ސޫރަޖް ބަރްޖަތިއާ ދެން ހަދާ ފިލްމުގައި ވެސް ސަލްމާން ހާން

ޑައިރެކްޓަރު ސޫރަޖް ބަރްޖަތިއާއާ އެކު ސަލްމާން ވަނީ ވަރަށް ކާމިޔާބު ފިލްމުތަކެއް ބެލުންތެރިންނަށް ގެނެސް ދީފަ އެވެ. އޭގެ ތެރޭގައި މޭނޭ ޕިޔާރް ކިޔާ (1989)، ހަމް އާޕް ކޭ ހޭ ކޯން (1994)، ހަމް ސާތު ސާތު ހޭ (1999) ގެ އިތުރުން 2013 ގެ "ޕްރޭމް ރަތަން ދަން ޕާޔޯ" ހިމެނެ އެވެ.

ސޫރަޖް މިހާތަނަށް ހަ ފިލްމު ޑައިރެކްޓް ކުރި އިރު، އޭގެ ތެރެއިން ހަތަރު ފިލްމުގައި ލީޑް ރޯލް ކުޅުމުގެ ޝަރަފު ސަލްމާނަށް ލިބިފައިވާ އިރު، ސޫރަޖް މިހާރު އަލަށް ފަށަން ތައްޔާރުވަމުން އަންނަ ފިލްމުގެ ބަތަލަކީ ވެސް ސަލްމާނެވެ.

އެކަން ކަށަވަރުކޮށް ދެމުން ބޮލީވުޑް ހަންގާމާ އަށް ސޫރަޖް ބުނީ އައު ފިލްމުގެ މަސައްކަތް އަންނަ އަހަރު ފަށާނެ ކަމަށެވެ. އަދި އެ ފިލްމުގެ ކުޅެދޭން ސަލްމާން ކިބައިން އެދިފައިވާ އިރު، ސްކްރިޕްޓް ނިންމައިލެވުމުން، އެ ކިޔާލާފައި ފިލްމަށް ފެހި ސިގްނަލް ދޭނެ ކަމުގެ ޔަގީންކަން ސަލްމާން ދީފައިވާ ކަމަށް ސޫރަޖް ބުންޏެވެ.

އޭނާ ބުނީ އަންނަ މަހުގެ ތެރޭގައި ފިލްމުގެ ސްކްރިޕްޓްގެ މަސައްކަތް ފަށާނެ ކަމަށެވެ. ސޫރަޖް ވަނީ ސަލްމާން ލައްވައި "ޕްރޭމް" ގެ ރޯލް ކުޅުވައިގެން ބެލުންތެރިން ލޯބި ވަރަށް ބޮޑަށް ހޯދައިފަ އެވެ. ސޫރަޖްގެ ކޮންމެ ފިލްމެއްގައި ވެސް ލީޑް ބަތަލުގެ ކެރެކްޓާގެ ނަމަކީ ޕްރޭމް އެވެ. އެގޮތުން ޕްރޭމްގެ ގޮތުގައި ބެލުންތެރިންގެ ހިތްތަކުން ސަލްމާނަށް ހާއްސަ މަގާމެއް ދީފައިވެ އެވެ.

ދެހާސް ތޭރަ ވަނަ އަހަރު ސޫރަޖް، ސަލްމާނާއި ސޯނަމް ކަޕޫރް ހިމަނައިގެން ގެނެސް ދިން "ޕްރޭމް ރަތަން ދަން ޕާޔޯ" އަކީ ބެލުންތެރިން އުންމީދުކުރި ވަރުގެ ފިލްމަކަށް ނުވިޔަސް، ސޫރަޖަކީ ބޮލީވުޑްގައި އާއިލީ ލޯބީގެ ފިލްމުތައް ގެނެސް ދޭނެ އެންމެ އަރާހުރި އެއް ޑައިރެކްޓަރެވެ.

ސޫރަޖް، 54، ބުނީ ދެން ވެސް އޭނާ ހަދާނީ ހަމަ އެ ޖޯންރާގެ ފިލްމެއް ކަމަށާއި ބެލުންތެރިންނަށް ކަމުދާ ކަހަލަ ވާހަކައެއް ކިޔައި ދޭން މަސައްކަތް ކުރާނެ ކަމަށެވެ.

ސޫރަޖްގެ އާއިލީ ފިލްމު ކުންފުނި ރާޖްޝްރީ ޕްރޮޑަކްޝަނުން މިހާރު އަންނަނީ އައު ތަރިންތަކެއް ހިމަނައިގެން "ހަމް ޗާރް" ކިޔާ ފިލްމެއް ގެނެސް ދޭން ތައްޔާރުމުންނެވެ. އަބީޝެކް ޑިކްސިޓް ލިޔެ، ޑައިރެކްޓްކޮށްފައިވާ ފިލްމު ސިނަމާތަކަށް އަންނާނީ މި މަހުގެ 15 ގަ އެވެ.

ބޮލީވުޑް ހަންގާމާ އިން ބުނި ގޮތުގައި ސޫރަޖްގެ ދެވަނަ ފިރިހެން ދަރިފުޅު އަވްނީޝް ބަރްޖަތިއާ، 26، ވެސް ދެން މާ ހަލެއް ނުވެ ފިލްމު ޑައިރެކްޓް ކުރަން ފަށާނެ އެވެ.

ސޫރަޖް ޑައިރެކްޓް ކުރި ފިލްމުތަކުގެ ތެރެއިން ސަލްމާން ހިއްސާ ނުވާ ދެ ފިލްމަކީ 2003 ގައި ރިތިކް ރޯޝަނާއި ކަރީނާ ކަޕޫރް އަދި އަބީޝެކް ބައްޗަން ލީޑް ރޯލް ކުޅުނު "މޭ ޕްރޭމް ކީ ދީވާނީ ހޫ" އާއި ޝާހިދު ކަޕޫރާއި އަމްރިތާ ރާއޯ ލީޑް ރޯލް ކުޅުނު 2006 ގެ "ވިވާހް" އެވެ.