ކަމަކަށް ވާނީ ރާޖްޝްރީގެ ފިލްމުތަކުން އާންމުކޮށް ފެންނަ ކަހަލަ އާއިލީ ލޯބީގެ ރަހަގަނޑު ފެނިގެން ދިއުމެވެ. ނަމަވެސް މީގެ މަސައްކަތް ފަށާނެ އިރަކާއި ގެނެސްދޭނެ އިރެއް އަދި ނޭނގެ އެވެ.
"މޭނޭ ޕިޔާރު ކިޔާ" އާއި "ހަމް އާޕް ކޭ ހޭ ކޯން" އާއި "ހަމް ސާތު ސާތު ހޭ" އަދި "ވިވާ" ފަދަ ރީތި ފިލްމުތައް ގެނެސްދިން ރާޖްޝްރީން އެންމެ ފަހުން ގެނެސްދިން ފިލްމަކީ މިދިޔަ އަހަރު އާ ތަރިންތަކަކާއި އާ ޑައިރެކްޓަރަކާ އެކު ގެނެސްދިން "ހަމް ޗާރް" އެވެ. އާންމުކޮށް ސަލްމާން ޚާނާ އެކު ފިލްމުތައް ގެނެސްދޭ ސޫރަޖް އެންމެ ފަހުން ގެނެސްދިން ފިލްމަކީ ސަލްމާނާއި ސޯނަމް ކަޕޫރް ލީޑް ރޯލް ކުޅުނު 2015 ގެ "ޕްރޭމް ރަތަން ދަން ޕާޔޯ" އެވެ.
ރިޕޯޓްތައް ބުނާގޮތުން ދަރިފުޅު އަވިނޭޝްގެ އަލަތު ފިލްމަށް އެހީވުމަށް ފަހު، ސޫރަޖް ވެސް އާ ފިލްމެއްގެ މަސައްކަތް ފަށާނެ އެވެ. އަދި އޭގެ ބަތަލަކީ ސަލްމާންކަން އޭނާ ކުރިން ވެސް ވަނީ ކަށަވަރުކޮށް ދީފަ އެވެ.
