ޝާހްރުކް ޚާންގެ "ޕަތާން" ގެ ޝޫޓިން ފަށާނީ މުމްބާއީ އިން

އެކްޓިންއާ ދުރުގައި ހުންނަތާ ދެ އަހަރެއްހާ ދުވަސް ފަހުން، ޝާހްރުކް ޚާން ކުޅޭ ފުރަތަމަ ފިލްމު "ޕަތާން" ގެ ޝޫޓިން އަންނަ މަހު ފަށާނީ މުމްބާއީ އިން ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި މިދިޔަ އަހަރު ހިންދީ ސިނަމާގައި އެންމެ ހިނގި ފިލްމު ކަމަށްވާ ޔާޝްރާޖް ފިލްމްސް (ވައިއާރްއެފް) ގެ "ވޯ" ގެނެސްދިން ޑައިރެކްޓަރު ސިދާތު އާނަންދު ހަދާ އެކްޝަން ތުރިލާގެ ޝޫޓިންގެ ތެރެއިން މުމްބާއީގައި ނަގާނީ ވަރަށް މަދު މަންޒަރުތަކެކެވެ. ސަބަބަކީ "ޕަތާން" ގެ ބޮޑު ބައި އިންޑިއާ އިން ބޭރުގައި ނަގަން ޖެހޭ ގޮތަށް އޮތުމެވެ. އެގޮތުން ފިލްމުގެ ގިނަ މަންޒަރުތައް ނަގާނީ އިނގިރޭސިވިލާތުގައި ކަމަށްވެ އެވެ.

ބޮލީވުޑް ހަންގާމާ އިން ބުނި ގޮތުގައި "ޕަތާން" ގެ ޝޫޓިން މުމްބާއީގައި ކުރިއަށް ގެންދާ އިރު، އެ ޝެޑިއުލްގައި ކާސްޓްގައި ހިމެނޭ ޖޯން އަބްރަހަމާއި ދީޕިކާ ޕަދްކޯން ބައިވެރިއެއް ނުވާނެ އެވެ. ޖޯން މި ވަގުތު ޑައިރެކްޓަރު މިލަޕް މިލަން ޒަވޭރީގެ "ސަތިއަމޭވް ޖަޔަތޭ 2" ގެ މަސައްކަތްކުރަމުން އަންނަ އިރު، ދީޕިކާ އަންނަނީ ގޯއާގައި ޑައިރެކްޓަރު ޝަކުން ބަޓްރާގެ އާ ފިލްމުގެ މަސައްކަތް ކުރަމުންނެވެ.

ހަންގާމާ އިން ބުނި ގޮތުގައި "ޕަތާން" ޝޫޓިންއާ އެ ދެ ތަރިން ގުޅޭނީ އިންޑިއާ އިން ބޭރުގައި ޝޫޓްކުރަން ފަށާ ހިސާބުންނެވެ. މި ފިލްމުގެ ވާހަކަ މީޑިއާތަކުން ދައްކަމުން އަންނަތާ ގިނަ ދުވަސްތަކެއް ވި ނަމަވެސް ރަސްމީކޮށް މިއާ ބެހޭ އެއްވެސް ވާހަކައެއް ވައިއާރްއެފާއި ސިދާތު ވެސް ނުދައްކަ އެވެ. ނަމަވެސް މީޑިއާތަކުން ބުނާ ގޮތުގައި މިއީ ވަރަށް ބޮޑު ބަޖެޓަކުން ހަދާ އަދި މީގެ ކުރިން ޝާހްރުކް ނުފެންނަ ކަހަލަ ވަރުގަދަ އެކްޝަން ރޯލަކުން ފެނިގެންދާނެ ފިލްމެކެވެ. "ޕަތާން" އަށް އޭނާ ވަނީ އިސްތަށިގަނޑު ވެސް ދިގުކޮށްފަ އެވެ.

ވައިއާރްއެފްގެ ފިލްމެއްގައި ޝާހްރުކް މި މަސައްކަތް ކުރަނީ ވަރަށް ގިނަ ދުވަސްތަކެއް ފަހުންނެވެ. އެ ސްޓޫޑިއޯގެ އެންމެ ކާމިޔާބު ފިލްމުތަކުގެ ތެރޭގައި ހިމެނޭ ދިލްވާލޭ ދުލްހަނިޔާ ލޭޖާއޭގޭ (ޑީޑީއެލްޖޭ) އާއި "ދިލް ތޯ ޕާގަލް" އާއި "ޗަކް ދޭ އިންޑިއާ" އާއި "މުހައްބަތޭން" އާއި "ވީރު-ޒާރާ" އާއި "ޑަރް" އާއި "ފޭން" އާއި "ރަބް ނެ ބަނާދީ ޖޯޅީ" ފަދަ ފިލްމުތަކުގެ ބަތަލު އެންމެ ފަހުން ކުޅުނު ވައިއާރްއެގްގެ ފިލްމަކީ 2012 ގެ "ޖަކް ތަކް ހެ ޖާން" އެވެ.

ޝާހްރުކް އެންމެ ފަހުން ކުޅުނު ފިލްމަކީ 2018 ގެ "ޒީރޯ" އެވެ.